ჩემპიონთა ლიგის ფინალი ქართველის მონაწილეობით ტრიუმფით დასრულდა, სეზონი მორჩა, საქართველოს ეროვნულმა ნაკრებმა თავისი ამხანაგური მატჩები დაასრულა და ახლა მთელი ყურადღება 21-წლამდელთა ევროპის ჩემპიონატზეა.
ისტორიაში პირველად, საქართველოს ახალგაზრდულმა ნაკრებმა საკვალიფიკაციო ეტაპი წარმატებით დაძლია და იმ ელიტარულ ჩემპიონატზე მოხვდა, რომელსაც ევროპული ფეხბურთის სკაუტები ყველაზე ხშირად ადევნებენ თვალს.
21-წლამდელთა ევროპის ჩემპიონატი ის ტურნირია, სადაც თავის გამოჩენა კარიერული წინსვლის გარანტია და ახალგაზრდა ქართველ ფეხბურთელებს ამის კარგი შანსი აქვთ.
მზადება ევროპის ჩემპიონატისთვის და ტაქტიკური სქემა
1-კვირიანი ავსტრიული შეკრების შემდეგ, საქართველოს ნაკრებმა სლოვაკეთში გადაინაცვლა და მზადებას იქ განაგრძობს. სამწუხაროდ, ტრავმის გამო ნიკოლოზ უგრეხელიძე, საბა გოგლიჩიძე და ლუკა ლაცაბიძე გამოგვაკლდა და დაცვაში პრობლემებია, თუმცა რამაზ სვანაძის ფილოსოფია თავიდან ბოლომდე ისაა, რომ მთავარი გუნდურობაა და ყველა მოთამაშეს ნაკრებში დიდი როლი აქვს. რუმინეთთან ამხანაგური მატჩი დავთმეთ, სადაც ბევრი ხარვეზი გამოჩნდა.
ვინაიდან უკანა ხაზში პრობლემები შეიქმნა, შესაძლოა სვანაძე 3 მცველიან ტაქტიკაზე გადავიდეს და შედარებით მეორე ნომრად ითამაშოს, რაც გასაკვირი არ იქნება, ცენტრალური დაცვის ხაზში გიორგი მაისურაძე, საბა ხვადაგიანი და ირაკლი იაკობიძე მოიაზრებიან. ნახევარდაცვაში საკმაოდ დიდი კონკურენციაა - გაგნიძე, მამაგეიშვილი, ლომინაძე, სიგუა. საკვანძო იქნება ლაშა ოდიშარიას ფაქტორი, რომელიც შემტევია, თუმცა თავის გუნდში ფლანგის მცველადაც ათამაშებენ ხოლმე, ამის გამოცდილება აქვს და თუ საჭირო გახდა, სვანაძე ოდიშარიას უკნიდანაც გამოიყენებს. ბრწყინვალე ფორმაშია გიორგი აბუაშვილი, რომელიც ეროვნული ლიგის ამ სეზონში გამორჩეულია, იტალიაში წარმატებული მატჩები ჰქონდა გიორგი კვერნაძესაც. მოკლედ რომ ვთქვათ, ფეხბურთელებს სათამაშო პრაქტიკა საკმარისად აქვთ.
*(c) სფფ
"ურთულეს ჯგუფში ვართ, თუმცა ევროპის ჩემპიონატზე მარტივი მეტოქე არ არსებობს. შანსების შეფასებისგან თავს შევიკავებ. ჩვენი მთავარი მიზანი იქნება, რომ ყველა თამაშზე მოსაგებად გავიდეთ და ამ კუთხით ჩვენს მენტალურ მდგრადობას დიდი მნიშვნელობა ექნება.
ამ განვლილ გზაზე მთავარი ისაა, რომ ევროპის ჩემპიონატზე მონაწილეობას ზედიზედ მეორედ ვიღებთ, რაც უკვე დიდი წარმატებაა და ისტორიის ნაწილია"
შანსები ძლიერ მეტოქეებთან
უკვე ცნობილია ყველა იმ ნაკრების განაცხადი, ვინც ევროპის ჩემპიონატზე ითამაშებს. ჩვენს ჯგუფში პორტუგალია და საფრანგეთი ფავორიტები არიან, თუმცა როგორც წესი, ახალგაზრდულ ჩემპიონატზე გამოკვეთილი ფავორიტი არ არსებობს, ყველას ყველასთან მოგება შეუძლია და ეს არაერთხელ გამოჩნდა. ჩვენთვის სასიცოცხლოდ მნიშვნელოვანი პოლონეთთან პირველივე შეხვედრის მოგება იქნება, რითიც ჯგუფიდან გასვლის შანსებს გავიზრდით.
რეალურად, საფრანგეთი ჯგუფის კი არა ზოგადად ტურნირის ფავორიტია,. მათ პრემიერ ლიაში, ბუნდესლიგაში და სხვა დიდ ჩემპიონატში მოთამაშე ფეხბურთელები ჰყავთ, რასაც ვერ ვიტყვით პორტუგალიაზე, რომელთაც გამოკვეთილი ლიდერები არ ჰყავთ და თუ ჯგუფის ბოლო მატჩში მათთან მოგება დაგვჭირდა, შეუძლებელი არ იქნება.
*(c) სფფ
ფეხბურთელი, რომელსაც უნდა დავაკვირდეთ
ხარატიშვილი, მამაგეიშვილი, ლომინაძე, აზაროვი და სხვები ყველამ ვიცით და ისიც ვიცით, რომ მაღალ დონეზე თამაში და კარგ გუნდებში წასვლა შეუძლიათ, რაც დროის საკითხია, თუმცა ამ ტურნირზე, ე.წ. "Must Watch" მოთამაშე ვახო ბედოშვილია. 21 წლის ფეხბურთელი, რომელიც ცოტა ხნის წინ მე-4 ლიგაში ორბიში თამაშობდა, დღეს კი ეროვნულ ლიგაში გარეჯის მაისურით გამოდის, ბრწყინვალე მატჩებს ატარებს, რაც რამაზ სვანაძემ შეამჩნია და დააფასა.
ბედოშვილი გაფართოებულ სიაში იყო და შესაძლოა, საბოლოო განაცხადში არ მოხვედრილიყო, მაგრამ ვარჯიშებზე თავი ისე გამოიჩინა, რომ ახლა ნაკრების მნიშვნელოვან მოთამაშედ იქცა. რუმინეთთან ამხანაგურ მატჩში ერთ-ერთი, თუ ერთადერთი არა, ნათელი წერტილი სწორედ ის იყო. ფეთქებადობა, სისწრაფე, ტექნიკა, დარტყმა, საფეხბურთო სითავხედე - ეს ის თვისებებია, რაც ბედოშვილის არსენალშია და ამ თვისებებს ევროპის ჩემპიონატზე გამოიყენებს.
ყველაფერი დამოკიდებული იქნება იმაზე, თუ როგორ იქნება ნაკრები მზად იმ კონკრეტულ მომენტში. სლოვაკეთში ათასობით ქართველი გეგმავს საქართველოს ნაკრების მატჩებზე დასწრებას და კიდევ ერთი ისტორიის დაწერაში თავიანთი დიდი წვლილის შეტანას.
ევრო 2025 | მატჩების განრიგი
11 ივნისი | 23:00 საათი |პოლონეთი V საქართველო | ჟილინა
14 ივნისი |23:00 საათი|საფრანგეთი V საქართველო | ჟილინა
17 ივნისი |20:00 საათი|საქართველო V პორტუგალია | ტრენჩინი
*(c) სფფ
