ზუსტად ერთი წლის წინ, საქართველოს ნაკრები გერმანიაში გაემგზავრა და ევროპის ჩემპიონატზე პირველად ითამაშა, დანარჩენი უკვე ისტორიაა. ერთი წლის თავზე კი იგივეს საქართველოს 21-წლამდე ნაკრები იმეორებს და ახალგაზრდა ფეხბურთელები ქართული ფეხბურთის ისტორიის ახალი ფურცლის წერას 21-წლამდე ევროპის ჩემპიონატიდან იწყებენ.
ყველას ყურადღება სლოვაკეთის ქალაქ ჟილინასკენაა მიპყრობილი, სადაც საქართველოს ნაკრები დღეს პოლონელ თანატოლებს დაუპირისპირდება და აუცილებლად გამარჯვება გვჭირდება, რათა ჯგუფიდან გასვლის რეალური შანსი მოგვეცეს.
ნაკრები სლოვაკეთში 3 დღის წინ ჩამოვიდა, ქალაქ მარტინაში დაბინავდა, რომელიც ჟილინასგან 30 წუთის სავალზეა და საწვრთნელი ბაზაც ამ ქალაქში აქვთ.
საშუალება მოგვეცა ნაკრების მატჩისწინა ვარჯიშებს დავსწრებოდით. აღსანიშნავია, რომ რამაზ სვანაძეს დისციპლინა და ხარისხი უმაღლეს დონეზე ჰყავს აყვანილი. მთელი ვარჯიში ის აქტიურადაა ჩართული ყველა მომენტში და ფეხბურთელებთან უშუალო კომუნიკაციაში შედის, რაც გასაკვირი არაა, რადგან 21-წლამდელების ასეთი წარმატებული შედეგები, მეტწილად სვანაძის მიერ ფეხბურთელებისადმი სწორი მიდგომის დამსახურებაცაა.
ჟილინა პატარა და წყნარი ქალაქია, სადაც ტურისტული ზონაც ნაკლებია და ხალხმრავლობაც არაა. ქალაქის ქუჩებში ევროპის ჩემპიონატის რამდენიმე ბანერს შევხვდებით.
ჟილინას კლუბში 19 წლის ქართველი სანდრო ნარიმანიძე თამაშობს, რომელიც აქ იმყოფება და მასთან საუბრის საშუალება მოგვეცა. სანდრო პერსპექტიული, ნიჭიერი მცველია, რომელიც აქ 6 თვის წინ ჩამოვიდა, ადაპტაცია გაიარა, ითამაშა კიდეც და სლოვაკეთის უმაღლეს ლიგაში მე-2 ადგილი დაიკავა. ნარიმანიძის პროფესიონალიზმი და საქმისადმი მიდგომა, გვაძლევს იმის იმედს, რომ მისგან რამდენიმე წელიწადში კიდევ ერთი კარგი ქართველი ფეხბურთელი მივიღოთ. თუნდაც ის რად ღირს, რომ კლუბის ბაზაზე ცხოვრობს და მთლიანად ფეხბურთზეა ორიენტირებული. სანდრო ჩვენი ნაკრების მატჩებს დაესწრება.
21-წლამდელების მზადებაზე რომ გადავიდეთ, მატჩისწინა პრესკონფერენცია რამაზ სვანაძემ და ირაკლი აზაროვმა გამართეს. ორივე მათგანის მთავარი სათქმელი ის იყო, რო, ისინი წარმატების მიღწევას ერთობის და გუნდურობის ხარჯზე აპირებენ, რითიც აქამდე მოვიდნენ.
ვარჯიშის წინ, სვანაძემ გარშემო თავისი ფეხბურთელები შემოკრიბა, ერთი-ორი სიტყვა უთხრა, რის შემდეგაც მოთამაშეებმა გახურება დაიწყეს, შემდეგ იყო ე.წ. "რონდო" და ბოლოს ტაქტიკური ვარჯიში. სამწუხაროდ, ჩვენი ნაკრების ერთ-ერთ გამოცდილ მცველს საბა საზონოვს ფეხი აწუხებს და ვარჯიშის შემდეგ, ყინულებით დადიოდა. სავარაუდოდ, ის ბოლომდე სათამაშოდ მზად კვლავაც არ არის.
საქართველოს 21-წლამდე ნაკრებში კარგი განწყობაა, დღეს ჟილინაში ათასობით ქართველი გულშემატკივარიც ჩამოვა და ერთად შეეცდებიან მორიგი ისტორიის დაწერას.
11 ივნისი | 23:00 საათი |პოლონეთი V საქართველო | ჟილინა
