იყო ჩავარდნები, უგოლო სერია, კრიტიკა, მაგრამ საბოლოო ჯამში, ქართველმა და უცხოელმა გულშემატკივარმა ბოლო 2.5 წელიწადში იხილა 100 კვარაშოუ, რამაც საფეხბურთო ანალიტიკოსები და ლეგენდარული ფიგურები აალაპარაკა.
თუ 2 წლის კვარაცხელიას ყველა თამაში ზეიმი იყო და მის საყურებლად ხალხი ნეაპოლში სპეციალური რეისებით ჩადიოდა, დღეს კვარას მატჩები და გოლები უკვე ჩვეულებრივი მოვლენაა, რადგან ის უკვე შემდგარი ვარსკვლავია.
ყველაფერი 2022 წლის 1 ივლისს დაიწყო, როცა კვარაცხელია ნაპოლიმ 10 მილიონად იყიდა. აქედან იწყება ქართული ფეხბურთის ისტორიის წერა. 15 აგვისტოს, მან სერია ა-ს პირველივე მატჩში ვერონას გაუტანა და გვახსოვს, რამხელა ზეიმი იყო საქართველოში.
პირველი წარმატებული სეზონის შემდეგ, მეორე სეზონი ნაპოლის ჩაუვარდა, თუმცა ეს ქართველის სტატისტიკაზე არ ასახულა - გასულ სეზონში ხვიჩამ 11 გოლი გაიტანა და 6 საგოლე გადაცემა გააკეთა.
გასაკვირი არაა, რომ კვარაცხელიას შეძენით ევროპის ტოპ კლუბები დღემდე ინტერესდებიან და მისი ღირებულება 100 მილიონი ევროა. კონტეს ხელში კვარა კარგ ფორმაშია და წელსაც ნაპოლის ლიდერია.
შეიძლება 23 წლის შემტევს თამაში ჩაუვარდეს, ფორმაში არ იყოს, მაგრამ ფაქტი ისაა, რომ ის ქართული ფეხბურთის "ელჩია" და დღეს რომ ქართველი ფეხბურთელები კარგ გუნდებში ხვდებიან, ირიბად სწორედ კვარას დამსახურებაც არის.
კვარაცხელიამ ამ 100 მატჩში იმდენი შეძლო, რომ ნეაპოლელები უკვე თავიანთ ლეგენდად მიიჩნევენ, როგორც ჰამშიკი, ინსინიე, ლავეცი და სხვები არიან. კვარადონა, როგორც მას იტალიაში ეძახიან, ისტორიის წერას განაგრძობს და ამ ეტაპზე ჩატარებული 100 "კვარაშოუ" მხოლოდ დასაწყისია.
