დუბლი ლუქსემბურგის კარში, საფირმო ცეკვა მთელი საქართველოს თვალწინ, თავგანწირული თამაში ფინალში და დაპატიჟება საკუთარ სახლში - ბუდუ ზივზივაძე დღეს მთელი ქვეყნის ერთ-ერთი საყვარელი მოთამაშეა.
ზივზივაძის კარიერაში იყო ჩავარდნებიც, თუმცა ქვეყნისთვის ყველაზე მნიშვნელოვანი მატჩები უმაღლეს დონეზე ჩაატარა და ნაკრების წარმატებაში დიდი წვლილი შეიტანა.
"ჩემთვის ლუქსემბურგთან მატჩი საუკეთესო იყო სანაკრებო კარიერაში. დუბლი პირველად შევასრულე. გოლების გარდა, ბევრი ვიმუშავე და ბოლომდე ვიბრძოლე, რომ სასურველი შედეგისთვის მიგვეღწია, ფინალში კი ერთი გუნდი ვიყავით, ერთმუშტად შევიკარით და ამან მოგვიტანა წარმატება."
- გამარჯვების შემდგომი ემოციები
- ყველაფერი სტადიონიდან დაიწყო, სადაც ყველა შემოვიდა და ერთად აღვნიშნავდით, შემდეგ რესპუბლიკის მოედანზე გადავინაცვლეთ, სადაც ასევე ბევრი ხალხი იყო, ჩაირთო მუსიკა და ვცეკვავდით. გავიხედე-გამოვიხედე და სცენაზე აღარავინ იყო, მარტო დავრჩი, გადავწყვიტე მარტო მეცეკვა და ხალხისთვის ის ემოცია გამეზიარებინა, რაც იმ მომენტში მქონდა. ზოგადად, ემოციური ადამიანი არ ვარ, თუმცა ეს ის მომენტი იყო, როცა ბოლომდე უნდა დავცლილიყავი. ის სიმღერა უკვე ჩემთან ასოცირდება და ყველას მე ვახსენდები ხოლმე.
- ამ წარმატებამდე იყო ჩავარდნები, წაგებული მატჩები და კრიტიკა. რამდენად რთული იყო ამ ყველაფრის გადალახვა და კრიტიკიდან რამდენიმე თვეში, ისტორიული წარმატების მიღწევა?
- დიახ, ყველას გვახსოვს ესპანეთთან მატჩი და 7:1 წაგება, რაც ჩვენთვის დიდი დარტყმა იყო, მაგრამ ამის შემდეგ, ყველამ საკუთარ თავში ჩავიხედეთ, მომდევნო მატჩები ერთა ლიგისთვის მოსამზადებლად გამოვიყენეთ, საქმეს დიდი პასუხისმგებლობით მოვეკიდეთ და გავითავისეთ, თუ რა მნიშვნელობის თამაშები გველოდა წინ. ბევრი ვიშრომეთ და როცა შრომობ, აუცილებლად დაგიფასდება.
- მზადება ევროპის ჩემპიონატისთვის
- როცა იცი, რომ 2 თვეში ასეთი დიდი ტურნირი გაქვს სათამაშო, უფრო მეტად თავდაჯერებული ხარ, რაც შედეგებზეც აისახება - ტური არ გავა, რომ ქართველმა ფეხბურთელებმა კლუბებში კარგი მატჩები არ ჩაატარონ. იქ ტურისტებად ჩასვლას არ ვაპირებთ, გერმანია ისედაც საკმარისად კარგად დავათვალიერე. გასაგებია, რომ ჩვენი მეტოქეები უფრო გამოცდილები არიან, თუმცა ვფიქრობ, ისეთი დონის ფეხბურთელები გვყავს, რომ მინიმუმ, მესამე ადგილით გასვლა შეგვიძლია.
მოგეხსენებათ, ზივზივაძე გერმანულ კარლსრუეში თამაშობს, ევროპის ჩემპიონატიც გერმანიაშია და ბუდუმ ხუმრობით ქართველებს მიმართა, ვისაც დასარჩენი არ გექნებათ, ჩემთან სახლში დაგიტოვებთო.
"ჩემს ამ ხუმრობას ბევრმა ხუმრობით უპასუხა, ბევრმაც სერიოზულად მომწერა, რომ შენთან დავრჩებიო. არ მინდა, ყველაფერი გავასაჯაროვო, მაგრამ ისეთებს მწერდნენ, პირი ღია დამრჩა. სადაც ნაკრების თამაშებია, იქიდან ჩემი სახლი 500-600 კილომეტრის მოშორებითაა. ამიტომ ჩემთან კი დარჩებიან, მაგრამ ტრანსპორტირების მოგვარება მოუწევთ (იცინის).
- პირველი ზარი ოჯახში ისტორიული წარმატების შემდეგ
- როცა ხელში ტელეფონი ავიღე, უამრავი მილოცვა იყო, პირველი ჩემს მეუღლეს ვესაუბრე და ვუთხარი, არ მჯერა რაც ახლა ხდება-მეთქი. იმ დღეს იმდენი ვიცეკვე და ემოციებისგან ისე დავიცალე, რომ მეორე დღემდე ტელეფონი ხელში არ ამიღია. ბოლო პერიოდში, სოციალურ ქსელებში ჩემი შვილის ვიდეოები ხშირად მხვდება, რაც დიდად არ მომწონს. ჩემს პირად გვერდზე ვდებ, რადგან ჩემია და ასე საჯაროდ დაუკითხავად გამოქვეყნება, არ არის სასიამოვნო.
- შენი თამაშის ერთ-ერთი ყველაზე დასამახსვორებელი ეპიზოდი ის იყო, როცა ორთაბრძოლაში თავით წახვედი და თავგანწირვით ითამაშე...
- ბერძენ ფეხბურთელთან ბურთის მოსაპოვებლად ვიბრძოდი, ორივე ძირს აღმოვჩნდით და დავინახე, რომ შენგელია ჩემკენ მოდიოდა. სხვა გზა არ მქონდა, თავით უნდა წავსულიყავი და ვიფიქრე, შენგელიას ბურთს ასე დავუტოვებ-მეთქი. ყოველთვის ვამბობდი, რომ საქართველოს ნაკრებისთვის თავს არ დავზოგავდი. ეს მომენტი ამ ყველაფრის ნათელი მაგალითია.
- შენი აზრით, ამ ისტორიული წარმატების შემდეგ,რა შეიცვლება ქართულ ფეხბურთში უკეთესობისკენ?
- რაც ყველაზე მთავარია, ბავშვებს გაუჩნდათ სურვილი, რომ ფეხბურთზე იარონ და კიდევ უფრო მეტი აკადემია უნდა გაიხსნას, რათა მათ თამაშის საშუალება ჰქონდეთ. როცა კვარაცხელიამ მსოფლიოს მაშტაბით გაიბრწყინა, ბავშვები ფეხბურთს მის გამო თამაშობდნენ, ახლა ამას ევროპის ჩემპიონატზე გასვლაც დაემატა. კარგი იქნება, თუ საკლუბო ფეხბურთიც განვითარდება. ბიზნესმენებს ვთხოვ და მოვუწოდებ, რომ ქართულ კლუბებში თანხა ჩადონ. სწორი მიდგომებით კი ევროტურნირებზე გავლენ და მათი გუნდი წარმატებული იქნება. ფეხბურთი ყველაზე ცნობადი და ყურებადი სპორტია მსოფლიოში და ამაზე უკეთეს სპონსორობას ბიზნესმენები ვერაფერს გაუწევენ.
- ასეთი წარამტებული მატჩების შემდეგ, შენ მიმართ მოთხოვნა გაიზრდება, არის თუ არა სხვა კლუბებისგან დაინტერესება?
- ბევრ ჭორს ვკითხულობ, რომ ჩემი შეძენა თურქულ ტრაბზონსპორს და ბუნდესლიგის გუნდებს სურთ, თუმცა ჩემამდე ეს ინფორმაცია არ მოსულა. კარლსრუესთან კონტრაქტი კიდევ ერთი წელი გრძელდება და ამ გუნდზე ვარ კონცეტრირებული. რა თქმა უნდა, ჩემი მიზანია ევროპის ჩემპიონატზე თავი კარგად წარმოვაჩინო და კარიერულადაც წინ წავიდე.
როგორც ზემოთ აღვნიშნეთ, ზივზივაძის კარიერაში ბევრი ჩავარდნა იყო, ამის მიუხედავად, ის დღეს საქართველოს ერთ-ერთი გამორჩეული ფეხბურთელია. კარიერის საწყის ეტაპზე ბუდუ ისეთ სიტუაციაში აღმოჩნდა, რომ ფეხბურთიდან წასვლაზე ფიქრობდა.
- სამტრედიაში გატარებული პერიოდი ჩემთვის ძალიან მნიშვნელოვანი იყო, რადგან სამტრედია რომ არა, დღეს სადაც ვარ, იქ არ ვიქნებოდი. უკლუბოდ ვიყავი, ჩემით არავინ ინტერესდებოდა და კარიერის დასრულებაზეც ვფიქრობდი, თუმცა სამტრედიიდან დამირეკეს და გუნდში მისვლა შემომთავაზეც, რასაც სიამოვნებით დავთანხმდი. ჩემი კარიერის აღმასვლა ამ გუნდს უკავშირდება და მთელი ცხოვრება სამტრედიის მადლიერი ვიქნები. ერთადერთი ჩემპიონობაც სამტრედიასთან ერთად მოვიპოვე და ეს ტიტული ჩემს კარიერაში ძალიან მნიშვნელოვანია.
- გამორჩეული მომენტები კარიერიდან და კომფორტული თანაგუნდელი
- როგორც გითხარით, გამორჩეული მატჩი ლუქსემბურგთან მქონდა, ყველაზე კომფორტული თანაგუნდელი, ვისთან ერთადაც მითამაშია გიორგი ბერიძეა, რადგან უნგრეთში ერთმანეთთან კარგად ვიყავით შეწყობილი - ან მე ვიტანდი მისი გადაცემით, ან პირიქით. ბერიძესთან მოედნის გარეთაც კარგი ურთიერთობა ჩამომიყალიბდა.
- როგორია ბუდუ ზივზივაძის ცხოვრება ფეხბურთს მიღმა?
- ბოლო 3 წელია, ჩემი ერთადერთი საზრუნავი ბავშვია. ვარჯიშის შემდეგ მოვდივარ და სულ მასთან ერთად ვარ. მოუსვენარია და სულ თამაში უნდა. თავისუფალ დროს, ოჯახთან ერთად გერმანიის სხვადასხვა ქალაქებს ვათვალიერებ, ასევე ქართველები გავიცანი და დროს მათთან ერთადაც ვატარებ ხოლმე. ცურვა მიყვარს და ჩოგბურთის ყურება. ჩემი საყვარელი ჩოგბურთელი დომინიკ ტიმი იყო, მაგრამ ახლა ჩავარდნა აქვს და ნოვაკ ჯოკოვიჩს გამოვარჩევდი.
- საფეხბურთო კუმირი
- ფეხბურთი რონალდინიომ შემაყვარა. მოედანზე საოცრებებს აკეთებდა. ბარსელონაც მან შემაყვარა. დღემდე ბარსელონას გულშემატკივარი ვარ, თუმცა ახლა წყალწაღებულები ვართ (იცინის). რონალდინიოს წასვლის შემდეგ, ინიესტას თამაში მხიბლავდა. ფორვარდებს რაც შეეხება, ბოლო წლებში ჰარი კეინს გამოვარჩევდი, რომელიც ჩემთვის ნომერ პირველი ფორვარდია.
- შენს კარიერაში იყო დაღმასვლაც და აღმასვლაც, ბევრ კომპონენტში განვითარდი და დაიხვეწე. რომელ საფეხბურთო კომპონენტში გაქვს კიდევ მოსამატებელი?
- თავით თამაშში. რაც არ უნდა გასაკვირი იყო, კარიერაში თავით ბევრი გოლი გატანილი არ მაქვს, ასევე ორთაბრძოლებში მაქვს დაბალი სტატისტიკური მაჩვენებელი და ამაზეც სამუშაოა.
- რას ჰპირდები ქართველ გულშემატკივარს, რომელიც თქვენგან წარმატებას ელის ევროპის ჩემპიონატზეც?
- ქართველ გულშემატკივარს ბრძოლას და თავდადებას ვპირდები. როგორც იმ ორ თამაშში გავერთიანდით, ისე უნდა გავერთიანდეთ ამ ევროპის ჩემპიონატზე. ერთად ყველაფრის გაკეთება შეგვიძლია და ზღაპრის ბოლო კეთილია!
"ცხოვრებაში ბევრი შეცდომა დავუშვი, რასაც ძალიან ვნანობ...", - თორნიკე ოქრიაშვილის გულახდილი ინტერვიუ
