საქართველო-უელსი 5:0, ევრო 1996-ის შესარჩევი (16.11.1994)
ეს იყო საქართველოს პირველი დასამახსოვრებელი გამარჯვება თავისი დამოუკიდებლობის ისტორიაში. ამ მოგებით, ჩვენზე, როგორც ახალ მოვლენაზე, ალაპარაკდა საფეხბურთო ევროპა და ცხადია, ყველას ლეგენდარული თბილისის დინამოც გაახსენდა. ჩვენმა ნაკრებმა უელსი გაანადგურა შოთა არველაძის, გოჩა გოგრიჭიანის, თემურ ქეცბაიასა (დუბლი) და გიორგი ქინქლაძის გოლებით.
საქართველო-ბულგარეთი 2:1, ევრო 1996-ის შესარჩევი (11.10.1995)
ბულგარეთი იმ დროს ევროპის ერთ-ერთ უძლიერეს ნაკრებად მიიჩნეოდა. ერთი წლით ადრე, ამ ქვეყნის ეროვნულმა გუნდმა ამერიკის შეერთებულ შტატებში გამართულ მუნდიალზე მე-4 პოზიცია დაიკავა. 1995 წელს სლავების კარი აიღეს შოთა არველაძემ და გიორგი ქინქლაძემ, ხრისტო სტოიჩკოვის დაგვიანებულმა გოლმა კი სტუმრებს ვერ უშველა.
საქართველო-რუსეთი 1:0, ევრო 2004-ის შესარჩევი (30.04.2003)
მართალია, რუსეთი არასდროს ყოფილა სიძლიერის მხრივ ევროპაში გამორჩეული ნაკრები, თუმცა ის, თუ რატომ არის ეს გამარჯვება განსაკუთრებული, ახსნას არ საჭიროებს. ალბათ, ეს იყო ერთ-ერთი ყველაზე ემოციური მომენტი დამოუკიდებელი ქართული ფეხბურთის ისტორიაში, მალხაზ ასათიანის ზუსტი თავური, რომელიც ეროვნული ზეიმის ტოლფასი გამოდგა.
საქართველო-ურუგვაი 2:0, ამხანაგური მატჩი (15.11.2006)
დიახ, ეს შეხვედრა ამხანაგური ხასიათის იყო, თუმცა მსოფლიოს ორგზის ჩემპიონთან მოპოვებული გამარჯვება ნამდვილად დასამახსოვრებელია. ურუგვაის რიგებში თამაშობდნენ დიეგო ფორლანი, მის გვერდით კი ეროვნული გუნდის მომავალი ლეგენდა, დიეგო გოდინიც. რაც შეეხება გოლებს, ამ შეხვედრაზე ლევან კობიაშვილმა დუბლი გაიფორმა.
საქართველო-შოტლანდია 2:0, ევრო 2008-ის შესარჩევი (17.10.2007)
გამარჯვება 55.500 გულშემატკივრის წინაშე. შოტლანდიასთან სტუმრად გამარჯვებამდე ცოტა დაგვაკლდა, სახლში კი საქართველომ თავისი ქომაგები ნამდვილად გაახარა. "ლურჯების" კარი აიღეს ლევან მჭედლიძემ და დავით სირაძემ. მოედანზე ასევე იყო ლევან ყენიაც, რომელიც დიდ ფეხბურთში პირველ ნაბიჯებს დგამდა.
საქართველო-ხორვატია 1:0, ევრო 2012-ის შესარჩევი (26.03.2011)
ხორვატია ფავორიტად მიიჩნეოდა და ევროპის ჩემპიონატის საკვალიფიკაციო ეტაპის დასრულების შემდეგ, კონტინენტის პირველობაზეც მოხვდა. ბალკანელების შემადგენლობაში იყვნენ ლუკა მოდრიჩი და ივან რაკიტიჩი, შეცვლაზე ივან პერიშიჩიც შემოვიდა. ყველაფერი გადაწყვიტა ლევან კობიაშვილის 90-ე წუთზე ზუსტად შესრულებულმა დარტყმამ, რომლის შემდეგაც, დინამო არენა სიხარულისგან კინაღამ დაინგრა.
საქართველო-ესპანეთი 1:0, ამხანაგური მატჩი (07.06.2016)
ვარსკვლავებით სავსე 2010 წლის მსოფლიო ჩემპიონთან გამარჯვება. ესპანეთის სასტარტოში იყვნენ სერხიო რამოსი, ხერარდ პიკე, სერხიო ბუსკეტსი, სესკ ფაბრეგასი და სხვები. "ფურია როხას" კარი ჯაბა ჯიღაურის ასისტის შემდეგ, თორნიკე ოქრიაშვილმა აიღო. დიახ, ამხანაგური მატჩია, მაგრამ მაინც გამორჩეული.
საქართველო-შვედეთი 2:0, 2022 წლის მუნდიალის შესარჩევი (11.11.2021)
საქართველოს მიერ დამარცხებული კიდევ ერთი გოლიათი. შვედეთის რიგებიდან ლეგენდარულმა ზლატან იბრაჰიმოვიჩმაც კი ვერაფერი მოახერხა. ჩვენებს კი ნამდვილად წაუვიდათ თამაში, განსაკუთრებით ხვიჩა კვარაცხელიას, რომელმაც სკანდინავიელებს დუბლი შეუსრულა. უდაოდ, ბოლო წლების ერთ-ერთი გამორჩეული მოგება იყო.
საქართველო-ლუქსემბურგი 2:0, ერთა ლიგის 1/2 ფინალი (21.03.2024)
ისტორიული გამარჯვება, რომლის შემდეგაც ევროპის ჩემპიონატზე გასვლამდე ერთი ნაბიჯი რჩებოდა. საქართველოს ნაკრების მხრებზე უდიდესი ზეწოლა იყო, რომელსაც ჩვენმა ბიჭებმა წარმატებით გაუძლეს. ბუდუ ზივზივაძის დუბლი და ჩვენი ნაკრები ფინალშია! რა მოხდა ამის შემდეგ? - ეს უკვე ისტორიაა...
საქართველო-საბერძნეთი 0:0 (პენ 4:2), ერთა ლიგის ფინალი (2603.2024)
გამარჯვება, რომლის გახსენება არასდროს მოგვბეზრდება. საბერძნეთი ფავორიტად მიიჩნეოდა და მათ მხარეს იყო ურთიერთშეხვედრების სტატისტიკაც, მაგრამ საქართველოს ეროვნულმა გუნდმა თავისი ისტორია მაინც დაწერა. უგოლო 120 წუთი, შემდეგ კი 11-მეტრიანების სერია, რომელშიც ევრო 2024-ის საგზური მოვიპოვეთ.
აგრეთვე გამოსარჩევია - უელსი-საქართველო 0:1 (1995 წ.), საქართველო-პოლონეთი 3:0 (1997 წ.), საქართველო-უნგრეთი 3:1 (2001 წ.), საქართველო-თურქეთი 1:0 (2007 წ.), უელსი-საქართველო 1:2 (2008 წ.), საქართველო-შოტლანდია 1:0 (2015 წ.), რუმინეთი-საქართველო 1:2 (2021 წ.), ბულგარეთი-საქართველო 2:5 (2022 წ.), ჩრდილოეთ მაკედონია-საქართველო 0:3 (2022 წ.), საქართველო-ჩრდილოეთ მაკედონია 2:0 (2022 წ.)
