პირველ შეხვედრაში საქართველოს ნაკრებმა დანიასთან სტუმრად 75:69 წააგო, სერბეთმა საკუთარ მოედანზე 77:61 დაამარცხა ფინეთი და ჯგუფის ლიდერია.
ჩვენ გუნდს ალექსანდრე მამუკელაშვილი და გოგა ბითაძე ვერ ეხმარებიან, ისევე როგორც NBA-ის ყველა ევროპელი მოთამაშე თავის ნაკრებს. ტრავმების გამო ვერ თამაშობენ რატი ანდრონიკაშვილი და დუდა სანაძე.
სერბეთთან მატჩით სანაკრებო კარიერას დაასრულებს გიორგი ცინცაძე. ქართველი უკანახაზელი 20 წელია თამაშობს ეროვნულ ნაკრებში. გიორგი ცინცაძე გუნდურ სახეობებში ჩატარებული თამაშებით, საქართველოს აბსოლუტური რეკორდსმენია. სერბეთთან შეხვედრა ცინცაძისთვის 217-ე იქნება და გულშემატკივარი გიორგის ნაკრებიდან გააცილებს.
დღეს სერბეთთან მატჩამდე, საქართველოს ნაკრებმა „თბილისი არენაზე“ ივარჯიშა, რის შემდეგაც ეროვნული ნაკრების კალათბურთელებმა მეტოქის შესახებ ისაუბრეს:
გიორგი ცინცაძე: საპასუხისმგებლო თამაშია, იმედია მაქვს და მჯერა ჩვენ გუნდს შესწევს ძალა დასანანი მარცხის შემდეგ, გამარჯვება მოვიპოვოთ, რაშიც გულშემატკივარი დაგვეხმარება. სერბეთი ძლიერი გუნდია, კარგი კალათბურთელები ჰყავთ, სახლში თამაში ჩვენი პლიუსია, ამ დარბაზში ხშირად დაგვიმტკიცებია, რომ ყველა მეტოქესთან შეგვიძლია თანაბრად თამაში და გამარჯვება. რაც შეეხება ჩემს სანაკრებო კარიერას, მოვიდა დრო ნაკრებს დავემშვიდობო, წარმატებები ჩვენს ნაკრებს, მოვიდა დრო გულშემატკივართა რიგებში გადავინაცვლო.
გიორგი ოჩხიკიძე: სერბეთის ნაკრები კალათბურთში საუკეთესოებს შორისაა, შარშან მსოფლიოს ჩემპიონატის ფინალშიც ითამაშეს, ძალაინ დაძაბულ თამაშს ველოდებით, ძალიან მაღალი დონის მოთამაშეები ყავთ. ჩვენ ვეცდებით მწვრთნელის დავალებები მაქსიმალურად შევასრულოთ და გულშემატკივარი გავახაროთ.
ჯოზეფ ტომასონი: რა თმა უნდა, რთული თმაში იქნება, სერბეთი ძლიერი გუნდია. გვინდა კარგად ვითამაშოთ და ხალხი გავახაროთ. ვფიქრობ დანიასთან კარგად ვითამაშე, თუმცა მეტი შემიძლია. ხვალ გიორგი ცინცაძე სანაკრებო კარიერას ასრულებს, არ მინდა წაგებული წავიდეს, გვინდა განსაკუთრებული დღე გამოვიდეს, გავალთ და ვიომებთ, გვინდა ქართველმა ხალხმა გაიხაროს და გიორგი გამარჯვებით გავაცილოთ ნაკრებიდან.
საქართველოს ნაკრები ჯგუფში დანიის, ფინეთისა და სერბეთის ნაკრებებთან ერთად ასპარეზობს. ფინეთი ევრობასკეტის ერთ-ერთი მასპინძელი ქვეყანაა, შესაბამისად, ევროპის ჩემპიონატის საგზური უკვე აქვს. G ჯგუფიდან ფინეთთან ერთად ორი საუკეთესო ნაკრები მოხვდება ევრობასკეტზე. სერბეთი ჯგუფის ფავორიტია, შესაბამისად, საქართველოს მთავარი კონკურენტი სწორედ დანიის ნაკრებია.
საქართველოსა და სერბეთის ნაკრებების მატჩი „თბილისი არენაზე" 26 თებერვალს 21:00 საათზე დაიწყება.
