კონცეტრაცია, ბრძოლა, ხარისხი, თავდაჯერება, კლასი, დისციპლინა - ეს ის კომპონენტებია, რაც თანამედროვე ფეხბურთში მაღალი დონის გუნდებს უნდა ჰქონდეთ. საქართველოს ნაკრებმა ალბანეთთან ყველა ზემოთ ჩამოთვლილი კრიტერიული დააკმაყოფილა.
ალბანელი გულშემატკივრები რამდენიმე დღის განმავლობაში იმუქრებოდნენ, ჩამოდით და ჯოჯოხეთს დაგახვედრებთო. ჩვენმა ფეხბურთელებმა ეს ჯოჯოხეთი სამოთხედ აქციეს.
უნდა ვაღიაროთ, ნეიტრალური გულშემატკივრისთვის გუშინდელ მატჩში შექმნილი ატმოსფერო მართლაც საოცარი იყო. ალბანელები 90 წუთი არ გაჩერებულან და მათი ყოველი შეტევის დროს სტადიონი ინგრეოდა. სტადიონზე შექმნილი გარემო ერთ კარგ ოპერას ჰგავდა, სადაც საქართველოს ნაკრები გასვლით გასტროლებზე იყო, სოლისტად კი გიორგი ქოჩორაშვილი მოგვევლინა.
აუცილებლად უნდა აღვნიშნოთ ასობით ქართველი გულშემატკივარი, რომლებიც ტირანაში სპეციალურად საქართველოდან ჩამოვიდნენ, ტრადიციული მატჩისწინა მსვლელობა მოაწყვეს და მთელი თამაში ჩვენს ნაკრებს ამხნევებდნენ.
საქართველოს ჰიმნის დროს, ალბანელი გულშემატკივრები უსტვენდნენ, ქოჩორამ რომ გოლი გაიტანა, ბოთლებს ისროდნენ, მატჩის შემდეგ სხვადასხვა ნივთები ქართველ ფანებს დაუშინეს. საბოლოოდ სიტუაცია პოლიციამ გაანეიტრალა.
მატჩის დაწყებიდანვე ჩანდა, რომ ხვიჩა კვარაცხელია ფეხს იტკიებდა, ერთი-ორჯერ ექიმების ჩართვაც გახდა საჭირო. მიუხედავად ამისა, ხვიჩამ 75 წუთი ითამაშა. გოლი რომ გავიტანეთ, კვარაც მოედანზე იყო. მატჩის შემდეგ, მან ჩვენთან ინტერვიუში აღნიშნა, რომ ტკივილგამაყუჩებლით თამაშობდა, ავტობუსში კი კოჭლობით ავიდა.
ემოციური იყო გურამ კაშიას მატჩისშემდგომი კომენტარიც. კაშიას თქმით, ის ამაყია, რომ ამ ფორმაციის ნაკრებში თამაშობს და ამ ნაკრების კაპიტანია.
მატჩის დასრულებისთანავე, ფეხბურთელები სასტუმროში დაბრუნდნენ, დაისვენეს და დღეს ფრენა სხვადასხვა მიმართულებით აქვთ. ზოგი ესპანეთში წავა, ზოგი იტალიაში, ზოგი კი სულ სხვა კონტინენტზე, კლუბებში დაბრუნდებიან და შეეცდებიან, ყოველ შაბათ-კვირას ქართველი ხალხი გოლებითა და კარგი თამაშით უკვე იქიდან გაახარონ.
