ჩრდილოეთ მაკედონიასთან მარცხზე...
- მახსოვს ის იმედგაცრუება, რაც ჩრდილოეთ მაკედონიასთან მარცხის შემდეგ განვიცადეთ. ეს იყო მარცხი, რომელმაც ყველაზე ცუდად იმოქმედა, როგორც მოთამაშეებზე, ისე ქვეყანაზეც. ხალხმა სიხარული დაკარგა ერთი წაგებული მატჩის შემდეგ. ძალიან დიდი შანსი გვქონდა, სახლში ვთამაშობდით და უნდა მოგვეგო, თუმცა ჩვენ ეს ვერ შევძელით. ამ მატჩისთვის კარგად მომზადებაში ხელი კოვიდ პანდემიამაც შეგვიშალა.
საბერძნეთთან გამარჯვებაზე:
- ერთდროულად დაბნეულები და ბედნიერები ვიყავით. სტადიონზე დიდი ზეიმი იყო... გასახდელში კი სრული სიგიჟე ხდებოდა. ჩემი ტელეფონი არ ჩერდებოდა, დიდი ქაოსი იყო. ტელეფონი გასახდელში დავტოვე და ქალაქის ქუჩებში გამოვედით - ეს იყო დაუვიწყარი მომენტი, ხალხი ერთად აღნიშნავდა ამ დიდ გამარჯვებას, ყველა სვამდა, ცეკვავდა და მღეროდა. ტელეფონი გასახდელში დავტოვე, შესაბამისად, არც ერთი ვიდეო არ შემომრჩა იმ დღიდან, თუმცა მოგონებები ცხოვრების ბოლომდე გამყვება.
ჩვენ ვიმსახურებთ ევროპის ჩემპიონატზე ყოფნას და ბედნიერი ვარ, რომ ეს მოხდა. ღირსეული და ანგარიშგასაწევი გუნდი გვყავს, შეგვიძლია ყველას გაოცება.
ხვიჩა კვარაცხელიაზე:
- ის ერთი ძალიან კარგი და ჩვეულებრივი ბიჭია. ხვიჩა ახლა სუპერვარსკვალვია, მაგრამ ის უბრალოება რაც მასში იყო, არ დაკარგულა. როდესაც სასტუმროდან ავტობუსისკენ მივდივართ, ის გულშემატკივართან ჩერდება, ფოტოებს იღებს და ხელმოწერებს არიგებს.
მოედანზე ლიდერობის გარდა, ხვიჩა ხშირად საუბრობს გასახდელშიც. მას ძლიერი მენტალიტეტი აქვს და მის თაობას ჩვენზე ბევრად მეტი რწმენა აქვს. გასახდელში ასეთი ლიდერები გვჭირდება.
ვილი სანიოლსა და მის პროფესიონალიზმზე:
- როცა საბერძნეთთან შეხვედრაში მოედანზე გამოვედით, ვიცოდით, რომ მთელი ქვეყანა ჩვენს იმედზე იყო. ჩვენ რომ წაგვეგო, რას იტყოდნენ? - რა თქმა უნდა, გაგვაკრიტიკებდნენ, თუმცა, ვილი დაგვეხმარა ამ ზეწოლის მოხსნაში და მეტი თავისუფლება მოგვცა. ის კარგად იაზრებდა, თუ რა მნიშვნელობის თამაში იყო და სწორად მიუდგა ყველა ფეხბურთელს. აქ გამოჩნდა, თუ როგორ პროფესიონალთან გვქონდა საქმე.
