მოგეხსენებათ, საქართველოს ნაკრებმა ერთა ლიგის ნახეავრფინალში ლუქსემბურგს 2:0 მოუგო, საბერძნეთთან ფრე ითამაშა და პენალტების სერიაში გაიმარჯვა.
მამარდაშვილის პროგრესი აშკარაა და გასაკვირი არაა, რომ მისი შეძენით უკვე ტოპ გუნდები ინტერესდებიან. ის, რომ მამარდაშვილი დღეს ამ დონეზეა, უდიდესი შრომის დამსახურებაა.
მოგეხსენებათ, თავის დროზე, ახალგაზრდა მეკარე ვალენსიაში ლოკომოტივიდან მივიდა მეოთხე მეკარედ, თუმცა იმდენი ქნა, რომ ამჟამად "ღამურების" შეუცვლელი წევრია. შეიძლება ითქვას, მამარდაშვილი მსოფლიოში ერთ-ერთი გამორჩეულია თავის პოზიციაზე და შემდგარი მეკარეა.
გთავაზობთ 3 კომპონენტს, რაშიც მამარდაშვილმა უდიდესი პროგრესი განიცადა.
დამაჯერებელი თამაში
2 წლის წინ, სევილიასთან მატჩში მამარდაშვილმა 3 ისეთი უხეში შეცდომა დაუშვა, ძირითადი შემადგენლობიდანაც ამოაგდეს. რამდენიმე მატჩის გამოტოვების შემდეგ, მამარდა ვალენსიას ძირითად შემადგენლობას დაუბრუნდა და იმის შემდეგ სტაბილურად იცავს გუნდის კარს. ის შეცდომები კი რაც სევილიასთან დაუშვა, გამოსწორებული აქვს. იგულისხმება გამოსვლებზე სწორად თამაში, ბურთის მყარად დაფიქსირება და ფეხით თამაში, რაც დღეს მეკარისთვის უმნიშვნელოვანესი კომპონენტია.
კომუნიკაცია ფეხბურთელებთან და გუნდის ლიდერობა
დღესდღეობით, ფეხით თამაშის გარდა, მეკარისთვის უმნიშვნელოვანესია სწორი კომუნიკაცია გუნდთან. ამბობენ, რომ მსოფლიოში ყველა მეკარე "გიჟია", მაგრამ მამარდაშვილი ბავშვობიდანვე დინჯი და წყნარი იყო, რაც მეკარისთვის შეუფერებელია. ბოლო პერიოდში, მამადაშვილმა ეს "სიგიჟე" გამოავლინა, ესპანური ისწავლა. ახლა გუნდის ლიდერი და მოტივატორია, როგორც კლუბში, ისე ნაკრებში. ამის მაგალითად, შეგვიძლია გასულ სეზონში მომხდარი სკანდალური ეპიზოდი გავიხსენოთ, როცა თავისი თანაგუნდელის დასაცავად, მამარდაშვილი მსოფლიოს ერთ-ერთ გამორჩეულ ფეხბურთელს ვინისიუსს მივარდა.
პენალტების მოგერიება
2022 წლის 23 აპრილს, ესპანეთის სუპერთასის ფინალში ბეტისმა ვალენსია პენალტების სერიაში დაამარცხა. მამარდაშვილი 2 პენალტის აღებასთან ძალიან ახლოს იყო, მაგრამ იღბალმა უმტყუნა, ქართველი მეკარე ამის შემდეგაც ვერ გამოირჩეოდა თერთმეტმეტრიანების მოგერიებით. ევროპის ახალგაზრდულ ჩემპიონატზე ისრაელთანაც პენალტების სერიაში წავაგეთ. მამარდაშვილი ამ კომპონენტის გაუმჯობესებაზე იმაზე მეტს ვარჯიშობდა, ვიდრე საჭირო იყო. ყოველი ვარჯიშის შემდეგ, პენალტების მოგერიების დახვეწაზე მუშაობდა და შედეგად, მარტში მან პენალტი ჯერ ლა ლიგის მატჩში მოიგერია, შემდეგ კი საქართველო-საბერძნეთის მატჩში გმირად იქცა და ქვეყანას ისტოიული წარმატება მოუტანა.
