ქართველ ცენტრალურ მცველს აქამდე არასდროს უთამაშია ჩემპიონთა ლიგაზე, თუმცა ფინალურ ეტაპთან ახლოს ის არაერთხელ ყოფილა. შეგახსენებთ, რომ სლოვანის უკანახაზელი არის 37 წლის, ამ ასაკში მოთამაშეთა უმეტესობა ბუცებს ლურსმანზე კიდებს ან მხოლოდ მშვიდ პენსიაზე ფიქრობს, მაგრამ ჩვენი სტატიის გმირისთვის კარიერის მთავარი მომენტები სწორედ ახლა დადგა.
ბრატისლაველთა მეოთხე ნომერი საქართველოს ნაკრებში თამაშობს 2009 წლიდან და დიდ საერთაშორისო ტურნირზე მოსახვედრად ის 15 წლის განმავლობაში იბრძოდა. 37 წლის უკანახაზელზე მეტი მატჩი (117) "ჯვაროსნების" რიგებში არავის აქვს ჩატარებული. ერთი სიტყვით, ვეტერანმა ცენტრბექმა "თეთრ-წითლებთან" ერთად ყველაფერი გამოიარა.
ისტორიული მომენტი დადგა 2024 წელს - ჩვენი ნაკრები თავის ისტორიაში პირველად გავიდა ევროპის ჩემპიონატზე და ამ ყველაფრის უმნიშვნელოვანესი ნაწილი იყო კაშია, თანაც კაპიტნის ამპლუაში. ვეტერანმა უკანახაზელმა ითამაშა 4/4 მატჩი და მოედანზე ერთ-ერთი საუკეთესო იყო. მისი პასების სიზუსტე 83%-ს უდრიდა.
წინ ერთა ლიგის გათამაშებაა და ქართველი ცენტრალური მცველი კვლავ ვილი სანიოლის განკარგულებაში იქნება. ევროპის ჩემპიონატზე გასვლის შემდეგ, საქართველოს ეროვნული გუნდის შემდეგი მიზანი არის მუნდიალზე თამაში და ცხადია, გურამი ტრადიციულად მაქსიმუმს გაიღებს.
ევროპის ჩემპიონატის დასრულებიდან რამდენიმე თვის შემდეგ, სლოვანის ცენტრალური მცველი ჩემპიონთა ლიგაზეც ითამაშებს. ევროპის ყველაზე პრესტიჟულ საკლუბო ტურნირზე 37 წლის უკანახაზელი დებიუტანტი იქნება. ლიგაზე მოხვედრის პირველი მცდელობა მას ჰქონდა 2008 წელს, მაშინ, როდესაც ის ჯერ კიდევ თბილისის დინამოში თამაშობდა.
როგორც გვახსოვს, ჩემპიონთა ლიგის საკვალიფიკაციო ეტაპის მეორე რაუნდში ქართული გუნდი პანათინაიკოსთან დამარცხდა. იმის შემდეგ, საქართველოს ეროვნული გუნდის მე-4 ნომრის კარიერაში იყო ვიტესი, სან ხოსე, ლოკომოტივი და ბოლოს ბრატისლავა, ჩემპიონთა ლიგაზე თამაშის შესაძლებლობა მასთან ახლა მოვიდა.
როგორც გვახსოვს, ფინალურ ეტაპზე მოხვედრისთვის სლოვაკურმა გუნდმა დაამარცხა შტრუდა, კელიე, აპოელი და მიდტიულანდი. კაშიამ საკვალიფიკაციოს თითოეული მატჩი შეუცვლელად ითამაშა. ქართველი უკანახაზელის განვლილი გზა არის იმის მტკიცებულება, რომ დაგვიანებული არაფერია, ყველაფერს თავის დრო და ადგილი აქვს.
