2014 წლის მუნდიალი და რეალში ტრანსფერი
ხამესი ყურადღების ცენტრში მოექცა პორტოში თამაშის დროს, სადაც ის რადამელ ფალკაოსა და ჟივანილდო დე სეოუზა ჰალკთან ერთად პორტუგალიური გუნდის შემტევ ტრიოს კრავდა. მოგვიანებით, "დრაკონების" კოლუმბიელი შემტევები გადავიდნენ მონაკოში, სადაც ჩვენი სტატიის გმირი მხოლოდ ერთი სეზონით გაჩერდა.
რატომ მხოლოდ ერთი სეზონით? ტრიუმფალურად ჩატარებული 2014 წლის მსოფლიო ჩემპიონატის შემდეგ, ნათელი იყო, რომ როდრიგესს "თავადებში" დიდხანს არავინ გააჩერებდა. "მონეგასკების" შემტევი 6 ბურთით გახდა მუნდიალის საუკეთესო გოლეადორი, მისი ურუგვაის კარში გასროლა კი წლის საუკეთესო გოლად დასახელდა.
კოლუმბიის ნაკრების ათიანს ჰყავდა მსურველების რიგი, ყველას კი აჯობა რეალმა, რომელმაც მის სანაცვლოდ 75 მილიონი ევრო გადაიხადა. ესპანურ გრანდში ხამესზე ამყარებდნენ ძალიან დიდი იმედებს, მესუთ ოზილის წასვლის შემდეგ, 10-იანი თავდაპირველად გადაულოცეს ჯერ მას და უკვე წლების შემდეგ, ლუკა მოდრიჩს.
კოლუმბიელ შემტევს ჰქონდა წარმატებული ორი სეზონი, რომლის დროსაც მან 84 შეხვედრაში გაიტანა 27 გოლი, თუმცა დროთა განმავლობაში მისი თამაშის ხარისხი საგრძნობლად დაეცა. როდრიგესი კომფორტულად გრძნობდა თავს კარლო ანჩელოტის ხელმძღვანელობით, მაგრამ ზინედინ ზიდანთან ის საბოლოოდ ჩაქრა.
ბაიერნში იჯარა, ევერტონი, ალ-რაიანი, ოლიმპიაკოსი
კოლუმბიის ნაკრების შემტევი იტალიელ მწვრთნელთან ჯერ დაბრუნდა ბაიერნში, შემდეგ კი ევერტონშიც, თუმცა აღნიშნულმა რეიუნიონმა კარგი არაფერი მოიტანა. რეალის ყოფილი 10-იანი მიუნხენში იჯარით თამაშობდა 2 სეზონის მანძილზე, მაგრამ სრულფასოვან ტრანსფერამდე საქმე არასდროს მისულა. ხამესმა "რეკორდმაისტერის" უფროსობის გული ვერ მოიგო.
ლივერპულურ გუნდში, კატარსა და საბერძნეთში გატარებული პერიოდი კი იყო ფეხბურთში დარჩენის ერთგვარი მცდელობა, რადგან კოლუმბიელი ფლეიმეიქერის კარიერაში ყველაფერი თითქოს დასასრულისკენ მიდიოდა. როდრიგესმა 2020-2024 წლების შუალედში საერთო ჯამში სულ რაღაც 18 ბურთი გაიტანა.
კარიერის რეანიმირება
2024 წლის ზაფხული - ყველაფერი ისეა, როგორც 10 წლის წინ, კოლუმბიის ნაკრების კაპიტანი მოედანზე ჩადის საოცრებებს და მისი ქვეყნის ეროვნული გუნდი მისივე ლიდერობით დიდ წარმატებამდე მიდის. კოპა ამერიკას 1/2 ფინალში ურუგვაისთან მოგებით, "ლოს კაფეტეროსი" გადამწყვეტ მატჩში მსოფლიო ჩემპიონ არგენტინას დაუპირისპირდება.
როგორც აღვნიშნეთ, "ყვითლების" მე-10 ნომერმა უკვე მოასწრო ექვსი საგოლე გადაცემის გაკეთება, რაც ტურნირის რეკორდია. განსაკუთრებით გამოსარჩევია პანამის ეროვნულ გუნდთან მატჩი, რომლის პირველ ტაიმში 32 წლის ფლეიმეიქერმა 3 ასისტი გაიფორმა. ის ფეხბურთიდან წასვლას არ აპირებს, მეტიც, მისი მიზანი პრიმერაში დაბრუნებაა. ვნახოთ, შეძლებს თუ არა ხამესი დიდ ევროპულ საკლუბო ფეხბურთშიც შემოჭრას.
