როგორც მოგეხსენებათ, არგენტინის ფეხბურთის ფედერაციამ შემოიღო ახალი წესი - ახალგაზრდულ ნაკრებში ვერ მოხვდება ფეხბურთელი, რომელსაც პირველი პროფესიონალური კონტრაქტი არაარგენტინულ კლუბთან ექნება გაფორმებული. ამ ყველაფერში "დამნაშავე" არის 17 წლის ფლეიმეიქერი, ლუკას სკარლატო.
საქმე ისაა, რომ არგენტინელი ნახევარმცველის დედას მოუვიდა კონფლიქტი რივერ პლეიტთან, რის შედეგადაც მან თავისი შვილი პარმას აკადემიაში მოაწყო. ბუენოს-აირესელებმა აღნიშნული გარიგებისგან ვერაფერი მიიღეს, პირველ პროფესიონალურ კონტრაქტს კი "ჯალობლუს" ფლეიმეიქერი სწორედ იტალიაში გააფორმებს.
ზემოაღნიშნული წესი სწორედ ამ ინციდენტის შემდეგ შემოიღეს. ეს რეგულაცია რომ ამუშავებულიყო წარსულში, "ალბისელესტეს" ახალგაზრდულ ეროვნულ გუნდში არაერთი მომავალი ვარსკვლავი ვერ მოხვდებოდა. პირველ რიგში გამოსარჩევია ლეო მესი, რომლის კარიერა ბარსელონაში დაიწყო.
ეს წესი გავრცელდებოდა ემილიანო მარტინესზეც, რადგან პირველი პროფესიონალური კონტრაქტი მან ლონდონის არსენალთან გააფორმა. იგივე რეგულაცია შეეხებოდა მაურო იკარდისაც, მაგრამ პირად ცხოვრებაში არსებული არაერთი სკანდალის გამო, მისი საერთაშორისო კარიერა ისედაც არ შედგა.
მილანის ინტერის თემატიკას რომ გავყვეთ, ეს წესი გავრცელდებოდა ესტებან კამბიასოზეც, რომლის კარიერა მადრიდის რეალში იწყებოდა. სხვა მაგალითები: ალეხანდრო გარნაჩო და ჯულიანო სიმეონე, პირველი პროფესიონალური კონტრაქტებით მანჩესტერ იუნაიტედსა და ატლეტიკო მადრიდთან.
ბოლოს კი არგენტინული ფეხბურთის მთავარი ამომავალი ვარსკვლავი - ნიკო პასი. ახალგაზრდა ნახევარმცველი არის ესპანეთში დაბადებული-გაზრდილი, პირველი კონტრაქტით "სამეფო კლუბთან". არგენტინელი ფლეიმეიქერი ვეღარ მოხვდება "ალბისელესტეს" ახალგაზრდულ გუნდში, მაგრამ ეს არ არის პრობლემა, რადგან მას უკვე მთავარი გუნდისთვის ამზადებენ.
