ზიდანის ზარი, უარი ფერგიუსონს
ლანსის აღზრდილმა ცენტრალურმა მცველმა საფეხბურთო ევროპის ყურადღება ჯერ კიდევ მოზარდობაში მიიქცია და ყველაზე ახლოს მის გაფორმებასთან მანჩესტერ იუნაიტედი იყო. ეს ყველაფერი ხდებოდა 2011 წლის ზაფხულში, 18 წლის უკანახაზელის ტრანსფერზე პერსონალურად მუშაობდა ფერგიუსონი, მაგრამ ის სხვა დიდმა პიროვნებამ დაჩრდილა.
"წითელ-ოქროსფრების" იმდროინდელ მე-14 ნომერს ზიდანმა დაურეკა და მადრიდის რეალში თამაში შესთავაზა. ლეგენდარული ნახევარმცველი იმ დროს "სამეფო კლუბში" მრჩეველად მუშაობდა. ვარანი თანამემამულესთან საუბარს ასე იხსენებს: "მისი ზარი იმდენად მოულოდნელი იყო, რომ არც კი ვისმენდი, თუ რას მთავაზობდა ზიდანი.
ძალიან ავღელდი, როდესაც ზინედინის ხმა ამოვიცანი. არ ვიცოდი რა მეპასუხა, მხოლოდ იმის თქმა მოვიფიქრე, რომ დაკავებული ვიყავი და სხვა დროს დაერეკა", - იხსენებს ფრანგი უკანახაზელი.
მათი შემდეგი საუბარი უკვე "ბლანკოსის" ოფისში შედგა, სადაც ახალგაზრდა მოთამაშემ კლუბთან კონტრაქტი გააფორმა.
ერთად დაწერილი ისტორია
როგორც აღვნიშნეთ, ლეგენდარული ფრანგი ნახევარმცველი იმ დროს სანტიაგო ბერნაბეუზე მრჩეველად მუშაობდა, შემდეგ ის გახდა ახალგაზრდული გუნდის დამრიგებელი, მოგვიანებით კი კარლო ანჩელოტის ასისტენტიც. რაფა რეალში ნელ-ნელა მკვიდრდებოდა, თავდაპირველად ის იყო სერხიო რამოსისა და კეპლერ პეპეს ალტერნატივა, მაგრამ შემდეგ, ყველაფერი შეიცვალა.
მადრიდელთა ახალგაზრდა ცენტრალურმა მცველმა დროთა განმავლობაში ამოაგდო სასტარტოდან თავისი პორტუგალიელი კონკურენტი და ესპანელ კაპიტანთან ერთად, მან თანამედროვე ისტორიაში ერთ-ერთი ყველაზე წარმატებული დუეტი შექმნა. იმავე პერიოდში ვარანს "სამეფო კლუბში" გადაულოცეს მე-5 ნომერი, რომლითაც წლების წინ მისი მენტორი თამაშობდა.
2016 წელს, "ბლანკოსის" მთავარ მწვრთნელად დაინიშნა სწორედ საფრანგეთის ნაკრების ლეგენდარული ნახევარმცველი - აქედან იწყება რაფაელის კარიერის ყველაზე წარმატებული პერიოდი. ფრანგი უკანახაზელი ზედიზედ 3-ჯერ მოიგებს ევროპის ყველაზე პრესტიჟული საკლუბო ტურნირის თასსა და კიდევ სხვა ტიტულებს.
ამ ყველაფერთან ერთად, ზიდანის შეგირდი საფრანგეთის ნაკრების შემადგენლობაში 2018 წელს მსოფლიო ჩემპიონიც გახდება. მისი კარიერა ჰგავდა ზღაპარს: ბერნაბეუს ბინადართა მე-5 ნომერი 25 წლის ასაკისთვის იყო ჩემპიონთა ლიგის 4-გზის ტრიუმფატორი და მუნდიალის გამარჯვებულიც. ამ ყველაფერში უდიდეს როლს მისი თანამემამულე მენტორი თამაშობდა.
31 წლის ყოფილი ცენტრალური მცველის კარიერის მთავარი მწვრთნელი სწორედ ზინედინია, რომლის ხელმძღვანელობით მან 192 შეხვედრა ჩაატარა. 2018 წლის ჩემპიონთა ლიგის ფინალის შემდეგ, რეალის დამრიგებელმა თანამდებობა დატოვა და ეს ფაქტი ვარანის თამაშის ხარისხზე უარყოფითად აისახა.
ზიდანის შემდეგ
ხშირი ტრავმიანობა და მოდუნება - ასე შეიძლება დავახასიათოთ ფრანგი ცენტრალური მცველის კარიერა "ზიზუს" წასვლის შემდეგ. მართალია, ის დაბრუნდა მალევე, მაგრამ მადრიდელებსა და 52 წლის სპეციალისტს შორის 2016-2018 წლებში არსებული ქიმია უკვე დაკარგული იყო. 2021 წელს, ზიდანმა საბოლოოდ დატოვა "სამეფო კლუბი", მას მიჰყვა რაფაც.
"ბლანკოსის" ყოფილ ცენტრალურ მცველს კარიერის რეანიმირების მცდელობა "წითელ ეშმაკებში" ჰქონდა, თუმცა უშედეგოდ. იმავე პერიოდში ის საფრანგეთის ეროვნული გუნდიდანაც წავიდა. 31 წლის უკანახაზელმა ამ ფაქტთან დაკავშირებით განაცხადა, რომ ერთადერთი ადამიანი, რომლის გამოც "მამლებში" გაჩერდებოდა, სწორედ მისი თანამემამულე მენტორი იქნებოდა.
"მანკუნიანელებში" ჩატარებული სამი უფერული სეზონის შემდეგ, რეალის ყოფილმა მეხუთე ნომერმა კომოს მიაშურა, სადაც მან სულ რაღაც 23 წუთის ჩატარება მოასწრო. ამის მიზეზი არის ტრავმა, რომლის გამოც ვარანი კარიერასაც ასრულებს.
რა შეიძლება ვთქვათ ვარანის შესახებ? როდესაც ხარ 18 წლის და მადრიდში ტრანსფერისთვის გირეკავს ზინედინი, 25 წლის ასაკისთვის კი იგებ ყველაფერს, რთულია ძალების გამონახვა ახალი გამოწვევისთვის.
