როგორც მოგეხსენებათ, საქართველოს 21-წლამდე ნაკრები ევროპის ჩემპიონატზე ასპარეზობს, გუშინ ჯგუფური ეტაპის მეორე მატჩი საფრანგეთთან ჩავატარეთ და დაძაბულ ბრძოლაში 3:2 დავმარცხდით.
ამ შეხვედრას ყველასთვის ცნობილი საფეხბურთო აგენტი, მამუკა ჯუღელი ესწრებოდა, რომლის რამდენიმე ფეხბურთელი 21-წლამდე ნაკრებში ირიცხება, მათ შორის გიორგი აბუაშვილი, გიორგი კვერნაძე, ირაკლი აზაროვი.
LaGazzetta.ge-მ ჯუღელთან ექსკლუზიური ინტერვიუ ჩაწერა და რამდენიმე საინტერესო თემაზე ესაუბრა.
21-წლამდე ევროპის ჩემპიონატს ესწრებით, როგორ შეაფასებდით ჩვენი ნაკრების თამაშს?
- "ვფიქრობ, კარგი ფეხბურთელები არიან, კარგი ნაკრები ვართ, საფრანგეთი უძლიერესი მოთამაშეებითაა დაკომპლექტებული და მაინც ასე ვეთამაშეთ. აქ ჩამოსული იმისთვის ვარ, რომ ჩვენი ნაკრების ჯგუფიდან გასვლა ვნახო, რაც სავსებით შესაძლებელია."
ამ ახალგაზრდულ თაობას აქტიურად აკვირდებით, უშუალოდ რამდენიმე ფეხბურთელის აგენტიც ხართ. შეუძლიათ მათ კვარას მსგავსად დიდი ფეხბურთის თამაში?
- "კარგი თაობაა. ვისურვებდი, რომ 11-ვე ფეხბურთელი, ვინც მოედანზეა, დიდი ფეხბურთი ითამაშოს და ვარსკვლავი გახდეს, თუმცა კვარაცხელია სულ სხვა პლანეტაზეა."
კვარაცხელია ვახსენეთ და ცოტა ხნის წინ ჩემპიონთა ლიგა მოიგო. როგორი იყო თქვენი ემოციები?
- "რომ არ მეწყინებოდა ხომ იცით? (იცინის). საოცარი ემოციები იყო და არ გამკვირვებია. შეგიძლიათ გადაამოწმოთ - 4-5 წლის წინ ვიძახდი, რომ ხვიჩა ჩემპიონთა ლიგას მოიგებსთქო. ეს ჩემთვის გასაკვირი არ იყო. ვიცოდი, რომ მოიგებდა და მომავალში კიდევ მოიგებს."
ასეთი წარმატებული სეზონის შემდეგ, ის ოქროს ბურთის სიის 10-ეულშია. აქვს კვარას შანსი ოქროს ბურთის მოგების?
- "ჩემი გადმოსახედიდან, დღესდღეობით, ის სამეულში აუცილებლად უნდა იყოს. კვარა იმდენს გააკეთებს, რომ ოქროს ბურთს მოიგებს. შეიძლება წელს არ მოხდეს, მაგრამ უახლოეს მომავალში აუცილებლად იქნება. გამორიცხული არაფერია, შეიძლება წელსაც მოიგოს, ვნახოთ, რა იქნება.
მის პსჟ-ში გადასვლას ნაწილი კრიტიკულად უყურებდა, თუმცა ფაქტია, ტრანსფერმა გაამართლა და სხვა ტიტულებთან ერთად, ნანატრი ჩემპიონთა ლიგა მოიგო...
- "საბოლოოდ ყველაფერი კარგად განვითარდა. ნათქვამია, გამარჯვებულებს არ ასამართლებენო. საფრანგეთის თასი მოიგო, ჩემპიონთა ლიგა მოიგო, საფრანგეთის ჩემპიონი გახდა - მეტი რა ქნას? - ახლა მსოფლიოს საკლუბო ჩემპიონატზე თამაშობს, იქაც წარმატებას მიაღწევს და როგორც ვთქვი, ოქროს ბურთის მოგებაც შეუძლია"
ასეთ დიდ წარმატებებს კვარაცხელია თავისი შრომისმოყვარეობით, ხასიათით და მენტალობით აღწევს. თქვენ მასთან ყველაზე ახლო შეხება გაქვთ - საიდან გამოიმუშავა ეს მენტალიტეტი და რატომ არის ყველაფერში წარმატებული?
- "იმიტომ, რომ მეგრელია. მეგრელები ასეთი "ჟილკიანები" არიან."
