ქართული ფეხბურთის ისტორიაში წელს განსაკუთრებული თარიღები დაგვიგროვდა, ახალი დიდი გამარჯვების მოლოდინში გულშემატკივარს 2024 წლის 15 ოქტომბერი დაამახსოვრდება, საქართველოს U21 ნაკრები ევროპისკენ მიმავალ გზას ისტორიული ნაბიჯებით გადის.
15 ოქტომბერს, რამაზ სვანაძის გუნდმა ევროპის ჩემპიონატის შესარჩევი ციკლის ჯგუფური ეტაპის ბოლო მატჩი ქუთაისში გამართა და ჩრდილოეთ მაკედონია დაძაბულ ბრძოლაში 2:1 დაამარცხა. ჯგუფში მეორე ადგილი დაიკავა და ისტორიაში პირველად, ევროპის ჩემპიონატის საკვალიფიკაციო ეტაპის პლეი-ოფში თამაშის უფლება მოიპოვა.
საქართველომ ექვს გუნდიან ჯგუფში მეორე ადგილი დაიკავა, რაც ასევე ისტორიული შედეგია, როგორც პოზიციის ასევე დაგროვებული ქულებით.
იმისთვის რომ ევროპის ჩემპიონატზე საქართველოს U21 ნაკრებმა ისევ ითამაშოს (2023 წელს ჩვენი გუნდი ევროპირველობაზე მასპინძლის სტატუსით მოხვდა და მეოთხედფინალში თამაში შეძლო) პლეი-ოფის დაძლევაა საჭირო. საქართველოს ახალგაზრდული ნაკრები ხორვატიის ახალგაზრდულ ნაკრებთან 2 მატჩს გამართავს, 15 ნოემბერს საქართველოში, 19 ნოემბერს კი ხორვატიაში. გამარჯვებული გუნდი ევროპის ჩემპიონატზე ასპარეზობის უფლებას მოიპოვებს.
საქართველოს U21 ნაკრების ასპარეზობა ევროპის ჩემპიონატის საკვალიფიკაციო ჯგუფურ ეტაპზე, პლეი-ოფის მეტოქე და ჩვენი გუნდის შესაძლებლობები, - ამ თემების შესახებ
La Gazzetta dello Sport Georgia
-სთან ინტერვიუში საქართველოს U21 ნაკრების მთავარმა მწვრთნელმა, რამაზ სვანაძემ ისაუბრა:
- გილოცავთ პლეი-ოფში გასვლას და წარმატებას გისურვებთ, მომავალი მეტოქე ხორვატიის U21 ნაკრებია, რაზეც აღნიშნეთ რომ სტრესული თამაშები გველის, თან მეორე მატჩი სტუმრადაა, რას იტყვით ხორვატიის U21 ნაკრებზე და როგორი მეტოქე იქნება საქართველოსთვის?
- მადლობა მოლოცვისთვის. პლეი-ოფში რთული მატჩები გველის, ხორვატია კარგად დაბალანსებული, ძლიერი ინდივიდებით დაკომპლექტებული გუნდია და რაც მთავარია, მათ ევროპის ჩემპიონატზე თამაშის დიდი გამოცდილება უმაგრებთ ზურგს.
ბოლო სამი ფინალური ეტაპის მონაწილე გუნდთან მარტივ თამაშებს არ ველოდებით, მაგრამ ბუნებრივია, როგორც ყველა გუნდს მათაც აქვთ სუსტი მხარეები და ვეცდებით, რომ ეს ფაქტორები ჩვენ სასარგებლოდ გამოვიყენოთ.
- საქართველოს U21 ნაკრები და ხორვატიის U21 ნაკრები, თანაბარი სიძლიერის გუნდებია?
- ძნელია დღეს ამაზე საუბარი. თუ დავალთ ინდივიდების დონეზე, რა თქმა უნდა გამოცდილება მეტი აქვთ - დასავლეთ ევროპულ კლუბებში, თუნდაც დინამო ზაგრებში, აქვთ ის სათამაშო პრაქტიკა, რომელიც ასეთ დონეზე წარმატებისთვის აუცილებელია და ეს მოცემულობა არამარტო მათ, ნებისმიერ ნაკრებს კომფორტულ სიტუაციაში აყენებს.
ეს ყველაფერი უკვე ჩვენ მინდორზე უნდა დავაბალანსოთ, პირველ რიგში ჩვენი გუნდურობით, რაც მთელი ეს შესარჩევი, ჩვენი მთავარია პლუსი იყო და ვიმედოვნებ, რომ ამის დემონსტრირებას პლეი-ოფშიც შევძლებთ.
- რას იტყვი მატჩის გმირ ნოდარ ლომინაძეზე, რომელმაც ჩრდილოეთ მაკედონიასთან გადამწყვეტი გოლი გაიტანა?
- ნოდარს დიდი ხანია ვიცნობთ, ჯერ კიდევ 19-წლამდე ნაკრებიდან მოყოლებული, ჩვენ თითქმის 7 წელია ერთად მოვდივართ.
ის გუნდის სრულფასოვანი წევრია, მას აქვს ზრდის და მომატების დიდი პოტენციალი. ერთადერთი რაც მან უნდა გააკეთოს, არის ის რომ უფრო მეტი უნდა მისცეს ფეხბურთს, როგორც მოედანზე, ისე მის მიღმა.
როგორც ნოდარს, ისე ჩვენი გუნდის ნებისმიერ წევრს, აქვს იმის შანსი, რომ მათ წინ არსებული ასპარეზი სწორად გამოიყენონ. სწორად განავითარონ კარიერა და ამით რა თქმა უნდა მშობლიურ ნაკრებს დაეხმარონ მომავალში.
სამწუხაროა, რომ პირველ თამაშს გამოტოვებს, ისევე როგორც ჩვენი კაპიტანი საბა ხვადაგიანი. ეს ორი ფეხბურთელი ჩვენთვის დიდი ძალაა, მაგრამ სხვა ფეხბურთელები მიიღებენ შანსს და დარწმუნებული ვარ, რომ ამ შანსის სწორად გამოყენებას ეცდებიან.
- პლეი-ოფში გასვლა საქართველოს 21-წლამდე ნაკრებისთვის ისტორიული შედეგია, ეს იყო საწყის ეტაპზე თქვენი გუნდის მთავარი მიზანი?
- ამ შედეგის დაფიქსირებით, ვთვლი, რომ ეს შესარჩევი ციკლი წარმატებული იყო. თუმცა ახლა ისეთ ეტაპზე ვართ, სადაც პლეი-ოფი გველის და შანსი გვაქვს ჩვენი ფეხბურთის ისტორიაში კიდევ ერთი ფურცელი დავწეროთ, ახალ ნიშნულს მივაღწიოთ და ჩვენი ეროვნული გუნდების რეალობაში მორიგი სტანდარტის დაწესებას დავუდოთ სათავე.
რაც შეეხება მიზნებს, შარშან, ევროპის ჩემპიონატის დასრულების შემდეგ, 21-წლამდე ნაკრები ასაკობრივი ცენზის გამო ბევრმა ფეხბურთელმა დატოვა. მოკლე დროში ახალი გუნდის შექმნა მოგვიწია, რომელსაც შეეძლო ახალი მიზნებისთვის ბრძოლა.
რეალურად, ჯგუფიდან გასვლა მიზნად, განვლილი 4-5 ტურის შემდეგ დავისახეთ, მას შემდეგ, რაც ამ გუნდმა ხასიათის სიმტკიცის და შეთამაშების ხარისხის გარდასახვა ქულებში მოახერხა.
სამწვრთნელო შტაბი, ფეხბურთელები და მთლიანად გუნდი, ყოველთვის ვაფასებთ იმ რეალობას რომელშიც ვართ, ამბიცია რეალობის შეგრძნებას არ გვაკარგვინებს და ალბათ ეს დიდი პლუსია. ამიტომ, ჯგუფიდან გასვლას მიზნად თავიდან ვერ დავისახავდით, რადგან ჩვენი პოტენციალის ამოცნობა საწყის ეტაპზე შეუძლებელი იყო.
ეს არ ეხებათ რა თქმა უნდა ისეთ გუნდებს, როგორიც თუნდაც ხორვატიაა, მათთან ეს არც განიხილება და ფინალურ ეტაპზე თამაშის ამბიცია ასეთ ნაკრებებში ბუნებრივი მდგომარეობაა.
- ირაკლი აზაროვი ყველაზე გამოცდილი ფეხბურთელია U21 ნაკრებში, ჩემპიონთა ლიგაზე თამაშისა და ასევე U21 ევროპის ჩემპიონატზე ასპარეზობის გამოცდილება აქვს, რას ნიშნავს ირაკლი თქვენი გუნდისთვის?
- ის გამოცდილება, ის პიროვნული თვისებები და ზოგადად ის ურთიერთობა, რაც ჩვენ სამწვრთნელო შტაბს, პირადად ჩემს და ირაკლის შორის ბოლო 7 წელია ჩამოყალიბდა, ჩვენთვის ძალიან ბევრს ნიშნავს.
როგორც მოგეხსენებათ, ირაკლისაც ძალიან დიდი ხანია ვიცნობთ, ერთად მოვდივართ თითქმის 7 წელია და მასთან არასოდეს არანაირი პრობლემა არ არის, როდესაც უწევს მას ახალგაზრდულ ნაკრებში ჩამოსვლა, ყოველთვის სიხარულით მოდის, ეს ყველაფერი იგრძნობა და ის ჩვენთვის ძალიან დიდი ძალაა და ვიმედოვნებ, რომ მისი გამოცდილება პლეი-ოფის რანგის თამაშებში ძალიან დაგვეხმარება.
ამ ჭრილში, იგივე ლუკა გაგნიძეც უნდა ვახსენო, მისი გამოცდილებაც ძალიან წაგვადგება, მათი ძალიან გვეიმედება და ერთადერთი სათამაშო პრაქტიკის მხრივ ისინი სრულ მზადყოფნაში დაგვჭირდება, როგორც ფიზიკური ფორმის ისე ფსიქოლოგიური თვალსაზრისით. ისინი ჩვენთვის ფასდაუდებელი ძალაა და იმედი მაქვს, რომ ეს ნოემბრის მატჩებშიც გამოჩნდება.
ჩეხეთთან,ამ შემთხვევაში იმ ფეხბურთელებისთვის, რომლებსაც ორივე ნაკრებში თამაში შეუძლიათ, პრიორიტეტი კვლავ ეროვნული ნაკრები იქნება?
- ერთ რამეზე ყველა შევთანხმდეთ, რომ ჩვენი საფეხბურთო პირამიდის მწვერვალი, ჩვენი ეროვნული ნაკრებია. ბოლო წლების მანძილზე, ახალგაზრდულიდან ეროვნულში დაწინაურებული ფეხბურთელების რაოდენობა ძალიან გაიზარდა და ეს დინამიკა მხოლოდ გვახარებს.
ეს მიუთითებს იმაზე, რომ ტრანზიციის პროცესი სწორად მიმდინარეობს. შედეგი ყოველთვის კარგია, მაგრამ ნომერ პირველი ამოცანა ეროვნული ნაკრებისთვის უწყვეტად კადრების მიწოდებაა.
მაგრამ დგება კონკრეტული მომენტი, როდესაც რესურსის მობილიზებაა საჭირო, როგორც ეს 2023 წელს, ევროპის ჩემპიონატის წინ მოხდა, სადაც ბევრი ფეხბურთელი დაგვეხმარა. ვფიქრობ, მოახლოებული პლეი-ოფიც ასეთი შემთხვევაა და მწვრთნელებს შორის კომუნიკაციის შემდეგ, მგონია, რომ ამ მხრივ რისი შესაძლებლობაც იქნება, რესურსს მაქსიმალურად გამოვიყენებთ.
- ნიდერლანდები, შვედეთი, მოლდოვა, ჩრდილოეთ მაკედონია და გიბრალტარი - ჯგუფური ეტაპის მეტოქეები, რომელი გუნდის თამაშია ყველაზე ახლოს ხორვატიასთან და ჯგუფური ეტაპის გამოცდილება რამდენად დაგეხმარებათ?
- ალბათ ნიდერლადნების თამაშს შევადარებდი, რომელიც რა თქმა უნდა, გაცილებით მაღალი დონის გუნდია, ვიდრე ხორვატია, თუმცა თუნდაც სათამაშო სქემა რომ ავიღოთ, ან სათამაშო მანერა, ეს ორი გუნდი უფრო გავს ერთმანეთს.
ფლანგის ვინგერების გამოყენებით, ინდივიდუალური თამაშით და
გადასვლის ფაზებით, ისინი შეგვიძლია სტილისტურად ერთმანეთს დავუკავშიროთ.
- 2023 წელს საქართველოს U21 ნაკრებმა ითამაშა ევროპის ჩემპიონატზე, შემდეგ მოგიწიათ გუნდის გადაწყობა და უკვე განახლებულ გუნდსაც აქვს შესაძლებლობა ითამაშოს კონტინენტის პირველობაზე, პირადად თქვენთვის, დიდი ტურნირის გამოცდილება პლეი-ოფის მატჩებისთვის რამდენად მნიშვნელოვანია?
- ნებისმიერი თამაში, რომლებიც ჩვენ ჩავატარეთ წარსულში, განსაკუთრებით ის მატჩები, რომლებიც ვითამაშეთ ევროპის ჩემპიონატზე, ჩვენთვის უდიდესი გამოცდილება იყო.
ევროპის ჩემპიონატზე ნაჩვენებ შედეგს და იქ მიღებულ თვითრწმენას, ძალიან დიდი მნიშვნელობა ჰქონდა ამ ახალი თაობისთვის. მათ წინ ჰქონდათ უკვე მაგალითი თუ როგორ შეიძლება სწორი გარემოს შექმნით და სწორი მუშაობით, ერთმანეთის პატივისცემითა და დავალების სწორად შესრულებით თუ რამდენი ფაქტორის კომპენსირება შეგვიძლია, რა დონის გუნდებთან შეგვიძლია თანაბრად თამაში.
როდესაც ასეთი მემკვიდრეობა გხვდება, შენ უფლება არ გაქვს, რომ თამასა ჩამოწიო და სწორედ ამიტომ, ორმაგად ვართ გახარებულები, რომ ევროპის ჩემპიონატზე მიღწეული ჩვენი წარმატება, ერთჯერად წარმატებად არ დარჩა და გაგრძელება პოვა უკვე ამ ახალ ნაკრებში.
- საკვალიფიკაციო ეტაპის დასაწყისიდან - ამ დრომდე ახალი ფორმაციის 21 წლამდე ნაკრების პროგრესზე რას იტყვით? რა შეიცვალა და რა რჩება თქვენი გუნდის მთავარ გამოწვევად?
- რეალურად, ბევრი არაფერი შეცვლილა, უბრალოდ თამაშიდან - თამაშამდე უმჯობესდებოდა ჩვენი ურთიერთგაგება მოედანზე, შეთამაშების ხარისხი, რასაც დრო ჭირდება და პირველი ტურები ეს ყველაფერი არ გვეტყობოდა მინდორზე, მაგრამ შემდეგ ეს ყველაფერი დალაგდა.
შედარებით გაგვიჭრიდა მეორე წრის ბოლო თამაშები, რასაც ობიექტური ახსნა აქვს - იმატა ტრავმიანობამ და ამას დაემატა დისკვალიფიკაციებიც, რაც ჩვენი სელექციისთვის დიდი დარტყმაა, რაც გუნდზე აისახება ხოლმე. მაგალითად, 6-7 ტურის შემდეგ, თითქმის მთლიანად შეცვლილი იყო ჩვენი დაცვის ხაზი და თუ პირველ 7 მატჩში, მხოლოდ ერთ თამაშში გავუშვით გოლი, ბოლო 3 შეხვედრაში დაცვაში პრობლემები გვქონდა.
მთავარი გამოწვევა, ალბათ სათამაშო დროა. ჩვენი ლეგიონერების უმრავლესობას, მწირი სათამაშო პრაქტიკა აქვს. თუმცა ამის მიუხედავად ნაკრებში ყოველთვის მაქსიმუმს აკეთებდნენ.
პარალელურად ამას ემატება მეტოქეთა პროგრესი, მაგალითად შვედეთი ავიღოთ, რომელსაც ჯგუფში ვაჯობეთ. პირველი თამაში მათ წინააღმდეგ შარშან ჩავატარეთ, ხოლო ზუსტად ერთი წლის შემდეგ, მეორე თამაშის წინ მათი შემადგენლობის წევრებს შესამჩნევი პროგრესი ჰქონდათ, მათი უმრავლესობა უკვე თამაშობდა ტოპ ჩემპიონატებში, კარგ გუნდებში და ეს არის სწორედ ის პროგრესის ტემპი ალბათ რაც ჩვენ შეიძლება გვაკლია.
ეს გამოცდილება განსაკუთრებით აკლიათ ჩვენ ჩემპიონატში მოთამაშე ფეხბურთელებს და ჩრდილოეთ მაკედონიასთან მატჩში, ყველაზე მეტად ამან გამახარა და ამიტომ ვარ მადლიერი თითოეული მათგანის, რომ როდესაც მატჩის სცენარი ჩვენ სასარგებლოდ არ განვითარდა, ზუსტად ვიცი მათ რისი გადალახვა მოუწიათ თამაშზე, რამხელა წნეხს გაუძლეს და საბოლოოდ, მატჩი ჩვენ სასარგებლოდ დასრულდა. ამ დანაკლისის და გამოცდილების კომპენსირება, ჩვენ ჩვენი გუნდურობითა და ხასიათის გამოვლენით მოვახდინეთ და ალბათ სწორედ ეს იქნება ჩვენი მთავარი კოზირი პლეი-ოფის მატჩებშიც.
- თქვენ ასევე გაქვთ სავსე ტრიბუნების გამოცდილება, პირველ მატჩში რამდენად მნიშვნელოვანი იქნება გულშემატკივრის ფაქტორი?
- გულშემატკივრის ფაქტორი ჩვენთვის ყოველთვის მნიშვნელოვანია. ჩვენი ქომაგების ძალიან დიდი იმედი გვაქვს მოახლოებულ მატჩებშიც.
ასევე, მინდა განვლილ საკვალიფიკაციო ეტაპზე ნაჩვენები მხარდაჭერისთვის მათ მადლობა გადავუხადო. მინდა ყველას მოვუწოდო, ვთხოვო, რომ 15 ნოემბერს მოვიდნენ სტადიონზე, გაავსონ ტრიბუნები და ჩვენ ყველანაირად ვეცდებით, რომ ჩვენი ქომაგის გულები გავახაროთ.
იხილეთ ჩვენი პოდკასტის მორიგი ეპიზოდი
