ქართველმა ტყვიის მსროლელებმა მარიამ ფროდიაშვილმა და გიორგი მუმლაძემ მიუნხენის საერთაშორისო ტურნირზე, H&N Cup-ზე ახალგაზრდებს შორის, პნევმატური პისტოლეტით 10 მეტრზე სროლაში ოქროს მედლები მოიპოვეს. მარიამმა საკვალიფიკაციო ეტაპზე 574 ქულით საუკეთესო შედეგი დააფიქსირა, ფინალში 238.6 ქულა დააგროვა და ჩემპიონობა იზეიმა. აღნიშნულ ტურნირზე, შეჯიბრის პირველ დღეს მარიამ ფროდიაშვილმა ვერცხლის მედალიც მოიპოვა.
გიორგი მუმლაძე საკვალიფიკაციო ეტაპზე 577 ქულით პირველი იყო, ფინალში ქართველმა 241.5 ქულით გაიმარჯვა და ოქროს მედალს დაეუფლა.
მიუნხენის საერთაშორისო ტურნირი ახალგაზრდებს შორის პნევმატური პისტოლეტით 10 მეტრზე სროლაში ევროპის ჩემპიონატის მოსამზადებელი ეტაპია.
