საქართველოს ნაკრებმა სადებიუტო მატჩი თურქეთთან გამართა და მიუხედავად იმისა, რომ მაღალი დონის მატჩი ჩაატარა, 3:1 დამარცხდა, თუმცა ჩვენს ქვეყანაში მაინც ყველა ბედნიერია, რადგან საქართველო ღირსეულად გამოვიდა სადებიუტო მატჩში.
ასეთი კარგი თამაშის ფონზე, ჩვენს ნაკრებს თამასა აეწია და ქართველი გულშემატკივარი ჩეხეთთან უკვე მოგებას მოელის, რაც ლოგიკურია. ალბათ, ეს მატჩი ჩვენი ჯგუფიდან გასვლის ბოლო შანსია.
ჩეხეთის ნაკრებმა პირველ ტურში მთლიანი ტურნირის ერთ-ერთ მთავარ ფავორიტთან, პორტუგალიასთან ბოლომდე იბრძოლეს, იგებდნენ კიდეც, თუმცა ბოლო წუთებში 2 გოლი გაუშვეს და დამარცხდნენ.
ჩვენი დღევანდელი მეტოქე ფიზიკურად გაცილებით კარგადაა მომზადებული, ვიდრე თურქები, თუმცა საქართველოს უფრო მაღალი დონის ინდივიდუალური მოთამაშეები ჰყავს.
"ლოგიკურია, რომ ყველა გუნდს ჩვენთან შეტევა სურს, თუმცა ყველა მეტოქესთან ჩვენც ანალოგიურს გავაკეთებთ. ასევე, თავი კარგად უნდა დავიცვათ და ერთი, რასაც გულშემატკივარს ვპირდებით, არის ის, რომ ბოლომდე ვიბრძოლებთ. მე, ჩემს ოჯახს და ქართველებს ფეხბურთი ძალიან გვიყვარს და ჩვენთვის დიდი პატივია, რომ ასეთ დიდ ტურნირზე ვთამაშობთ. საქართველოში ახლა ყველა ბედნიერია. ხვალინდელ თამაშზე უნდა ვიფიქროთ, მოვემზადოთ და იმ ხალხისთვის ვითამაშოთ, რომელსაც ჩვენი იმედი აქვს. აქამდე შრომითა და თავდაჯერებით მოვედით, ამიტომ მზად ვართ სამივე მატჩის სათამაშოდ. ეს ბრძოლის ველი არ არის, ფეხბურთით უნდა ვისიამოვნოთ და როცა რამით სიამოვნებას იღებ, ყოველთვის ყველაფერი კარგად გამოდის", - გიორგი ქოჩორაშვილი.
"ჩეხეთის მატჩები კარგად შევისწავლეთ. ვიცით, მათი ძლიერი და სუსტი მხარეები. ბევრჯერ მითქვამს და ახლაც ვიტყვი, რომ მთავარი მეტოქის კი არა, ჩვენი თამაშია, როგორ ვიქნებით მენტალურად და ფიზიკურად მომზადებული. თუ ჩვენს თამაშს ვითამაშებთ, მოწინააღმდეგეს გაუჭირდება. ხვალინდელ მატჩში სასტარტო შემადგენლობაში ცვლილებები იქნება, ჩვენ მხოლოდ 10 ფეხბურთელით არ შემოვიფარგლებით. კონკრეტულ სიახლეებს ახლა ვერ გეტყვით. ლოგიკურია, რომ თურქეთთან ჩაკვეტაძე მოედნიდან გასვლით უკმაყოფილო იყო, რომელი ფეხბურთელია შეცვლით კმაყოფილი? - ეს არაფერს ნიშნავს და ჩვენს განწყობაზე გავლენას არ ახდენს. არის მომენტები, როცა კარგად თამაშობ და აგებ, ან ცუდად თამაშობ და იგებ. გულდაწყვეტილები ვართ თურქეთთან მარცხით, თუმცა ეს იყო კიდევ ერთი წინგადადგმული ნაბიჯი ქართველებისთვის. ჩვენ ევროპის ჩემპიონატზე ვთამაშობთ", - ვილი სანიოლი.
საქართველო-ჩეხეთი:
ევროპის ჩემპიონატი, ჯგუფური ეტაპი;
22 ივნისი, 17:00 (თბილისის დროით);
"ვოლკსპარკსტადიონი", ჰამბურგი;
მთავარი მსაჯი: დანიელ შიბერტი (გერმანია);
სავარაუდო შემადგენლობა: მამარდაშვილი, კაშია, კვერკველია, დვალი, შენგელია, კაკაბაძე, ქოჩორაშვილი, მექვაბიშვილი, ჩაკვეტაძე, კვარაცხელია, მიქაუტაძე.
