საქართველოს ნაკრები სომხეთის დედაქალაქში წინა დღით ჩამოფრინდა და ერევნის ცენტრალურ სტადიონზე მატჩისწინა ვარჯიში გამართა. ვარჯიშზე გურამ კაშია და ხვიჩა კვარაცხელიაც იყვნენ, თუმცა დისკვალიფიკაციის გამო, ისინი დღევანდელ თამაშს გამოტოვებენ. კაშიას არყოფნაში საქართველოს ნაკრებს ოთარ კიტეიშვილი უკაპიტნებს.
ჩვენი ნაკრებისთვის ამ ორმატჩიანი დუელის მოგება აუცილებელია, რადგან ჩვენი მიზანი B დივიზიონში დარჩენაა, რომ მსოფლიო და ევროპის ჩემპიონატზე გასასვლელად ერთა ლიგიდანაც ვიბრძოლოთ ხოლმე.
2024 წელს სომხეთის ნაკრებმა საკუთარ მოედანზე ჯამში 5 შეხვედრა ჩაატარა, საიდანაც 2 მოიგო, 3-ში კი დამარცხდა. სამწუხაროდ, საქართველოს ნაკრებს უკვე ზედიზედ 4 მატჩია არ მოუგია და ვილი სანიოლის გუნდი ამ ნავსის გატეხვას დღეს შეეცდება.
რაც შეეხება ურთიერთშეხვედრებს, ამ საუკუნეში საქართველოსა და სომხეთის ნაკრებები ერთმანეთს სულ 4-ჯერ შეხვდნენ, საიდანაც 2 სომხეთმა მოიგო, ერთი საქართველომ, ერთი ფრედ დასრულდა.
ვილი სანიოლი (საქართველოს ნაკრების მწვრთნელი): "ეს კავკასიური დერბია და მსგავს მატჩებს ყოველთვის დიდი ინტერესი აქვს. ორივე ნაკრებისთვის მძიმე მატჩი იქნება. სომხეთის ნაკრებმა ცოტა ხნის წინ მწვრთნელი შეიცვალა და შეუძლია, რომ ნაკრები სხვა დონეზე გადაიყვანოს. ჩემი ფეხბურთელები საბრძოლველად და კარგი ფეხბურთის სათამაშოდ მზად არიან. ხვალ ბედნიერი მხოლოდ ერთი ნაკრები დარჩება და იმედია, ეს საქართველო იქნება. კვარაცხელიას გარეშე თამაში ადვილი არ არის, რადგან ის უნიკალურია, თუმცა ბევრჯერ აღვნიშნე, რომ მთავარია მოედანზე როგორი დისციპლინით გავალთ და როგორ ვიქნებით ბურთთან უშუალოდ მინდორზე. სახელები გასაგებია, მაგრამ მთავარია, მოედანზე თავს ვინ როგორ წარმოაჩენს. პირველ წუთებში თამაშს აქტიურად ვერ ვიწყებდით, ამიტომ ჩვენი მიზანია, რომ თამაში თავიდანვე ინტენსიურად დავიწყოთ."
ჯონ ვან’ტ სხიპი (სომხეთის ნაკრების მწვრთნელი): "საქართველოს საკმაოდ ძლიერი და პროგრესირებადი ნაკრები ჰყავს. ისინი სამაგალითოები არიან, თუ როგორ უნდა მიაღწიოს პატარა ქვეყანამ წარამტებას. მიქაუტაძე? ის ჩემთან აიაქსში თამაშობდა, თუმცა დიდი სათამაშო დრო არ ჰქონდა, რადგან მის პოზიციაზე სხვა ფეხბურთელები გვყავდა. სასიხარულოა, რომ თავის ამჯამინდელ გუნდში ის წარმატებულად გამოდის. საკუთარ მოედანზე ვთამაშობთ და მნიშვნელოვანია, რომ ჩვენი გულშემატკივრის წინაშე სასურველ შედეგს მივაღწიოთ."
სომხეთი-საქართველო
ერთა ლიგა, B დივიზიონის ფლეი-ოფი
20 მარტი, 21:00
ვაჟგენ სარქისიანის რესპუბლიკური სტადიონი, ერევანი
მთავარი მსაჯი: რადუ პეტრსკუ (რუმინეთი)
საქართველოს ნაკრების სავარაუდო შემადგენლობა
