[პრევიუ] ევრო 2024 — თურქეთი და პორტუგალია 1/8 ფინალის საგზურისთვის იბრძოლებენ

საქართველო V ჩეხეთის გარდა, დღეს კიდევ 2 მატჩი ჩატარდება. ამავე ჯგუფში პორტუგალია თურქეთს შეხვდება, ხოლო E ჯგუფში ბელგია რუმინეთთან შეეცდება პირველი ქულების მოპოვებას.

F ჯგუფის ლიდერები, თურქეთისა და პორტუგალიის ეროვნული ნაკრებები ერთმანეთს დორტმუნდში, სიგნალ იდუნა პარკზე, შეხვდებიან და 1/8 ფინალური ეტაპის საგზურის გაფორმებას შეეცდებიან.

ევროპის ჩემპიონატის ჯგუფური ეტაპის პირველ ტურში ორივე გუნდმა გამარჯვება მოიპოვეს და ჯგუფში დაწინაურდნენ — თურქეთმა საქართველო 3:1 დაამარცხა, ხოლო პორტუგალიამ ჩეხეთს მინიმალური სხვაობით, 2:1 მოუგო.

ნაკრებები ერთმანეთს ბოლოს 2022 წელს მსოფლიო ჩემპიონატის საკვალიფიკაციო ეტაპის 1/2 ფინალში შეხვდნენ, სადაც პორტუგალიამ მეტოქე 3:1 დაამარცხა. ბოლო 5 ურთიერთდაპირისპირებაში კი რობერტო მარტინესის გუნდმა 4 მოიგო და მხოლოდ 1 შეხვედრა დათმო.

სათამაშო დღეს კიოლნში გასამართი შეხვედრა დახურავს, სადაც ბელგიის ეროვნული ნაკრები რუმინეთს დაუპირისპირდება — მატჩი თბილისის დროით 23:00 საათზე დაიწყება.

E ჯგუფის ფავორიტი, ბელგიის ნაკრები პირველ ტურში სლოვაკეთთან მოულოდნელად, 1:0 დამარცხდა და 0 ქულით ბოლო ადგილზეა, ხოლო რუმინეთმა უკრაინა 3:0 გაანადგურა და ჯგუფს ლიდერობს. გუშინ აღნიშნული ჯგუფის მეორე ტურის შეხვედრა გაიმართა, სადაც უკრაინამ სლოვაკეთს 2:1 მოუგო.

აღსანიშნავია, რომ ბელგიისა და რუმინეთის ეროვნული ნაკრებები ბოლოს ერთმანეთს 2012 წელს, ამხანაგურ შეხვედრაში, დაუპირისპირდნენ და მაშინ გამარჯვება რუმინელებს დარჩათ. ბოლო 5 დაპირისპირებაში კი ანგარიში 3-2 არის, რუმინეთის სასარგებლოდ. იმ შემთხვევაში თუ დღეს ბელგია გაიმარჯვებს, E ჯგუფში ყველა ნაკრებს 3 ქულა ექნებათ და ყველაფერი ბოლო ტურში გადაწყდება.