"ბუნდესნაკრები" ევროპის ჩემპიონატის ერთ-ერთი ფავორიტია და ამ გუნდს შინაურ კედლებში თამაშის ფაქტორიც ზურგს უმაგრებს. ტურნირის დაწყებამდე ცოტა ხნით ადრე, "მანშაფტს" შეექმნა საკადრო პრობლემა: ტონზოლიტის გამო, გუნდს გამოაკლდა ალექსანდარ პავლოვიჩი, რომლის ადგილი ემრე ჯანმა დაიკავა.
სხვა მხრივ ალემანების ბანაკში ყველაფერი რიგზეა და გახსნით შეხვედრაში ევროპის ჩემპიონატის მასპინძლები ოპტიმალური შემადგენლობით იქნებიან. რაც შეეხებათ ბრიტანელებს, მათი გუნდის ბანაკში საკადრო პრობლემები ნამდვილად შეინიშნება. ლუის ფერგიუსონის არყოფნა უკვე დიდი დანაკლისია, ის ევრო 2024-ს გამოტოვებს.
ბოლონიას შემტევი ნახევარმცველის არყოფნით, სკოტების პრობლემები არ სრულდება. იულიან ნაგელსმანის გუნდის წინააღმდეგ საეჭვოა სამი ფეხბურთელის გამოჩენა, ესენი არიან: ენდი რობერტსონი, ლოურენს შენკლენდი და კალუმ მაკგრეგორი. მათი თამაში კითხვის ნიშნის ქვეშ ტრავმების შედეგად დადგა.
ცხადია, "ტარტენიბისთვის" ლივერპულის მარცხენა მცველის არყოფნა უდიდესი დანაკლისი იქნება. ის არის თავისი ნაკრების კაპიტანი, ლიდერი და მთავარი მოთამაშე. ჯერჯერობით არ არის დადგენილი, შეძლებს თუ არა შოტლანდიელი განაპირა მცველი გერმანიასთან მატჩისთვის გამოჯანმრთელებას. ეს ფაქტი "ბუნდესნაკრების" უპირატესობას კიდევ უფრო კოლოსალურს ხდის.
რაც შეეხება ურთიერთშეხვედრების ისტორიას - წყვილის ანგარიშზე 17 თამაშია. რვაჯერ იმარჯვა "მანშაფტმა", ხუთ შემთხვევაში დაფიქსირდა ფრე, ოთხჯერ კი შოტლანდიამ მოიგო. ბურთების შეფარდება - 26:23-ზე ალემანთა სასარგებლოდ. ამ დაპირისპირების საუკეთესო გოლეადორი ტომას მიულერია, რომელმაც ბრიტანელებს 4 ბურთი გაუტანა.
სამწუხაროდ, სკოტებისთვის გერმანელი შემტევი ნაგელსმანის განაცხადში მოახლოებულ ევროპის ჩემპიონატზეც იქნება. აქვე დავამატებთ, რომ აღნიშნული წყვილის გარდა, A ჯგუფში შვეიცარიისა და უნგრეთის ეროვნული გუნდებიც არიან. მათი დაპირისპირება გაიმართება ხვალ, 15 ივნისს, ჩვენი დროით 17:00 საათზე.
იულიან ნაგელსმანი (გერმანიის ნაკრების მწვრთნელი): "მნიშვნელოვანია ევროპის ჩემპიონატის დაწყება გამარჯვებით. არ ღირს იმის შესახებ საუბარი, თუ ვინ არის ფავორიტი და ვინ არა. ეს ევრო 2024-ია, ტურნირი, რომელზეც სუსტი ნაკრებები არ არიან. ვაფასებთ მეტოქის ძლიერ მხარეებს და პირველ მატჩს სიფრთხილით ვუდგებით".
სტივ კლარკი (შოტლანდიის ნაკრების მწვრთნელი): "ვეთამაშით ევროპის ჩემპიონატის მასპინძელსა და ერთ-ერთ მთავარ ფავორიტს. ურთულესი მატჩი გველოდება, მაგრამ უკანდახევას არ ვაპირებთ. ვეცდებით მაქსიმუმის გაკეთებასა და ევრო 2024-ზე ღირსეულ ბრძოლას. ბრძოლა ნამდვილად შეგვიძლია, ეს აქამდეც გაგვიკეთებია".
გერმანია-შოტლანდია:
ევრო 2024-ის A ჯგუფი, პირველი ტური;
14 ივნისი, 23:00 საათი;
ალიანც არენა, მიუნხენი;
მთავარი მსაჯი: კლემან ტიურპენი (საფრანგეთი).
