დიოგუ ჟოტა ესპანეთში მომხდარ ავტოკატასტროფას ემსხვერპლა. ავტოსაგზაო შემთხვევა ზამორას პროვინციაში მოხდა და მასთან ერთად დაიღუპა პორტუგალიელი ფორვარდის ძმა, ანდრეც, რომელიც ასევე ფეხბურთელი იყო. გავიხსენოთ მისი განვლილი გზა, რომელიც სტანდარტული პორტუგალიელი მოთამაშის გზისგან რადიკალურად განსხვავებული იყო.
ტოპ კლუბების უარი
ჟოტა დაიბადა ქალაქ პორტუში, თუმცა "დრაკონების" აკადემიაში ის ვერ მოხვდა. ამის გარდა, მის ფეხბურთელად ფორმირებაში წვლილი არც ბენფიკასა და სპორტინგს მიუძღვის. დიოგუ არასდროს ითვლებოდა პორტუგალიური ფეხბურთის ამომავალ ვარსკვლავად, მის ხელში ჩასაგდებად არც ევროპული კლუბები ნადირობდნენ.
პორტუგალიელმა თავდამსხმელმა კარიერა დაიწყო მოკრძალებულ პაკოშ დე ფერეირაში, სადაც ის შენიშნა ატლეტიკო მადრიდის დამრიგებელმა, დიეგო სიმეონემ. ლივერპულის ექს-ფორვარდი "როხიბლანკოს" შეუერთდა 2016 წელს, მაგრამ მისი ესპანური კარიერა არ შედგა.
ჟოტამ მეტროპოლიტანო დატოვა ისე, რომ ერთი მატჩიც არ ჩაატარა - თავდაპირველად იყო იჯარა მშობლიურ "თეთრ-ლურჯებში", შემდეგ კი ვულვზი. პორტუგალიელი ფორვარდის აფეთქება მოხდა სწორედ ინგლისურ კლუბში, რომლის რიგებში მან შეაგდო 44 ბურთი და ჩემპიონშიპიც მოიგო.
იურგენ კლოპის აღმოჩენა
ჟოტამ ვულვერჰემპტონთან ერთად ითამაშა პრემიერ ლიგაშიც და მიუხედავად იმისა, რომ ის არ გამოირჩეოდა უხვგოლიანობით, ლივერპულის ყურადღება მან მაინც მიიქცია. პორტუგალიელმა ფორვარდმა კლოპი მოხიბლა თავისი უნივერსალიზმით, მერსისაიდელთა იმდროინდელი შემტევებისგან განსხვავებით, მას რამდენიმე პოზიციაზე თამაში შეეძლო.
გერმანელი მწვრთნელი დიოგუს იყენებდა როგორც თავდამსხმელად, გარემარბად და ე.წ. ცრუ ცხრიანადაც. მიუხედავად იმისა, რომ "წითლების" ფორვარდი დროის დიდ ნაწილს ატარებდა ლაზარეთში, რამდენიმე საინტერესო მიღწევის დაფიქსირება მან მაინც შეძლო.
ენფილდის ბინადრების მე-20 ნომერმა თავის პირველ 10 მატჩში გაიტანა 7 გოლი, რითაც რობი ფაულერის მიღწევა გაიმეორა. ამის გარდა, ის გახდა ლივერპულის პირველი მოთამაშე ისტორიაში, რომელმაც თავის პირველ 4 საშინაო შეხვედრაში გოლის გატანა შეძლო. ცალკე გამოსარჩევია ჟოტას ჰეთ-თრიქი ბერგამოს ატალანტას კარში.
ეს მოხდა ჩემპიონთა ლიგის 2020/2021 წლების სეზონის ჯგუფურ ეტაპზე და ცნობისთვის, "ლა დეას" კარში გატანილი სამი გოლის შემდეგ, დიოგუ გახდა რიგით მესამე პორტუგალიელი მოთამაშე, რომელმაც მთავარ საკლუბო ტურნირზე ჰეთ-თრიქი შეასრულა. პირველები კრიშტიანუ რონალდუ და რუი პედრო იყვნენ.
ჟოტა მიხეილ მესხის სახელობის სტადიონზე
მთავარი ნაკრების გარდა, დიოგუმ მოიარა პორტუგალიის ასაკობრივი ეროვნული გუნდებიც და ცნობისთვის, ერთი მატჩი მან საქართველოს U19-ის წინააღმდეგაც ჩაატარა. ეს მოხდა 2015 წლის 31 მაისს, მიხეილ მესხის სახელობის სტადიონზე, ევრო 2015-ის ელიტ რაუნდში პირენეელებმა "ჯვაროსნებს" 3:2 მოუგეს.
როდესაც ჩვენი ნაკრები იმარჯვებდა 2:1-ს, ანგარიში 75-ე წუთზე გაათანაბრა ფლავიო სილვამ, სწორედ ჟოტას საგოლე გადაცემით. იმ მატჩში ვასილ მაისურაძის გუნდის მხრიდან მონაწილეობას იღებდნენ ოთარ კიტეიშვილი, გიორგი ხარაიშვილი, ლუკა ზარანდია და სხვები. "ლუზიტანების" რიგებში კი რენატო სანჩესი ბრწყინავდა.
ეს იყო ლივერპულის თავდამსხმელის უკანასკნელი მატჩი პორტუგალიის 19-წლამდელთა ნაკრებში, რის შემდეგაც მან გადაინაცვლა 21-წლამდელებში, შემდეგ კი მთავარშიც, სადაც ერთა ლიგა 2-ჯერ მოიგო. ცნობისთვის, საქართველოსთან შეხვედრამდე, ედგარ ბორჟესის გუნდმა 6:1 თურქეთი გაანადგურა.
მერსისაიდელთა მე-20 ნომერმა იმ მატჩში გაიტანა გოლი და ორი საგოლე გადაცემაც გააკეთა. აღნიშნული თამაში ჩატარდა მიხეილ მესხი 2-ზე და ჩვენი სტატიის გმირის გარდა, პორტუგალიას იმ შეხვედრაში რუბენ დიაშიც ჰყავდა. ჟოტას კარიერა შესაძლოა ყოფილიყო ბევრად უფრო ნაყოფიერი, მაგრამ სამწუხაროდ, მეტის მიღწევა მან ვერ მოასწრო.
