დორტმუნდის ბორუსიამ გადალახა პარის სენ-ჟერმენის ბარიერი და გავიდა ევროპის ყველაზე პრესტიჟული საკლუბო ტურნირის ფინალში, ეს ყველაფერი გერმანელი უკანახაზელის გარეშე უბრალოდ შეუძლებელი იქნებოდა.
განმეორებით შეხვედრაში სწორედ ვესტფალიელთა ცენტრალურმა მცველმა გაიტანა ერთადერთი და გამარჯვების მომტანი გოლი. ამასთან ერთად, მან რამდენიმე საინტერესო მიღწევა დააფიქსირა. "შავ-ყვითლების" მე-15 ნომერი გახდა ყველაზე ასაკოვანი გერმანელი მოთამაშე, რომელმაც ევროპის ყველაზე პრესტიჟული საკლუბო ტურნირის პლეიოფში გაიტანა გოლი.
ზოგად რეიტინგს რაც შეეხება, ჰუმელსი არის მესამე ადგილზე, რაიან გიგსისა და ედინ ჯეკოს შემდეგ. პსჟ-ს კარის აღების მომენტში ის იყო 35 წლისა და 143 დღის. ამის გარდა, ეს იყო გერმანელი უკანახაზელის პირველი ბურთი ევროპის ყველაზე პრესტიჟულ საკლუბო ტურნირზე 2013 წლის თებერვლის შემდეგ.
მიუნხენის ბაიერნიდან წამოსვლისა და სიგნალ იდუნა პარკზე დაბრუნების შემდეგ, ყველაფერი ისე ვითარდებოდა, რომ მატსის კარიერის დასკვნით ნაწილს მშვიდად უნდა ჩაევლო, ხმაურიანი წარმატებების გარეშე, მაგრამ ვეტერანმა უკანახაზელმა კიდევ ერთხელ შეახსენა თავი საფეხბურთო სამყაროს. ედინ ტერზიჩის გუნდის ცენტრბექს ევროსარბიელზე მოპოვებული ტიტული ნამდვილად სჭირდება.
ის, რაც დორტმუნდის მე-15 ნომერმა ვერ აისრულა 11 წლის წინ, შესაძლოა ახლა ახდეს. ჩემპიონთა ლიგის ფინალში მისი გუნდის მოწინააღმდეგე მადრიდის რეალსა და "რეკორდმაისტერს" შორის ერთ-ერთი იქნება. ერთ მხარეს არიან მანუელ ნოიერი და ტომას მიულერი, მეორე მხარეს კი - ტონი კროოსი.
თუ ბავარიელი ვეტერანები აღარ არიან თავიანთ საუკეთესო კონდიციებში, "სამეფო კლუბის" ნახევარმცველის შესახებ სრულიად საპირისპირო ითქმის. დიახ, გერმანელი შუახაზელი ჯერ კიდევ გვაოცებს თავისი ოსტატობით, მან ეს დაგვანახა, როგორც მანჩესტერ სიტისთან ორრაუნდიან დაპირისპირებებში, ისე ალიანც არენაზე გამართულ პირველ მატჩიც.
გავიხსენოთ ვინისიუს ჟუნიორის გოლი, რომელიც სწორედ 34 წლის ცენტრალური ნახევარმცველის გენიალური გადაცემის შედეგად გავიდა. უკვე სამი წელია, რაც "ბლანკოსის" მე-8 ნომრის პასების სიზუსტის საშუალო მაჩვენებელი 91%-ს ქვემოთ არ ჩამოდის. იქამდე იყო 89%, მაგრამ როგორც ვხედავთ, ასაკის მატებასთან ერთად, კროოსი უფრო და უფრო იხვეწება.
ტომას ტუხელის გუნდთან შეხვედრაში გერმანელი ცენტრალური ნახევარმცველი ბურთს შეეხო 98-ჯერ, გადაცემების სიზუსტე კი 96%-ს შეადგენდა. კიდევ ერთი სტატისტიკური ფაქტი, რომელიც ხაზს უსვამს იმას, თუ როგორი დიდებული მოთამაშეა ტონი. შემთხვევითი არ არის, რომ ევრო 2024-ის დაწყებამდე, იულიან ნაგელსმანმა "ბუნდესნაკრებში" სწორედ ბერნაბეუზე მოთამაშე ვეტერანი შუახაზელის დაბრუნება მოითხოვა.
34 წლის ცენტრალური ნახევარმცველი დიდხანს ფიქრობდა, თუმცა ბოლოს თანხმობა განაცხადა. მოახლოებულ ევროპის ჩემპიონატზე ის იქნება "მანშაფტში", ნოიერსა და ჰუმელსთან ერთად. საოცარია, თუ სად შეგვახსენა თავი გერმანული ფეხბურთის ოქროს თაობამ, მაგრამ რეალურად, ისინი ყოველთვის აქ იყვნენ, უბრალოდ უფრო მეტად პოპულარული მოთამაშეების ჩრდილში.
