რა თქმა უნდა, მატჩის საუკეთესო ფეხბურთელი ბუდუ ზივზივაძე იყო, რომელმაც დუბლი გაიფორმა.
გთავაზობთ Lagazzetta.ge-ს მიერ მოთამაშეთა შეფასებებს:
გიორგი მამარდაშვილი (6.5): სასიამოვნოა, რომ ასეთი დონის მეკარის თამაშში ჩართვა არ დაგვჭირდა. ფაქტობრივად, ლუქსემბურგს რეალური მომენტი არ ჰქონია, მამარდაშვილმა კი თავის საქმე იდეალურად შეასრულა და დამაჯერებელი იყო.
ლაშა დვალი (6.0): დაცვით ასპექტში ჩვენს ნაკრებს შექება ეკუთვნის. მეტოქემ უმცირესი რაოდენობის მომენტი შექმნა, ეროვნულმა ნაკრებმა გოლი არ გაუშვა, მამარდაშვილს კი ცოტა საქმე ჰქონდა, რაშიც დიდი წვლილი დვალსაც მიუძღვის.
გურამ კაშია (6.5): საქართველოს ნაკრების კაპიტანმა თავისი მებრძოლი ხასიათი დღესაც გამოავლინა, ორთაბრძოლები მოიგო და ტრადიციულად, ნაკრებს ულიდერა.
საბა კვერკველია (6.5): შეიძლება თამამად ითქვას, რომ დაცვაში კვერკველია გამორჩეული იყო. მოიგო საჰაერო ორთაბრძოლები, გააკეთა წარმატებული ვარდნები და გრძელი პასებით თამაში რამდენჯერმე გაამწვავა.
ოთარ კაკაბაძე (7.0): აღსანიშნი და გამორჩეულია საქართველოს ნაკრების ფლანგის მოთამაშეების გარჯა. კაკაბაძემ მთელი მარჯვენა ფლანგი დაკეტა, შეტევაში კარგად ჩაერთო და სტაბილურად იდგა.
ლევან შენგელია (8.0): შენგელიამ ნაკრებში თავისი კარიერის განმავლობაში ერთ-ერთი საუკეთესო მატჩი ჩაატარა. საგოლე გადაცემის გარდა, შენგელია იმ პოზიციაზეც შეუცდომელი იყო, რომელიც რეალურად მისი არაა. მან მოწინაღმდეგის ყველაზე ტექნიკურ ფეხბურთელს გამწვავების საშუალება არ მისცა და ტაქტიკურ დავალებებს თავი იდეალურად გაართვა.
გიორგი ქოჩორაშვილი (7.5): შეიძლება ქოჩორაშვილი მოედანზე არ ჩანდა, თუმცა ცენტრში უდიდესი შავი სამუშაო შეასრულა. ბურთის ფლობის მაღალი პროცენტული მაჩვენებელი, სწორედ მისი დამსახურებაა.
ოთარ კიტეიშვილი (7.0): ქოჩორაშვილთან ერთად, დიდი შავი სამუშაო გასწია კიტეიშვილმაც, რომელმაც ყველაზე მეტი საკვანძო გადაცემა გააკეთა.
გიორგი ჩაკვეტაძე (7.5): კლასი, ელეგანტურობა და სისწრაფე - ჩაკვეტაძე დღეს ნაკრებს წარამტების მიღწევაში დაეხმარა. ბრწყინვალე გადაცემებით თამაში რამდენჯერმე გაამწვავა და მთელი შეხვედრა აქტიური იყო.
გიორგი მიქაუტაძე (6.5): მეტოქის მცველებს აქტიურად აწუხებდა, პრესინგზე კარგად თამაშობდა, მომენტებიც ჰქონდა, თუმცა გოლი ვერ გაიტანა. ცრუ ცხრიანის პოზიციაზე მიქაუტაძე სასარგებლო იყო.
ბუდუ ზივზივაძე (9.0): მატჩის საუკეთესო ფეხბურთელი, რომელმაც ბურთი ჯერ ძელს გაარტყა, შემდეგ კი არ დანებდა და დუბლი გაიფორმა. ზივზივაძემ თავისი ფორვარდული თვისებები გამოიყენა და საქართველოს ნაკრები ფინალში გაიყვანა.
