მანჩესტერ სიტის ოფიციალურმა ვებგვერდმა საქართველოსთან კავშირზე, გიორგი ქინქლაძეზე, კახაბერ ცხადაძეზე, მიხეილ ყაველაშილსა და მურთაზ შელიაზე საინტერესო სტატია შემოგვთავაზა. შეგახსენებთ, რომ აღნიშნული ოთხეული "ქალაქელების" შემადგენლობაში 90-იანი წლების მეორე ნახევარში თამაშობდა.
ქვეყანა ოთხ მილიონზე მცირე მოსახლეობით, შავ ზღვაზე გასასვლელითა და ფიფას რეიტინგში 74-ე ადგილით, მიმდინარე ევროპის ჩემპიონატის აღმოჩენად იქცა. საქართველოს ეროვნულმა გუნდმა ჯგუფური ეტაპის ბოლო ტურში მოუგო პორტუგალიის ნაკრებს, რითაც 1/8 ფინალის საგზური მოიპოვა.
"ჯვაროსნები" ამ შაბათ-კვირას როდრი ერნანდესის მრისხანე ესპანეთს დაუპირისპირდებიან. "ლურჯების" გულშემატკივრებისთვის ქართული ფეხბურთი უცხო მოვლენა სულაც არ არის. სიტის ამ ქვეყანასთან კავშირი ჯერ კიდევ სამი ათწლეულის წინ ჰქონდა, როდესაც გუნდის შემადგენლობაში, საერთო ჯამში, ოთხი ქართველი თამაშობდა.
ყველაფერი კი დაიწყო თბილისის დინამოდან წასული უნიჭიერესი ახალგაზრდა შემტევი ნახევარმცველით - საუბარია გიორგი ქინქლაძის შესახებ. მანჩესტერულ და ქართულ კლუბს შორის დაიდო შეთანხმება, ცოტა ხნის შემდეგ კი გიომ უელსის ეროვნულ გუნდს გაუტანა ისეთი გოლი, რომლის შემდეგაც სკაუტებმა ის თამაშის სტილით დიეგო მარადონას შეადარეს.
ქართველმა შემტევმა ნახევარმცველმა "დრაკონებს" 25 მეტრიდან გაუტანა და თავის ნაკრებს გამარჯვება მოაპოვებინა. ისტორიის თანახმად, ამ შეხვედრის სანახავად წასულები იყვნენ კოლინ ბელი და ტონი ბუკი, რომლებმაც გიორგის ჯადოქრობა ცოცხლად იხილეს. 73-ე წუთამდე ანგარიში 0:0 იყო, კაცნაკლულ უელსს ძალიან უჭირდა, ქინქლაძის გოლის შემდეგ კი მათთვის ყველაფერი დასრულდა.
მის ტრანსფერზე გამოიყო ორი მილიონი ფუნტი, რის შედეგადაც ის ოფიციალურად "ქალაქელი" გახდა. საქართველოს ეროვნული გუნდის გამთამაშებელი მალევე გახდა ქომაგთა ფავორიტი, მან საუთჰემპტონს გაუტანა ისეთი ბურთი, როგორიც "ლურჯების" ფანებს აქამდე ნანახი არ ჰქონდათ. ეს იყო საუკეთესო გოლი, რაც კი მეინ როუდის მოედანზე გასულა.
ქინქლაძემ თავისი საოცარი თამაშით მიიქცია ბარსელონას, ლივერპულისა და სელტიკის ყურადღება, სიტის ხელმძღვანელობა კი მთელი ძალებით ცდილობდა მის შენარჩუნებას. გიოს დარჩენის მიზნით, მანჩესტერულმა კლუბმა ინგლისში ჩამოიყვანა ყაველაშვილი, რომლის დებიუტი შედგა მეზობელ იუნაიტედთან და მან გოლიც გაიტანა.
ქართველი შემტევი ნახევარმცველის კარგი თამაშის მიუხედავად, "ქალაქელები" პრემიერ ლიგიდან გავარდნენ. ნიჭიერი ფლეიმეიქერი დარჩა, კლუბის მიზანი კი უმაღლეს დივიზიონში მალევე აღზევება იყო. რამდენიმე წლის შემდეგ, "ლურჯების" ლეგენდარული გამთამაშებელი თავისი გადაწყვეტილების შესახებ დეტალურად ისაუბრებს.
ქინქლაძემ სიტის მაისურით პრემიერ ლიგაში უკანასკნელი შეხვედრა ჩაატარა ლივერპულის წინააღმდეგ, მატჩი კი დასრულდა ფრედ, 2:2. ქართველმა ფეხბურთელმა მოედანი ცრემლების თანხლებით დატოვა, ამის მიზეზი კი იყო ის, რომ პრემიერ ლიგაში ადგილის შენარჩუნების შანსებმა მინიმუმამდე დაიწია.
"ამ გადაწყვეტილების მიღება რთული იყო. შემეძლო წასვლა, თუმცა დარჩენა ვამჯობინე. ჩემით ინტერესდებოდა ბარსელონა, მე კი მინდოდა სიტის დავხმარებოდი პრემიერ ლიგაში დაბრუნების საკითხში", - აცხადებდა ქინქლაძე. მანჩესტერულ კლუბში დარჩა ყაველაშვილიც, მაგრამ ის გუნდის თამაშზე გავლენის მოხდენას ვერ ახერხებდა.
იქმნებოდა ისეთი შთაბეჭდილება, თითქოს თუ შეაჩერებდი გიორგის, შეაჩერებდი "ქალაქელებსაც". სეზონის უკანასკნელი შეხვედრა მან ტრავმის გამო გამოტოვა, მაგრამ ქართველი გამთამაშებელი მეინ როუდზე მაინც იმყოფებოდა. ქომაგები მისულები იყვნენ საქართველოს დროშით, თავიანთ საყვარელ მოთამაშეს უმღეროდნენ სიმღერებს, ბანერზე კი ეწერა: "არ წახვიდე, გიო".
"ლურჯების" შემტევმა ნახევარმცველმა ამ სიყვარულს ვერ აქცია ზურგი და გუნდში კიდევ ერთი სეზონით დარჩენა გადაწყვიტა. ყაველაშვილის ექსპერიმენტმა ვერ გაამართლა, 29 მატჩში გატანილი 3 ბურთის შემდეგ, ის იჯარით გაუშვეს გრასჰოპერსში, მაგრამ მოიყვანეს კიდევ ორი ქართველი: ცხადაძე და შელია.
ახალმა "ჯვაროსნებმა" ინგლისურ ფეხბურთს ალღო მალევე აუღეს, თუმცა ამ ფაქტმა სიტი ვერ იხსნა მესამე დივიზიონში გავარდნისგან. აღნიშნული რამ კლუბის ისტორიაში პირველად მოხდა. ქინქლაძე რჩებოდა მანჩესტერული გუნდის ერთგულად, მაგრამ ეს ფაქტი ვერ დააფასა იმდროინდელმა თავკაცმა, ჯო როილმა, რის გამოც მას წასვლა მაინც მოუწია.
გიორგი გადავიდა ამსტერდამის აიაქსში, შემდეგ კი დერბი ქაუნთიში, თუმცა მას სხვა გუნდებში აღარ ჰქონია ისეთი შთამბეჭდავი პერიოდი, როგორიც სადებიუტო სეზონი "ქალაქელებში". კლუბში დარჩენილი იყო ორი ქართველი, ცხადაძე და შელია, მაგრამ დიდხანს არც ისინი გაჩერებულან. იმის შემდეგ, ქართველებს აღარ უთამაშიათ "ლურჯებში", თუმცა ფანები ამ ქვეყნის წარმომადგენლებს დღემდე იხსენებენ.
ოთხმა ქართველმა ფეხბურთელმა სიტის შემადგენლობაში ჩაატარა 181 შეხვედრა. ეს იყო ხუთწლიანი პერიოდი, როდესაც მეინ როუდის ტრიბუნაზე ქართული დროშა პერიოდულად ფრიალებდა. ცხადია, მათ შორის ყველაზე დიდი კვალი სწორედ ქინქლაძემ დატოვა, რომელიც მანჩესტერის ლურჯ ნაწილში საკულტო გმირად იქცა.
