მემორანდუმს ხელი La Gazzetta dello Sport Georgia-ს დამფუძნებელმა და SMH Sports-ის დირექტორმა, ლაშა მაჭავარიანმა და „დინამო თბილისის“ გენერალური დირექტორმა, ზაზა დოლიძემ მოაწერეს.
თანამშრომლობის ფარგლებში La Gazzetta dello Sport Georgia-ს აუდიტორია ყველაზე ტიტულოვანი ქართული გუნდის შესახებ სიახლეებს პირველი გაიგებს, იხილავს ინტერვიუებს სპორტსმენებთან, მწვრთნელებთან და გუნდის წარმომადგენლებთან.
ურთიერთანამშრომლობა მხოლოდ ძირითადი გუნდის გარშემო განვითარებული მოვლენებით არ შემოიფარგლება, ჩვენს ინოვაციურ პლატფორმებზე გიამბობთ ასაკობრივი გუნდებისა და „დინამო თბილისის“ საფეხბურთო აკადემიის შესახებ, გაგაცნობთ ნიჭიერ დინამოელებს. ასევე შეგახსენებთ ფაქტებსა და მოვლენებს „დინამო თბილისის“ ისტორიული გამარჯვებების შესახებ.
მხარეებს შორის თანამშრომლობის მიზანია, მეტი ჩართულობისა და ურთიერთქმედების ხელშეწყობა გულშემატკივრებსა და საფეხბურთო საზოგადოებას შორის.
მემორანდუმის საფუძველზე ორივე მხარე იღებს პასუხისმგებლობას, იზრუნოს ქართული ფეხბურთის განვითარების ხელშეწყობასა და აუდიტორიის მოზიდვაზე.
"მედიასთან თანამშრომლობა ძალიან დიდ როლს თამაშობს არა მხოლოდ ფეხბურთში, ზოგადად სპორტში. შესაძლოა, კლუბმა ვერ მოიძიოს გარკვეული ინფორმაცია, მედიამ და ჟურნალისტებმა კი ეს შეძლონ. ეს ყველაფერი ძალიან წაადგება კლუბს და ამიტომ, მნიშვნელოვანი საკითხია", - ოთარ გაბელია.
"დღეს არის ძალიან მნიშვნელოვანი დღე. გამომდინარე იქიდან, რომ ნიშანდობრივად დაემთხვა La Gazzetta-ს დაბადების დღეც. 128 წელი შეუსრულდა ამ ყველაზე ძველ მედია სპორტულ ბრენდს. დღეს გაფორმდა დინამოს საფეხბურთო კლუბსა და ორგანიზაციას შორის ურთიერთთანამშრომლობის მემორანდუმი.
ამ მემორანდუმის ფარგლებში ძალიან ბევრი სიახლე იგეგმება ქართველი გულშემატკივრებისთვის, კლუბისა და ფეხბურთის წარმოჩენისთვის, არა მხოლოდ საქართველოში, არამედ მის ფარგლებს გარეთაც. მოგეხსენებათ, La Gazzetta dello Sport Georgia-ს მთავარი იდეა ემსახურებოდა სწორედ ამას, რომ შექმნილიყო საერთაშორისო პლატფორმა, რომელიც ხელს შეუწყობდა ქართული ფეხბურთისა და სპორტის განვითარებას, ასე ვთქვათ, ამბების გატანას ქვეყნის ფარგლებს გარეთ.
La Gazzetta dello Sport Georgia მაქსიმალურად დაეხმარება დინამოს. ახალი ამბები, მომავლის გეგმები, წარმატებები, აკადემიის ფუნქციონირება, რაც უმნიშვნელოვანესი ლოკომოტივია ჩვენი ნაკრებისთვის, ამ ყველაფერში La Gazzetta dello Sport Georgia იქნება დინამოს ერთგული პარტნიორი. კლუბის ამბები მაქსიმალურად ეფექტურად იქნება გაშლილი და გატანილი", - ლაშა მაჭავარიანი.
"გაფორმდა ხელშეკრულება La Gazzetta dello Sport საქართველოსთან, რომელიც მოიცავს დინამო თბილისთან საერთაშორისო თანამშრომლობას. ძალიან დიდი გაზეთია, ძალიან დიდი ინტერნეტ მედიაა, რომლის დახმარებითაც მოხდება დინამოს თბილისის შესახებ ინფორმაციის მიწოდება ჩვენი ევროპელი მოსახლეობისთვისა და გულშემატკივრებისთვის.
ჩვენი ბოლოდროინდელი წარმატების შემდეგ, ძალიან დიდი ყურადღებაა საქართველოს მიმართ და გვიხარია, რომ დინამოსა და დინამოს აკადემიის კონტრიბუცია ამ ყველაფერში ძალიან დიდია. ჩვენ მიერ მომზადებული ფეხბურთელები ეროვნული ნაკრებისა და ასაკობრივი ნაკრებების ბირთვს ქმნიან.
აქედან გამომდინარე, ინტერესი დიდია და La Gazzetta dello Sport Georgia-სთან თანამშრომლობა უფრო ხელსაყრელს გახდის ინფორმაციის მიწოდების საკითხს საზოგადოების იმ ნაწილთან, რომელიც ევროპაშია", - ზაზა დოლიძე.
