ვინ წარმოიდგენდა, თუ ლოკომოტივში უნდობლობის შემდეგ, კვარაცხელია ჯერ რუბინში გაიბრწყინებდა, შემდეგ კი ნაპოლის მთავარი ლიდერი გახდებოდა, სერია ა-ში სეზონის საუკეთესო მოთამაშედ და ჩემპიონთა ლიგის სეზონის საუკეთესო ახალგაზრდა ფეხბურთელად დაასახელებდნენ.
ამ წარმატების უკან კი, გარდა ტალანტისა, უდიდესი შრომა და ის მენტალური მზაობაა, რომელიც კვარაცხელიას ამ დონეზე თამაშში დაეხმარა. ჯანსაღი მენტალობა დღევანდელი ფეხბურთელისთვის გადამწყვეტია, ხვიჩას თვისებებში ეს თავიდანვე იგრძნობოდა და ამაზე ერთ უცნობ ისტორიას მოგიყვებით:
მოგეხსენებათ, დინამო თბილისის აკადემიაში ყოველწლიურად ვიტალი დარასელიას სახელობის თასი ტარდება, სადაც სხვადასხვა ქვეყნის გამორჩეული გუნდების 16-წლამდე ფეხბურთელები ჩვენს დედაქალაქში ჩამოდიან და ამ ტურნირში მონაწილეობენ. ისეთი ფეხბურთელებიც ჩამოსულან, რომელთაც შემდეგ დიდი ფეხბურთი უთამაშიათ...
პირველად, ეს ტურნირი 2016 წელს ჩატარდა და მისი გამარჯვებული ალკმაარი გახდა. ფინალში მათ დინამო თბილისი დაამარცხეს, სადაც ასევე ჩვენთვის ცნობილი მოთამაშეები თამაშობდნენ - დავითაშვილი, ჩაკვეტაძე...თუმცა არა კვარაცხელია.
ტურნირის დაწყებამდე ისე მოხდა, რომ ერთ-ერთი ქვეყნის გუნდი თბილისში ვერ ჩამოვიდა და ორგანიზატორებს დინამო 2-ის დამატება მოუწია. კვარაცხელია დინამო 2-ში მოხვდა და ისეთი მაღალი დონის მატჩები ჩაატარა, რომ იქ მაყურებელი სკაუტებისა და მწვრთნელების ყურადღება მაშინვე მიიქცია. ამის შემდეგ დაიწყო კვარას აღზევება. ტურნირზე დინამო 2-მა მე-5 ადგილი დაიკავა, კვარაცხელიამ ლეხიას ულამაზესი გოლი გაუტანა, შემდეგ წელს კი უკვე ვიტალი დარასელიას თასზე დინამოს მთავარ გუნდთან ერთად ითამაშა და კახა კაჭარავამ იმ წელსვე დააწინაურა თბილისელთა მთავარ გუნდში, სადაც 17 წლის კვარაცხელიამ ეროვნულ ლიგაში გამოცდილი და მასზე დიდი ფეხბურთელების წინააღმდეგ ითამაშა.
კვარაცხელიას გოლი
"2017 წელს, აქცენტი ახალგაზრდა ფეხბურთელების დაწინაურებაზე გავაკეთე, მათ შორის იყო კვარაცხელია, რომელიც თავიდანვე დიდი ტალანტით გამოირჩეოდა. საჯარიმოში აგრესიული და ინდივიდუალისტი იყო. არ მახსოვს, რომ მასთან ვარჯიშზე ან თამაშზე პრობლემა მქონოდა, ყველაფერს პროფესიონალურად უდგებოდა. კვარაცხელია ნიჭიერი ფეხბურთელია, მაგრამ ფეხბურთით ცხოვრებას და ამ სპორტის თავისებურად მიდგომასაც ნიჭი უნდა, ამის გარეშე კარიერის აწყობა შეუძლებელია, ხვიჩას ეს ნიჭიც აღმოაჩნდა", - აცხადებს დინამო თბილისის მაშინდელი მწვრთნელი კახა კაჭარავა Lagazzetta.ge-სთან საუბრისას.
დღესდღეობით, კვარაცხელია ყველაზე დიდ გუნდში ირიცხება და ერთ-ერთი წარმატებული მოთამაშეა იმ ფეხბურთელებთან შედარებით, რომლებმაც 2016 წელს დარასელიას თასზე ითამაშეს, მათ შორის ჩემპიონი ალკმაარის მოთამაშეებთან შედარებითაც. ცნობისთვის, თანამედროვეობის კიდევ ერთი გამორჩეული ქართველი ფეხბურთელი, გიორგი მამარდაშვილიც 16-წლამდე დინამო თბილისის დუბლშემადგენლობაში იყო და გუნდს პენალტების სერიაში მოაგებინა, თუმცა, კვარაცხელიასგან განსხვავებით, მამარდაშვილს დინამო თბილისის დიდ გუნდში თამაშის საშუალება არასდროს ჰქონია.
დუბლშემადგენლობაში თამაში, გამოყენებული შანსი, გაოცებული მწვრთნელები - 16-წლამდე გუნდის დუბლებიდან მსოფლიო დონის ვარსკვლავობამდე ერთი ნაბიჯია. ნაბიჯი, რომელიც უდიდესი შრომის ნაყოფია.
ფოტო: FC DINAMO TBILISI
