კვარა პსჟ-ში, ბუდუ ბუნდესლიგაში, მიქაუტაძე ტოპ 5-ში - ქართველების ახალი გამოწვევები და ამჟამინდელი სიტუაცია

მიმდინარე ზაფხული ტრანსფერების მხრივ, ყველაზე ცხელი იქნება ქართული ფეხბურთისთვის, რადგან საქართველოს ნაკრების ფეხბურთელები იმ ეტაპზე არიან, რომ გადაწყვეტილება უნდა მიიღონ, როგორ განვითარდება მათი კარიერა.

განვიხილოთ, რა სიტუაციაში არიან ამჟამად ისინი, უნდა გადავიდნენ თუ არა ახალ კლუბებში და აქვთ თუ არა შემოთავაზებები.

ბოლო პერიოდის ყველაზე აქტუალური თემა ხვიჩა კვარაცხელიას პსჟ-ში შესაძლო გადასვლაა. პსჟ-მდე, კვარას შეძენა ბარსელონას სურდა, თუმცა კატალონიელები იმ თანხის გადახდას ვერ ახერხებდნენ, რაც კვარას სატრანსფერო ფასია. პსჟ კი ყველაფერზე თანახმაა და მზადაა პირადი კონტრაქტიც დაუდოს ფეხბურთელს, თუმცა კვარას ნაპოლისთან ხელშეკრულება 2027 წლამდე აქვს, ახალი მწვრთნელი, ანტონიო კონტე, გუნდის აწყობას ქართველის გარშემო გეგმავს და დე ლაურენტისს მოუწოდებს, კვარა შეინარჩუნოს. გეგმაშია ნაპოლისთან ახალი კონტრაქტის გაფორმება და ხელფასი 5 მილიონი ევროს ოდენობით.

ყოველ წელს ვამბობთ, რომ კიტეიშვილი შტურმისთვის და ავსტრიის ჩემპიონატისთვის გადაიზარდა და ეს წელსაც დამტკიცდა. კიტეიშვილი ავსტრიის ბუნდესლიგის საუკეთესო ფეხბურთელი და ქვეყნის ჩემპიონი გახდა. ლოგიკურია, რომ მას შემოთავაზებები ექნება, მაგრამ შტურმი მის შენარჩუნებას ცდილობს და კონტრაქტის გაუხანგრძლივა. 28 წლის ფეხბურთელი რომ შტურმში წელსაც დარჩეს, მისაღები იქნება, რადგან შტურმი ჩემპიონთა ლიგის ჯგუფურ ეტაპზე ითამაშებს და ქართველს ევროპის ყველაზე პრესტიჟულ ტურნირზე შეეძლება თავის გამოჩენა.

მეცმა მიქაუტაძე აიაქსიდან გამოისყიდა, მაგრამ ეს იმას არ ნიშნავს, რომ მომავალ სეზონშიც ამ გუნდში იქნება. მცდელობის მიუხედავად, მეცმა ლიგა 1-ში ადგილი ვერ შეინარჩუნა და გავარდა. მიქაუტაძემ 14 გოლი გაიტანა და გუნდში გამორჩეული იყო. შესაბამისად, მისი გუნდიდან წასვლა გარდაუვალი იქნება. ქართველი ფორვარდის შეძენით ლიგა 1-ის კლუბები ინტერესდებიან. ყველაფერი იქითკენ მიდის, რომ მიქაუტაძე ნაცნობ გარემოს, ნაცნობ ჩემპიონატს არ გასცდება და მომავალ სეზონშიც საფრანგეთში ვიხილავთ. 

მსოფლიოს ერთ-ერთ გამორჩეულ მეკარეს წელს საოცარი სეზონი ჰქონდა. 99%-ით გადაწყვეტილია, რომ მამარდაშვილი წელს ვალენსიას დატოვებს. ყველაზე რეალური ინტერესი ნიუკასლიდანაა, პრემიერ ლიგის კლუბიდან უკვე ოფიციალური შემოთავაზებაცაა. ინტერესია ატლეტიკოდანაც, მაგრამ ეს იმ შემთხვევაში მოხდება, თუ იან ობლაკი მადრიდულ კლუბს დატოვებს და ატლეტიკო მეკარის ძიებაში იქნება. მამარდაშვილის გარდა, ატლეტიკო რეალის მეკარის, ანდრეი ლუნინის იჯარით დამატებასაც განიხილავს. მამარდას ნიუკასლში გადასვლა მისი კარიერისთვის იდეალური იქნება, რადგან იქაც თავს გამოიჩენს. როცა პრემიერ ლიგის საშუალო დონის გუნდში გამორჩეული მეკარე ხარ, პოტენციურად ინგლისური გრანდის სამიზნეში ხარ, ამის ბევრი მაგალითი არსებობს. მაგალითად, დავიდ რაია, რომელიც ბრენდტფორდში თამაშობდა და დღეს არსენალის ძირითადი შემადგენლობის მეკარეა.

სეზონის არც თუ ისე წარმატებული სტარტის შემდეგ, ბოლო პერიოდში დავითაშვილმაც მოუმატა და ბორდოს ერთ-ერთ ლიდერად იქცა. დავითაშვილი ბორდოში იმ შემთხვევაში უნდა დარჩეს, თუ ზაფხულში ისეთი გუნდი შეიკვრება, რომელიც ლიგა 1-ში დაბრუნებისთვის იბრძოლებს და სამეულში გასვლის პოტენციალი ექნება. მოგეხსენებათ, ბორდომ დავითაშვილის კოტნრაქტი ახლახანს გამოისყიდა და ხელშეკრულება 2027 წლამდე აქვს.

ანალოგიური სიტუაციაა ზივზივაძის შემთხვევაშიც. ბუდუს ბუნდესლიგა 2-ში კარგი სეზონი ჰქონდა, 12 გოლი გაიტანა და ბუნდესლიგის გუნდების ინტერესის სფეროში მოექცა. ზივზივაძის კარიერას რომ გადავხედოთ, ყველა გუნდში ადაპტაციის გავლისთვის დიდი დრო სჭირდება ხოლმე და ბოლოსკენ იხსნება. ასე იყო კარლსრუეშიც. სეზონის მძიმე სტარტის შემდეგ, დღეს ის გუნდის ერთ-ერთი ლიდერია. თუ კარლსრუე ბუნდესლიგაში გადასვლისთვის იბრძოლებს, ბუდუ ამ გუნდში აუცილებლად დარჩება და ამ წარმატებაში თავის წვლილსაც შეიტანს.

ჩაკვეტაძეს სამომავლო გეგმებზე საფიქრალი არ აქვს, რადგან ბევრი სირთულის შემდეგ, დიდ ფეხბურთს დაუბრუნდა, თავისთვის იდეალური კლუბი და ლიგა იპოვნა, უოტფორდს მოერგო და კონტრაქტიც გააფორმა. მომავალი სეზონი ჩაკვეტაძისთვის შედეგიანობითაც წარმატებული უნდა იყოს. აღსანიშნავია, რომ ტრავმების შემდეგ, ამჟამად ჩაკვე კარგ ფიზიკურ კონდიციებშია. მას უოტფორდთან კონტრაქტი 2027 წლამდე აკავშირებს.