უკვე 1 თვეა რამაზ სვანაძე და მისი შემადგენლობა ამ ისტორიული მატჩისთვის აქტიურად ემზადება. მეტოქის გაგების დღიდანვე, სვანაძე მათ შესწავლას შეუდგა და განიხილა, რა უნდა დაუპირისპიროს ძლიერ ხორვატიას.
რა სიტუაციაა U21 ნაკრებში მატჩამდე 1 კვირით ადრე? - რამდენიმე ფეხბურთელთან ამ მატჩთან დაკავშირებით საუბრები გვქონდა და აშკარად იგრძნობა, რომ ყველა განსხვავებულად და ორმაგი მოტივაციით ემზადება.
"ბევრჯერ დამტკიცდა, რომ საქართველოს ნაკრებს ყველასთან თამაში შეუძლია და გამონაკლისი არც ხორვატიაა. ამ თამაშებისთვის უკვე ვემზადებით. ერთი ისტორია დავწერეთ და ევროპის ჩემპიონატის ფლეიოფში გავედით, ახლა მიზანი ჯგუფურ ეტაპზე გასვლა და ქართველი გულშემატკივრის კიდევ ერთხელ გახარებაა. საერთოდ არ მივიჩნევთ, რომ რომელიმე ნაკრები ჩვენზე მაღლა დგას. ნაკრებისთვის ყოველთვის განსაკუთებულად ვემზადები ხოლმე, ახლა კი მით უმეტეს. მთელი დღეები ამ თამაშზე ვფიქრობ და სხვანაირად ვემზადები - იქნება ეს რეჟიმის დაცვა, სწორი კვება, თუ ვარჯიშები. ამ დიდ თამაშებამდე 1 თვეც არაა დარჩენილი.", - გიორგი კვერნაძე LaGazzetta.ge-სთან.
აღსანიშნავი და სასიხარულოა, რომ ახალგაზრდული ნაკრების მთავარ მეკარეს, ლუკა ხარატიშვილს დინამო ბათუმში სათამაშო პრაქტიკა აქვს, განსხვავებით წინა შეკრებებისგან. მეკარისთვის რომ სათამაშო პრაქტიკა უმთავრესია, ეს არახალია.
რაც შეეხება დაცვის ხაზს, ნაკრების კაპიტანმა საბა ხვადაგიანმა ბოლო ერთ თვეში დინამოს მაისურით ყველა მატჩი ითამაშა და გოლიც გაიტანა, განსხვავებით მაისურაძისგან, რომელსაც ჩრდ.მაკედონიასთან თამაშის შემდეგ არ უთამაშია, თუმცა მის პოზიციაზეა თორნიკე მორჩილაძეა, რომელიც თელავის ლიდერია. შახტარის მაისურით ერთი მატჩი ჩაატარა ირაკლი აზაროვმაც.
"პირველი საშინაო მატჩი მნიშვნელოვანია, რადგან განმეორებითი მატჩის წინ კომფორტული ანგარიში უნდა დავაფიქსიროთ. ამ მატჩებისთვის აქტიურად ვემზადებით. როგორც კაპიტანი, ჩემთვის ეს ორმაგი პასუხისმგებლობაა და ყველაფერს გავაკეთებთ, რომ სტადიონზე მოსული გულშემატკივარი გავახაროთ. თამაში ყველასთან შეგვიძლია", - U21 ნაკრების კაპიტანი საბა ხვადაგიანი LaGazzetta.ge-სთან.
ლომინაძე, გაგნიძე, ოთარ მამაგეიშვილი - ნაკრების ნახევარდაცვის ხაზი ხორვატიასთან მატჩს სრულ მზადყოფნაში ხვდება. მამაგეიშვილმა იბერიას რიგებში 2 გოლი გაიტანა და გუნდის ერთ-ერთი ლიდერია. სასიხარულოა, რომ ტრავმის შემდეგ მოედანს მისი ძმა, გიზო მამაგეიშვილიც უბრუნდება. გორის დილას ლიდერობს ჩრდ.მაკედონიასთან გადამწყვეტი გოლის ავტორი ნოდარ ლომინაძე.
რაც შეეხება შემტევ ხაზს, ბრწყინვალე ფორმაშია რიგასის ახალგაზრდა შემტევი ლაშა ოდიშარია, რომელიც რამდენიმე დღის წინ, ევროპა ლიგაზე, ანდერლეხტის წინააღმდეგ თავის გუნდში საუკეთესო იყო. გიორგი კვერნაძემ კი სერია ბ-ში ფროსინონეს რიგებში სასტარტო შემადგენლობაში თავისი ადგილი იპოვნა.
"რაც უფრო ცოტა დრო რჩება, მღელვარება მით უფრო იმატებს, ამ მატჩებისთვის ყველა ვემზადებით. ჩვენი მიზანია, რომ გულშემატკივარი თამაშით ვასიამოვნოთ, გავახაროთ და გავიდეთ ევროპის ჩემპიონატზე. მეტოქეზე ვიტყვი, რომ ცალსახად ძლიერი ნაკრებია და ჩვენთვის კარგი და საინტერესო გამოწვევა იქნება", - ოთარ მამაგეიშვილი LaGazzetta.ge-სთან.
გარდა ფეხბურთელებისა, ამ დაპირისპირებაში დიდი მნიშვნელობა ექნება მწვრთნელის ფაქტორს. რამაზ სვანაძე ახალგაზრდა, პროგრესული მწვრთნელია, რომელსაც მეტოქეების კარგად შესწავლა და ამ ინფორმაციის თავის ფეხბურთელებამდე მიტანა შეუძლია. დანარჩენი მოედანზე გამოჩნდება.
