სანაკრებო პაუზის წინ, ქართველმა ფეხბურთელებმა თავიანთ გუნდებში კარგი შედეგები დააფიქსირეს.
ხვიჩა კვარაცხელიას ნაპოლიმ პარმა 2:1 დაამარცხა. მიუხედავად იმისა, რომ ქართველ შემტევს გოლი არ გაუტანია, გამორჩეული იყო, ბევრი მომენტი ჰქონდა და 8.4 შეფასებაც მიიღო. კვარაცხელია სერია ა-ს ტურის სიმბოლურ გუნდში კიდევ ერთხელ მოხვდა.
კარლსრუეს ფორვარდი ბუდუ ზივზივაძე კიდევ ერთხელ გახდა მატჩის გმირი. კარლსრუე ბრაუნშვაიგს დაუპირისპირდა და სტუმრად 1:2 გაიმარჯვა. ბოლო წუთებზე გამარჯვების გოლი სწორედ ზივზივაძემ გაიტანა. მიმდინარე სეზონში ბუდუს ანგარიშზე 4 გოლია და საუკეთესო ბომბარდირთა შორისაა.
ავსტრიის მოქმედმა ჩემპიონმა და წლის საუკეთესო ფეხბურთელმა ოთარ კიტეიშვილმა ეს სეზონიც კარგად დაიწყო. შტურმი ტიროლის დაუპირისპირდა და 4:2 დაამარცხა. კიტეიშვილის ანგარიშზე გოლი და საგოლე გადაცემაა.
ეროვნულ ნაკრებში ახლახანს უხმეს 20 წლის მცველს საბა გოგლიჩიძეს. ამის მიზეზი კი ისაა, რომ სერია ა-ს გასულ ტურში ბოლონიას წინააღმდეგ უმაღლესი დონის მატჩი ჰქონდა. გოგლიჩიძის ემპოლი ბოლონიას დაუპირისპირდა და ფრედ 1:1 ითამაშა. ქართველი მცველი ამ მატჩში თითქმის უშეცდომო იყო.
დანიის ჩემპიონატის ტურის ცენტრალურ მატჩში კოპენჰაგენი ბრონდბიუს დაუპირისპირდა და საკუთარ მოედანზე 3:1 დაამარცხა. ძირითად შემადგენლობაში იყო კოპენჰაგენის ქართველი მცველი გიორგი გოჩოლეიშვილი, რომელმაც პრინციპული მეტოქის წინააღმდეგ მაღალი დონის შეხვედრა ჩაატარა.
