2022 წლის 27 იანვარს კი ქართველმა საყრდენმა ნახევარმცველმა სანაკრებო კარიერის დასრულების შესახებ გააკეთა განცხადება. 100 ჩატარებული შეხვედრა "ჯვაროსნებში" და 10 გატანილი ბურთი, ასეთი მონაგარით დატოვა ბრატისლავის სლოვანის ჩამშლელმა ეროვნული გუნდი. მატჩების რაოდენობის მხრივ, 37 წლის შუახაზელზე წინ, 110 თამაშით, მხოლოდ გურამ კაშია არის.
როგორც ვხედავთ, თითქმის სამწლიანი პაუზის შემდეგ, სლოვაკური გუნდის მეოცე ნომერი თეთრ-წითელ მაისურს კვლავ ჩაიცვამს. რა შეიცვალა საქართველოს ნაკრებში კანკავას წასვლიდან დღემდე? მნიშვნელოვნად არაფერი, ვილი სანიოლის მიერ განხორციელებულ ტაქტიკურ ექსპერიმენტებსა და რამდენიმე ახალი მოთამაშის გამოჩენას თუ არ ჩავთვლით.
ერთი სიტყვით, ეროვნულ გუნდში თაობათა ცვლის პროცესი მიმდინარეობს. ქართველმა საყრდენმა ნახევარმცველმა თავისი წასვლით გზა დაუთმო ახალ თაობას, მაგრამ უმნიშვნელოვანესი მატჩის წინ, მხოლოდ ახალი სისხლი და ენთუზიაზმი არ არის საკმარისი, ჩვენს ნაკრებს ასევე სჭირდება გამოცდილება, პაზლის ამ ნაწილს კი სწორედ აღნიშნული სტატიის გმირი შეავსებს.
ჯაბამ "ჯვაროსნებში" 17 წელი გაატარა, გამოიარა უამრავი რთული და სტრესული მომენტი. მის გზაზე იყო როგორც გოლი გერმანიის კარში, ასევე ხორვატიისა და ზემოთ ხსენებული შვედეთის დამარცხებით გამოწვეული სიხარული, მაგრამ სამწუხაროდ, ამ ყველაფერთან ერთად, მოედანზე განცდილი არაერთი იმედგაცრუებაც.
ბრატისლავური გუნდის საყრდენმა ნახევარმცველმა არაერთხელ გამოცადა ის, თუ რას ნიშნავს, როდესაც შენი ნაკრები მთავარი საერთაშორისო ტურნირების მიღმა რჩება. რაც არ უნდა ყოფილიყო, ჭირი თუ ლხინი, ფაქტად რჩებოდა ერთი რამ, თეთრ-წითელ ფერებში შემოსილი 7 ნომერი მოედანზე ყოველთვის თავის მაქსიმუმს დებდა.
პირველ რიგში, 37 წლის საყრდენი ნახევარმცველი მოედანზე საბრძოლოდ გამოდიოდა და ეს სულისკვეთება მან დღემდე შეინარჩუნა. არ ჰქონდა მნიშვნელობა მატჩი იყო ამხანაგური თუ სატურნირო, კანკავასთვის მოედანზე გატარებული თითოეული წუთი უპრინციპულესი იყო. სწორედ ამ სულისკვეთების დანერგვისთვის დაბრუნდა ქართველი ჩამშლელი.
სანიოლის გუნდი ახალგაზრდა ფეხბურთელებით არის დაკომპლექტებული, რაც, რა თქმა უნდა, ძალიან კარგია. რამდენიმე მათგანი ევროპის ტოპ ლიგების ფეხბურთსაც ეზიარა. მათ არსენალშია სისწრაფე და თანამედროვე ხედვა, მაგრამ ზეწოლის ქვეშ თამაშის ფაქტორი ახალგაზრდა მოთამაშის ნომერ პირველი მტერია.
ზეწოლა კი მართლაც უდიდესია, საქართველოს ნაკრები ხომ ევროპის ჩემპიონატისკენ მიმავალ გზაზე დგას. ჯაბა იქნება ერთგვარი ფარი, რომელიც ახალგაზრდა თანამემამულეებს ფსიქოლოგიური სტრესისა და ჩაკეტილობის დაძლევაში დაეხმარება. ვახსენეთ სლოვანის ჩამშლელის კოლოსალური გამოცდილება და ზეწოლის მიმართ არსებული იმუნიტეტი, მაგრამ ეს ყველაფერი არ არის.
სლოვანის ოცი ნომერი შესანიშნავ ფიზიკურ ფორმაშია და ამაზე მისი სტატისტიკა და ვლადიმირ ვაისის კომენტარიც მეტყველებს. მიმდინარე სეზონში მან უკვე მოასწრო 39 მატჩის ჩატარება. განსაკუთრებულად გვინდა გამოვარჩიოთ თებერვლის პერიოდი, სადაც 37 წლის ჩამშლელმა 20 დღის შუალედში ჩაატარა 6 თამაში, ისე რომ 5 შემთხვევაში ის მოედანზე 90 წუთის მანძილზე იმყოფებოდა.
"კანკავას ერთ თვეში უსრულდება 38 წელი, თუმცა ის ყოველ მესამე შეხვედრაში თამაშობს", - ამბობს სლოვაკი მწვრთნელი.
ის ფაქტი, რომ ასაკი ქართველი ჩამშლელისთვის მხოლოდ ციფრებია, დაინახეს საქართველოს ფეხბურთის ფედერაციაშიც და ეროვნული გუნდის ძველი მებრძოლი დააბრუნეს იქ, სადაც ის ყველაზე მეტად არის საჭირო.
