ამ თემის წერა კვარათი იმიტომ დავიწყეთ, რომ მატჩისწინა ვარჯიშზე ის საკმაოდ აქტიური იყო, კარგი განწყობა ჰქონდა და უკრაინასთან მატჩისთვის დიდი მოტივაციით ემზადებოდა, რადგან იცის, თუ რამხელა როლი აქვს მის კარგ თამაშს ნაკრების შედეგზე.
კვარას გარდა, ყველა პოზიტიურ განწყობაზე იყო და თითქოს, როგორც დაგვპირდნენ, ის წინა 2 მატჩი დავიწყებულიც ჰქონდათ. დვალისა და გოგლიჩიძის არყოფნაში სანიოლს ბევრი საფიქრალი აქვს, თუ როგორ გაამაგროს დაცვის ხაზი.
არ შეიძლება არ აღვნიშნოთ გიორგი მამარდაშვილი, რომელიც ვარჯიშებზეც საოცარ ნახტომებს და სეივებს გვთავაზობს. ვარჯიშებზე კიდევ უფრო კარგად ჩანს, რომ მისი შესაძლებლობები უსაზღვროა და დღითიდღე კიდევ უფრო პროგრესირებს.
ვარჯიშის დღეს, ბათუმში მზიანი ამინდი იყო, მაგრამ რა იქნება თამაშის დროს, არავინ იცის. რაც მთავარია, ბალახი ნორმალურ მდგომარეობაშია და ის განგაში, თითქოს ბათუმი არენაზე ბალახის საფარი ცუდ მდგომარეობაში იყო, სიმართლეს არ შეესაბამება.
ქალაქში საფეხბურთო განწყობაა. ყველამ იცის, რომ ბათუმში დღეს საქართველოს ნაკრები თამაშობს. სამარშუტო ტაქსიში, კვების ობიექტებსა თუ ბულვარში, სულ ნაკრების თამაშის განხილვა და აზრების გაცვლა მიდის. თითქოს, ბათუმელები მოწყურებულები არიან ქართველი ვარსკვლავების ნახვას. თან, ევროპის ჩემპიონატზე მონაწილის სტატუსით ბათუმში ისინი პირველად წარსდგებიან.
ვარჯიშის დასრულების შემდეგ, ფეხბურთელები სასტუმროში დაბინავდნენ, ჩვენი ახალგაზრდული ნაკრების თამაშს უყურეს და ორმაგი მოტივაცია მიეცათ, რომ უკრაინასთან გულშემატკივარი ისე გაახარონ, როგორც ეს 21-წლამდელებმა გააკეთეს.
დღეს ხვიჩა "მატჩის გმირად" უნდა მოგვევლინოს. ვარჯიშის შემდეგ ის ღირსეული საქციელით გამოირჩა, ათობით გულშემატკივართან მივიდა და ფოტოები ყველასთან სათითაოდ გადაიღო, ხელმოწერები დაარიგა და მომავალი თაობა გაახარა.
