დღეს, ფელბერტში შედარებით თბილი ამინდი იყო. ისეთი, ფეხბურთელებს ვარჯიში რომ უყვართ ხოლმე. ფელბერტის მთავარ კოშკურაზე 4-ის ნახევარს აჩვენებს, რაც იმას ნიშნავს, რომ საქართველოს ნაკრების ფეხბურთელებმა მზადება უნდა დაიწყონ, სასტუმროს მისაღებში ჩავიდნენ და ნელ-ნელა სტადიონისკენ აიღონ გეზი.
გარდა ეროვნული ნაკრების სასტუმროს შემოგარენში აღჭურვილი ქართული აბრებისა, ფელბერტის ცენტრალურ ქუჩებშიც ხშირად ვხვდებით საქართველოს დროშებს.
ვარჯიში ფიზ.მომზადების მწვრთნელმა დაიწყო, რომელმაც ფეხბურთელებს რამდენიმე ფიზიკური აქტივობა გააკეთებინა, რის შემდეგაც მოთამაშეები ბურთით ვარჯიშზე გადავიდნენ.
სანამ ვარჯიში დაიწყებოდა, საშუალება მოგვეცა საქართველოს ნაკრების ფეხბურთელებთან, ბუდუ ზივზივაძესა და ოთარ კაკაბაძესთან ინტერვიუ ჩაგვეწერა.
ნაკრების ვარჯიშს ერთ-ერთი თურქი ჟურნალისტიც დაესწრო და ოთარ კაკაბაძესთან პირადი საუბარი ჰქონდა. ჟურნალისტი კაკაბაძეს ტაქტიკურ ანალიზზე ესაუბრებოდა და ეკითხებოდა, 5 მცველის ტაქტიკით ხომ არ ითამაშებს საქართველო, რაზეც კაკაბაძემ სახალისო პასუხი გასცა, ალბათ თურქების მონახაზსაც მეტყვი და ტაქტიკების გაცვლას აპირებო.
ტრადიციულად, კარგ განწყობაზეა ბუდუ ზივზივაძე, რომლისთვისაც გერმანული ჰავა და აქაური გარემო უცხო არ არის. ბუდუმ მთელი გასული სეზონი გერმანიაში ითამაშა.
ვარჯიშის ბოლოს, ფეხბურთელები 4 გუნდად გაიყვნენ და ერთმანეთში ითამაშეს, რაც კლუბებშიც და ნაკრებშიც მიღებული წესია ხოლმე, რათა ფეხბურთელებს მეტი ხალისი ჰქონდეთ.
დღევანდელი დღის გამარჯვებული გუნდი ზურიკო დავითაშვილისაა, რომლის შემადგენლობაში გიორგი ქვილითაია, გაბრიელ სიგუა, გიორგი გველესიანი, ლევან შენგელია, ანზორ მექვაბიშვილი და ოთარ კაკაბაძე არიან.
ვარჯიშის შემდეგ საქართველოს ნაკრების კაპიტანი, გურამ კაშია ვარჯიშზე განცდილი მარცხის გამო განაწყენებული იყო და ამბობდა, მთელ 4 თამაშში ერთი გოლი გავუშვით და მაინც ბოლო ადგილზე გავედითო. ზურიკო კი თავისი გუნდის მოგებით ისეთივე ამაყი დადიოდა, როგორც ეს 18 ივნისს, თურქეთთან მოგების შემდეგ იქნება.
