ახალგაზრდა ნახევარმცველს ანზორ მექვაბიშვილს ევროპის ჩემპიონატზე ყველაზე საპასუხისმგებლო მისია შეხვდა - შეცვალა საქართველოს ნაკრების ხერხემალი ოთარ კიტეიშვილი. ამ მისიას მექვაბამ თავი ბრწყინვალედ გაართვა და კარგი მატჩები ჩაატარა.
მექვაბიშვილი რუმინულ კრაიოვაშიც სტაბილურად თამაშობდა, გოლიც გაიტანა, თუმცა აგვისტოს ბოლოს მძიმე ტრავმა მიიღო და იმის შემდეგ, არ უთამაშია.11 ტურის შემდეგ, მექვაბიშვილის გუნდი 19 ქულით მეორე პოზიციაზეა და ჩემპიონობისთვის იბრძვის.
ევრო 2024-ზე მან ჩეხეთთან და თურქეთთან ძირითად შემადგენლობაში ითამაშა, პორტუგალიასთან კი შეცვლაზე შევიდა. დაფარულ მანძილებში მექვაბამ ერთ-ერთი ყველაზე მაღალი შედეგი დააფიქსირა.
LaGazzetta.ge-სთან
ინტერვიუში მექვაბიშვილმა თავის ამჟამინდელ მდგომარეობასა და ეროვნულ ნაკრებზე ისაუბრა.
"მკურნალობის პროცესი კარგად მიმდინარეობს, მსუბუქი ვარჯიში და ძუნძული უკვე დავიწყე, მალე ბურთთან ერთად ვარჯიშსაც განვაახლებ. უახლოეს მომავალში ფეხზე კიდევ ერთხელ შემამოწმებენ და ამის შემდეგ მეცოდინება, როდის დავუბრუნდები მოედანს.
"ეს პერიოდი მენტალურად საკმაოდ რთული იყო, მაგრამ ყველაფერი მალევე გავათვითცნობიერე და ტრავმის მიღებიდან რამდენიმე დღეში უკვე ფიქრი იმაზე დავიწყე, რომ რაც შეიძლება მალე დავბრუნდე. რთულია, როცა ტრავმას ისეთ პერიოდში იღებ, როცა თამაშობ და ფორმაში ხარ, თუმცა ტრავმაც ფეხბურთის ნაწილია. ჩემი მიზანია, მოედანს რაც შეიძლება მალე დავუბრუნდე და კვლავ ძველებურად ვითამაშო."
ჩვენი ნაკრების წინა მატჩებს თვალი მიადევნე...როგორ შეაფასებდი?
"მიხარია, რომ ჩვენმა ნაკრებმა ერთა ლიგის ახალი ციკლიც წარმატებით დაიწყო და ორიდან ორივე მატჩი მოიგო. ვფიქრობ, აქაც შეგვიძლია, რომ ჩვენი სათქმელი ვთქვათ და წარმატებას მივაღწიოთ. ბედნიერი ვარ, რომ იმ საქართველოს ნაკრების წევრი ვიყავი, რომელმაც მთელი ერი გაახარა. ჩემთვის ორმაგი მოტივაციაა, რომცა შენი თამაშით ამდენი ხალხი ბედნიერდება. იმაზე ძლიერი უნდა დავბრუნდე, ვიდრე აქამდე ვიყავი."
რა სიტუაციაა შენს გუნდში და რა არის კრაიოვას მიზანი?
"ამ სეზონის მცირე მონაკვეთში ჩავარდნა გვქონდა, თუმცა ჩვენმა გუნდმა იპოვა ძალა, რათა დაბრუნებულიყო, ახლა ყველაფერი კარგადაა, მეორე პოზიციაზე ვართ და მთავარი მიზანი ჩემპიონობაა."
გასაკვირი არაა, რომ მექვაბიშვილი ყველაზე ახლოს კვარასთან და დავითაშვილთანაა. ისინი ბავშვობიდან დინამო თბილისის ასაკობრივ გუნდებში და ნაკრებებში ერთად თამაშობდნენ.
"ნაკრებში ყველასთან კარგად ვარ, თუმცა განსაკუთრებით კვარა, ზუკა და მამარდა, რადგან ბავშვობიდან ერთად ვთამაშობდით, ვცხოვრობდით და ყველა ასაკობრივი ნაკრები ერთად გამოვიარეთ."
სამომავლო გეგმებზე...
"ყველა ფეხბურთელის მიზანია, რომ წინ იაროს და განვითარდეს. დღეს, კრაიოვას წევრი ვარ და ჩემი მთავარი საფიქრალი მოედანზე რაც შეიძლება მალე დაბრუნება და თამაშია. რა იქნება შემდეგ, ამას მომავალი გვიჩვენებს."
