ცოტა ხნის წინ, საქართველოს ნაკრების მთავარმა მწვრთნელმა ვილი სანიოლმა იმ ფეხბურთელების ვინაობა დაასახელა, რომლებიც ამხანაგურ მატჩებში, ისრაელისა და ლიეტუვის ნაკრებების წინააღმდეგ მიიღებენ მონაწილეობას.
სიაში დებიუტანტია - ფრანგმა სპეციალისტმა შტურმის შემტევს, გიზო მამაგეიშვილს უხმო.
მამაგეიშვილი ქართული ფეხბურთის გულშემატკივარს ეროვნულ ლიგასა და 21-წლამდე ნაკრებში ჩატარებული წარმატებული მატჩებით უნდა ახსოვდეს.
გიზი იბერიას აღზრდილია, აკადემიიდან ძირითად გუნდში 2022 წელს დაწინაურდა და მალვე იქცა გუნდის ლიდერად. გასულ სეზონში მამაგეიშვილმა იბერიას უკაპიტნა, 6 გოლითა და 8 ასისტით გამორჩეული სეზონი ჩაატარა, სიმბოლურ გუნდში მოხვდა და ეროვნული ლიგის თასიც ასწია.
მამაგეიშვილი გასულ წელს საქართველოს 21-წლამდე ნაკრებში ევროპის ჩემპიონატზეც თამაშობდა. მას ყველა ასაკობრივი ნაკრები გამოვლილი აქვს და ჯერი ეროვნულზე დადგა.
ზაფხულის სატრანსფერო ფანჯარაზე მამაგეიშვილმა ახალი გამოწვევა მიიღო და ავსტრიულ შტურმში გადავიდა. მიუხედავად იმისა, რომ გიზის ჯერ ახალ კლუბში შედეგიანი თამაში არ ჰქონია, რამდენჯერმე ის შეცვლაზე აქტიურად შევიდა და მალვე მიიქცია ადგილობრივი გულშემატკივრის ყურადღება. 23 წლის შემტევს შტურმში 4 თამაში დაუგროვდა.
