ბრაზილიაში მიმდინარე კარნავალის ყურადღების ცენტრში მოექცა კარლო ანჩელოტი, ვინც სანახაობას ვიპ ზონიდან ადევნებდა თვალს. შოუს მიმდინარეობისას იტალიელ სპეციალისტს მიმართა მომღერალმა ლეო სანტანამ, რომელმაც მას ბრაზილიის ეროვნულ გუნდში ნეიმარ ჟუნიორის დაბრუნება თხოვა.
"ჩვენთვის დიდი პატივია თქვენი კარნავალზე ხილვა. მოხარულები ვართ, რომ მუშაობთ ბრაზილიის ნაკრებში და ეროვნულ გუნდს ახალი გამოცდილებით ამდიდრებთ. სასიამოვნოა იმაზე ფიქრი, რომ "სელესაომ" მსოფლიო ჩემპიონობა მეექვსედ შესაძლოა კარლოსთან ერთად იზეიმოს.
არის კიდევ ერთი რამ, რისი თქმაც მინდა - მთელი ქვეყნის სახელით, გთხოვთ "პენტაკამპეონეში" ნეიმარი დააბრუნეთ. მოხარული ვიქნები, თუ ჩვენს რჩევას გაითვალისწინებთ."
იტალიელმა მწვრთნელმა ბრაზილიელ მომღერალს მადლობა მოუხადა თბილი სიტყვებისა და რჩევისთვის. აღსანიშნავია ისიც, რომ "სელესაოს" დამრიგებელი კარნავალზე შეხვდა რონალდო ნაზარიოს, რომელმაც აღნიშნა, ლეგენდარული სპეციალისტი სამხრეთ ამერიკაში ცხოვრების საუკეთესო პერიოდს ატარებს.
