„მიუხედავად იმისა, რომ უკრაინის ნაკრები ოპტიმალური შემადგენლობით არ იქნება, მაინც რთულ თამაშს ველით. იმ დონის ფეხბურთელები ჰყავთ, რომ წინააღმდეგობას გაგვიწვენ, თან გასვლითი თამაში მარტივი არასდროსაა. რაც შეეხება ალბანეთთან შეხვედრას, მოვუგეთ, მაგრამ ალბანეთში რთული თამაში იყო, რა თქმა უნდა, თბილისში ჩვენ გულშემატკივრებთან ერთად გვინდა გავიმარჯვოთ და ჯგუფში პირველი ადგილი შევინარჩუნოთ. ევროპის ჩემპიონატის შემდეგ, მნიშვნელოვანი იყო როგორ გავაგრძელებდით იმ წარმატებულ სვლას რაც ევროპის ჩემპიონატზე გვქონდა და ვფიქრობ, კარგად გავართვით თავი, რა თქმა უნდა ეს ყველაფერი უნდა გაგრძელდეს. რთული თამაში იყო ორივე, ველოდით ჩეხეთი უკეთ ითამაშებდა ვიდრე ითამაშა, პირველი 15 კარგად ვერ ვითამაშეთ, შემდგე გამოვასწორეთ და ის თავდაჯერება ვიგრძენით რაც გვჭირდებოდა.
რაც შეეხება Ballon d'Or-ის წლის საუკეთესო მეკარის პრიზზე ნომინანტებს შორის ყოფნას, ეს ჩემი ბავშვობის ერთ-ერთი ოცნება იყო და ძალიან ბედნიერი ვარ. არ ველი გამარჯვებას, მაგრამ ნომინანტებს შორის ყოფნა დიდი წარმატებაა და მოვიაზრები, ერთ-ერთ საუკეთესოდ, მე გავაგრძელებ შრომას და იმედი მაქვს, კიდე ბევრჯერ ვიქნები ამ სიაში,“ - განაცხადა გიორგი მამარდაშვილმა.
ერთა ლიგის B1 ჯგუფში საქართველოს ნაკრების მეტოქეები ჩეხეთის, ალბანეთისა და უკრაინის ნაკრებები არიან.
ორი მატჩის შემდეგ საქართველოს ნაკრები 6 ქულით პირველ ადგილზეა.
შეგახსენებთ, ჩვენმა გუნდმა ჩეხეთს და ალბანეთს სძლია. საქართველოს ნაკრები 11 ოქტომბერს უკრაინას პოლონეთში დაუპირისპირდება, 14 ოქტომბერს კი ალბანეთს მიხეილ მესხზე უმასპინძლებს.
უკრაინა-საქართველოს მატჩი 11 ოქტომბერს თბილისის დროით 22:45 საათზე დაიწყება.
ფოტო: საქართველოს ფეხბურთის ფედერაცია
იხილეთ ჩვენი პოდკასტის მორიგი ეპიზოდი
