10. გიორგი მიქაუტაძე
ასაკი: 23 წლის
ნაკრები: საქართველო
გუნდი: მეცი
შედეგი: 17 ქულა (13 გოლი, 4 ასისტი)
მიქაუტაძისთვის განვლილი სეზონი ორი უკიდურესობით წარიმართა - ამსტერდამის აიაქსში წარუმატებელი სეზონის პირველი ნახევრის შემდეგ, ზამთარში ის მეცში დაბრუნდა და ძველებურად ათამაშდა. ჟორჟმა სეზონი დაასრულა 13 ბურთითა და 4 ასისტით, ცხადია, ის საქართველოს ეროვნული გუნდის ერთ-ერთი მთავარი იმედი იქნება ევრო 2024-ზე.
9. შარლ დე კეტელარე
ასაკი: 23 წლის
ნაკრები: ბელგია
გუნდი: ატალანტა
შედეგი: 18 ქულა (10 გოლი, 8 ასისტი)
მილანში ვერდამკვიდრების შემდეგ, დე კეტელარეს ათამაშება შეძლო ჯან პიერო გასპერინიმ ატალანტაში, სადაც ის უმოკლეს დროში გუნდის ერთ-ერთ ლიდერად ჩამოყალიბდა. ბელგიის ეროვნული გუნდის ახალი თაობა არ არის ისეთი ვარსკვლავური, როგორც გასულ დეკადაში, მაგრამ შარლი არის სწორედ ის მოთამაშე, რომელიც ნაკრებში ედენ აზარისა და კევინ დე ბრუინის ტრადიციებს გააგრძელებს.
8. ხვიჩა კვარაცხელია
ასაკი: 23 წლის
ნაკრები: საქართველო
გუნდი: ნაპოლი
შედეგი: 19 ქულა (11 გოლი, 8 ასისტი)
მართალია, ნაპოლის კოშმარული სეზონი ჰქონდა, თუმცა სერია ა-ს ყოფილი ჩემპიონების ჩავარდნა არ აისახა კვარაცხელიას თამაშის ხარისხზე და მან კიდევ ერთი შედეგიანი სეზონი შემოგვთავაზა. ხვიჩა ევრო 2024-ზე მიემგზავრება, როგორც საქართველოს ეროვნული გუნდის მთავარი ვარსკვლავი და იმედი.
7. მაქსიმილიან ბაიერი
ასაკი: 21 წლის
ნაკრები: გერმანია
გუნდი: ჰოფენჰაიმი
შედეგი: 19 ქულა (16 გოლი, 3 ასისტი)
ბუნდესლიგის განვლილი სეზონის ერთ-ერთი მთავარი აღმოჩენა და ევროპული ტოპ გუნდების მომავალი სამიზნე. ჰოფენჰაიმის დუბლებსა და ჰანოვერში იჯარით თამაშის შემდეგ, ბაიერი მშობლიურ კლუბში, როგორც სრულფასოვანი გოლეადორი, ისე დაბრუნდა. მან თავისი შედეგიანი თამაშით ევრო 2024-ის საგზურიც მოიპოვა.
6. ჩავი სიმონსი
ასაკი: 21 წლის
ნაკრები: ნიდერლანდები
გუნდი: ლაიფციგი
შედეგი: 21 ქულა (8 გოლი, 13 ასისტი)
სიმონსზე თავის დროზე უარი თქვა ბარსელონამ, შემდეგ კი პარის სენ-ჟერმენმაც, რომელმაც ის გაუშვა ჯერ პსვ ეინდჰოვენში, შემდეგ კი ლაიფციგში. დღეს, კატალონიელები ჩავის დაბრუნებაზე ონებობენ, პსჟ კი მისი გაყიდვის კატეგორიული წინააღმდეგია. ნიდერლანდების ეროვნული გუნდის მთავარი იმედი ევრო 2024-ზე სწორედ პარიზელთა ვინგერი იქნება.
5. ენტონი გორდონი
ასაკი: 23 წლის
ნაკრები: ინგლისი
გუნდი: ნიუკასლი
შედეგი: 21 ქულა (11 გოლი, 10 ასისტი)
ინგლისური ფეხბურთის ვარსკვლავური თაობის კიდევ ერთი შედეგიანი წარმომადგენელი, რომელიც ჯერჯერობით თავისი თანამემამულეების ჩრდილში იმყოფება. ნიუკასლში გატარებული ძალიან კარგი სეზონის შემდეგ, გორდონი ადგილის დასამკვიდრებლად "3 ლომში" იბრძოლებს, ევრო 2024-ზე. ახალგაზრდა ვინგერს კონკურენცია სულაც არ აშინებს.
4. ფლორიან ვირტცი
ასაკი: 21 წლის
ნაკრები: გერმანია
გუნდი: ლევერკუზენი
შედეგი: 23 ქულა (11 გოლი, 12 ასისტი)
ლევერკუზენის დაუვუწყარი სეზონი, რომელიც ვირტცის გარეშე უბრალოდ წარმოუდგენელი იქნებოდა. ბუნდესლიგის ჩემპიონობა, გერმანიის თასი, ევროპა ლიგის ფინალი, 51-მატჩიანი წაუგებელი სერია, ფლორიანი ამ ყველაფრის მამოძრავებელი ძალა იყო. გერმანიის ეროვნული გუნდის მთავარ ტალანტად მოიაზრება ჯამალ მუსიალა, მაგრამ ევრო 2024-ზე ამ სტატუსით ბაიერის გამთამაშებელი ჩავა.
3. ბუკაიო საკა
ასაკი: 22 წლის
ნაკრები: ინგლისი
გუნდი: არსენალი
შედეგი: 25 ქულა (16 გოლი, 9 ასისტი)
ახალგაზრდული ასაკის მიუხედავად, საკა უკვე წლებია, რაც არსენალის ერთ-ერთი ლიდერია და შედეგიანი ფეხბურთელი. მან ითამაშა 2021 წლის ევროპის ჩემპიონატზეც, მაგრამ ახლა ბუკაიო სულ სხვა მოთამაშეა: საკუთარი თავის გაუმჯობესებული ვერსია, უფრო გამოცდილი, დაღვინებული და თავდაჯერებული.
2. ჯუდ ბელინგემი
ასაკი: 20 წლის
ნაკრები: ინგლისი
გუნდი: რეალი
შედეგი: 25 ქულა (19 გოლი, 6 ასისტი)
რა შეიძლება ითქვას ბელინგემზე? - უდაოდ, განვლილი სეზონის საუკეთესო ტრანსფერი, რომელმაც რეალს მოაპოვებინა ჩემპიონთა ლიგისა და ლა ლიგის მორიგი ტიტულები. ჯუდი არის ოქროს ბურთის მოგების მთავარი კანდიდატი და ევრო 2024-ზე წარმატებული თამაშის შემთხვევაში, ის მთავარ ინდივიდუალურ ჯილდოს კიდევ უფრო მიუახლოვდება.
1. კოულ პალმერი
ასაკი: 22 წლის
ნაკრები: ინგლისი
გუნდი: ჩელსი
შედეგი: 33 ქულა (22 გოლი, 11 ასისტი)
პალმერს კატეგორიულად არ სურდა მანჩესტერ სიტის დატოვება, თუმცა ხოსეპ გვარდიოლამ მას ულტიმატუმი წაუყენა - არავითარი განათხოვრება, დარჩენა ან გაყიდვა. კოულს არ სურდა "ქალაქელთა" სკამზე ჯდომა, რის გამოც მას ჩელსის წინადადების მიღება მოუწია. მისმა ტრანსფერმა უბრალოდ ყველა მოლოდინს გადააჭარბა. ინგლისელი გამთამაშებელი ევრო 2024-ზეც ყურადღების ცენტრში იქნება.
