მსოფლიო ჩემპიონატზე ერთ-ერთი ყველაზე ხმაურიანი სკანდალი აშშ-ის ნაკრების თავდამსხმელის, ფოლარინ ბალოგუნის, საქმეს უკავშირდება. ფეხბურთელს წითელი ბარათის გამო ავტომატურად ერთმატჩიანი დისკვალიფიკაცია უნდა მოეხადა, თუმცა ფიფამ სანქციის შესრულება ერთი წლის გამოსაცდელი ვადით შეაჩერა. ამის შემდეგ ბალოგუნს ბელგიის წინააღმდეგ თამაშის უფლება მიეცა. უცხოური მედიის ინფორმაციით, გადაწყვეტილებას წინ აშშ-ის პრეზიდენტ დონალდ ტრამპისა და ფიფას პრეზიდენტ ჯანი ინფანტინოს შორის გამართული კომუნიკაცია უძღოდა, რამაც საკითხს კიდევ უფრო დიდი პოლიტიკური და სპორტული რეზონანსი შესძინა.
იხილეთ დონალდ ტრამპის განცხადება:
მომხდარს უმკაცრესად გამოეხმაურა უეფა, რომელმაც ფიფას გადაწყვეტილება უპრეცედენტო და გაუმართლებელი უწოდა. ევროპული ფეხბურთის მმართველი ორგანოს განცხადებით, "გუშინდელმა გადაწყვეტილებამ, რომლის მიხედვითაც ფოლარინ ბალოგუნის წითელი ბარათის შემდეგ სავალდებულო ერთმატჩიანი დისკვალიფიკაციის აღსრულება ერთი წლის გამოსაცდელი ვადით შეჩერდა, წითელი ხაზი გადაკვეთა." განცხადებაში ასევე ნათქვამია, რომ "ფეხბურთი, როგორც ნებისმიერი სპორტი, წესებზე დგას და სწორედ ისინი უზრუნველყოფენ სამართლიან, პატიოსან და გამჭვირვალე შეჯიბრებას. ამ შემთხვევაში რეგლამენტი ინტერპრეტაციის შესაძლებლობას არ ტოვებს."
უეფამ ხაზგასმით აღნიშნა, რომ წითელი ბარათის შემდეგ მინიმუმ ერთმატჩიანი ავტომატური დისკვალიფიკაცია სავალდებულოა და ტურნირის მიმდინარეობისას მსგავსი გამონაკლისის დაშვება კონკურსის მთლიანობასა და სანდოობას სერიოზულ ზიანს აყენებს.
საქმემ დიდი გამოხმაურება გამოიწვია საერთაშორისო მედიაშიც. არაერთმა გამოცემამ ფიფას ნაბიჯი უპრეცედენტოდ შეაფასა და ყურადღება გაამახვილა იმაზე, რომ მსოფლიო ჩემპიონატის ერთ-ერთი მთავარი თემა უკვე არა უშუალოდ ფეხბურთი, არამედ სპორტსა და პოლიტიკას შორის არსებული ურთიერთობა გახდა. განსაკუთრებული კრიტიკა გამოიწვია ცნობებმა, რომ გადაწყვეტილებაზე გავლენა აშშ-ის პრეზიდენტის ჩარევამ მოახდინა, რაც, მრავალი მიმომხილველის შეფასებით, ფიფას დამოუკიდებლობასთან დაკავშირებით სერიოზულ კითხვებს აჩენს.
არანაკლებ მწვავე იყო გულშემატკივრების რეაქციაც სოციალურ ქსელებში. ბევრი მიიჩნევს, რომ ფიფამ საკუთარი რეგლამენტი დაარღვია და ერთ გუნდს განსაკუთრებული პრივილეგია მიანიჭა, მაშინ როდესაც ტურნირის განმავლობაში სხვა ფეხბურთელებმა ანალოგიური სასჯელი სრულად მოიხადეს. სწორედ ამიტომ, ბალოგუნის საქმე უკვე მსოფლიო ჩემპიონატის ერთ-ერთ ყველაზე დიდ სკანდალად მოიაზრება, ხოლო ფიფასა და უეფას შორის დაპირისპირება, შესაძლოა, უახლოეს პერიოდში კიდევ უფრო გამწვავდეს.
