მეკარე: გიორგი მამარდაშვილი
ეროვნული ნაკრები: საქართველო
კლუბი: ვალენსია
სატრანსფერო ფასი: 35 მილიონი ევრო
მამარდაშვილი მეკარის პოზიციაზე ევროპული ტოპ კლუბების ერთ-ერთი მთავარი სატრანსფერო სამიზნეა. მის სახელს უკავშირებენ ატლეტიკოს, ტოტენჰემს, ნიუკასლსა და სხვებს. გიორგის ანგარიშზე ამ სეზონში 13 მშრალი მატჩია. ცხადია, ის ყურადღების ცენტრში მოახლოებულ ევრო 2024-ზეც იქნება.
მარჯვენა ცენტრალური მცველი: ვილიამ სალიბა
ეროვნული ნაკრები: საფრანგეთი
კლუბი: ლონდონის არსენალი
სატრანსფერო ფასი: 80 მილიონი ევრო
დღევანდელი არსენალი წარმოუდგენელია სალიბას გარეშე. მან მიმდინარე სეზონში თავისი გუნდის სასტარტოში ჩაატარა 42 შეხვედრა, რაც ევროპის ტოპ 5 ლიგაში სეზონის რეკორდული მაჩვენებელია. ვილიამზე უდიდეს იმედებს ამყარებენ საფრანგეთის ეროვნულ გუნდშიც, რომელიც ევრო 2024-ის უმთავრესი ფავორიტია.
მარცხენა ცენტრალური მცველი: მიკი ვან დე ვენი
ეროვნული ნაკრები: ნიდერლანდები
კლუბი: ლონდონის ტოტენჰემი
სატრანსფერო ფასი: 50 მილიონი ევრო
ვან დე ვენი ფართო აუდიტორიისთვის მიმდინარე სეზონის ერთ-ერთი მთავარი აღმოჩენაა. დაკვირვებულ მაყურებლებს კი ის ჯერ კიდევ ვოლფსბურგში თამაშისას მოხვდათ თვალში. მიკის ანგარიშზე ნიდერლანდების ეროვნულ გუნდში არის სულ რაღაც 2 მატჩი, მაგრამ მას ყველაფერი წინ აქვს. ვნახოთ, რამდენად ეფექტური იქნება ტოტენჰემის უკანახაზელი ევრო 2024-ზე.
მარჯვენა განაპირა მცველი: ჯერემი ფრიმპონგი
ეროვნული ნაკრები: ნიდერლანდები
კლუბი: ლევერკუზენის ბაიერი
სატრანსფერო ფასი: 50 მილიონი ევრო
ლევერკუზენი, რომელიც 51 შეხვედრის განმავლობაში იყო დაუმარცხებელი - ფრიმპონგის გარეშე ამ გუნდის წარმატება წარმოუდგენელი იქნებოდა. მართალია, ჯერემი უფრო ლატერალია, ვიდრე განაპირა მცველი, მაგრამ 4-მცველიან სქემაში ის სწორედ ამ პოზიციაზე იქნებოდა. ცნობისთვის, ნიდერლანდელი ფლანგელი სიტის აკადემიის აღზრდილია.
მარცხენა განაპირა მცველი: იოშკო გვარდიოლი
ეროვნული ნაკრები: ხორვატია
კლუბი: მანჩესტერ სიტი
სატრანსფერო ფასი: 75 მილიონი ევრო
ხოსეპ გვარდიოლას ერთ-ერთი უკანასკნელი ძვირადღირებული შენაძენი სიტიში. მართალია, თავდაპირველად ის უფრო მეტხანს ატარებდა დაცვის ცენტრში, მაგრამ მანჩესტერულ კლუბში გადასვლის შემდეგ, იოშკო სრულფასოვან განაპირა მცველად ჩამოყალიბდა. მან გაიბრწყინა განვლილ მუნდიალზე და ვნახოთ, რა იქნება ამჯერად ევროზე.
საყრდენი ნახევარმცველი: ედუარდო კამავინგა
ეროვნული ნაკრები: საფრანგეთი
კლუბი: მადრიდის რეალი
სატრანსფერო ფასი: 90 მილიონი ევრო
რეალის უნივერსალური ჯარისკაცი, რომელიც კარლო ანჩელოტიმ არაერთ პოზიციაზე გამოსცადა. აღნიშნულ სიმბოლურ გუნდში კამავინგა საყრდენი ნახევარმცველი იქნება. ედუარდოს მრავალფუნქციურობისა და უმაღლესი კლასის გათვალისწინებით, მადრიდული კლუბისა და საფრანგეთის ეროვნული გუნდის ქომაგებს შეუძლიათ მშვიდად იძინონ.
ცენტრალური ნახევარმცველი: ჯუდ ბელინგემი
ეროვნული ნაკრები: ინგლისი
კლუბი: მადრიდის რეალი
სატრანსფერო ფასი: 180 მილიონი ევრო
ბელინგემის გარეშე აღნიშნული სიმბოლური გუნდი უბრალოდ წარმოუდგენელი იქნებოდა. ოქროს ბურთის მთავარი კანდიდატი და ჩემპიონთა ლიგის პოტენციური ტრიუმფატორი, რომელსაც წარმატებას ევრო 2024-ზეც უწინასწარმეტყველებენ. ჯუდი ამ 11-ეულში იქნება იმ პოზიციაზე, რომელზეც ის ტონი კროოსის წასვლის შემდეგ დადგება.
შემტევი ნახევარმცველი: ფლორიან ვირტცი
ეროვნული ნაკრები: გერმანია
კლუბი: ლევერკუზენის ბაიერი
სატრანსფერო ფასი: 110 მილიონი ევრო
არჩევანი უნდა გაგვეკეთებინა ვირტცსა და მუსიალას შორის - ერთი და იგივე პოზიცია, ისევე როგორც სატრანსფერო ღირებულება, თუმცა მიმდინარე სეზონის შედეგების გათვალისწინებით, სიმბოლურში ფლორიანი მოხვდა. ვინ არის ტრიუმფალური ლევერკუზენის საუკეთესო მოთამაშე? ულაპარაკოდ, გერმანელი გამთამაშებელი.
მარჯვენა გარემარბი: ფილ ფოდენი
ეროვნული ნაკრები: ინგლისი
კლუბი: მანჩესტერ სიტი
სატრანსფერო ფასი: 130 მილიონი ევრო
პრემიერ ლიგის განვლილი სეზონის საუკეთესო ფეხბურთელი და სიტის მომავალი ლიდერი. ფოდენი სეზონიდან სეზონამდე პროგრესირებს და მანჩესტერული კლუბის წარმატებაში უდიდეს როლს თამაშობს. ევრო 2024-ზე ფილს ექნება ახალი ამოცანა: ინგლისის ეროვნული გუნდის უტიტულო სერიის შეწყვეტა.
მარცხენა გარემარბი: ხვიჩა კვარაცხელია
ეროვნული ნაკრები: საქართველო
კლუბი: ნაპოლი
სატრანსფერო ფასი: 80 მილიონი ევრო
მარცხენა ფრთას ამაგრებს კვარაცხელია, რომლის ჯადოქრობებს ევროპის ჩემპიონატზე მთელი საფეხბურთო სამყარო ელის. მიმდინარე სეზონში ის ნაპოლის ერთადერთი ნათელი წერტილია, რომელიც შესაძლოა მალე სხვა კლუბში აღმოჩნდეს. ხვიჩას სახელს ბარსელონასა და პარის სენ-ჟერმენს უკავშირებენ. ვნახოთ, რა იქნება ევროს შემდეგ.
ცენტრალური თავდამსხმელი: რასმუს ჰოილუნდი
ეროვნული ნაკრები: დანია
კლუბი: მანჩესტერ იუნაიტედი
სატრანსფერო ფასი: 65 მილიონი ევრო
ის ფაქტი, რომ ჰოილუნდმა ამჟამინდელ მანჩესტერში არ განიცადა სტაგნაცია, ძალიან ბევრს ნიშნავს. ეჭვგარეშეა, რომ სხვა, უფრო დალაგებულ გუნდში რასმუსი ბევრად უფრო შედეგიანი იქნებოდა. ის არის დანიის ეროვნული გუნდის მთავარი იმედი და ქომაგები ახალგაზრდა ფორვარდისგან ბევრ გოლს ელიან.
