აწ უკვე დასრულებულ ევროპის ჩემპიონატზე ერთ-ერთი საუკეთესო ფეხბურთელი ნიკო უილიამსი იყო, რომელმაც ესპანეთის ნაკრების წარმატებაში დიდი წვლილი შეიტანა.
მიუხედავად პირველ მატჩში მიღებული დიდი კრიტიკისა, ეს ევროპის ჩემპიონატი კვარაცხელიასთვისაც წარმატებული გამოდგა. პორტუგალიას გაუტანა და საუკეთესო დრიბლიორებში მოწინავე პოზიცია დაიკავა.
ლოგიკური იყო, რომ ორივე მათგანი ევრო 2024-ის დასრულების შემდეგ, კარიერაში ახალ ნაბიჯს გადადგამდნენ, თუმცა ნიკოსაც და ხვიჩასაც დაახლოებით ერთნაირი სიტუაცია აქვთ.
მთელი ზაფხული იწერებოდა, რომ კვარაცხელიას შეძენით ჯერ ბარსელონა, შემდეგ პსჟ ინტერესდებოდა და ყველაფერი ევროს შემდეგ უნდა გადაწყვეტილიყო. ამ დიდი და ხანგრძლივი მითქმა-მოთქმების შემდეგ, კვარაცხელია ნაპოლიში დარჩა და ახალი სეზონისთვის ემზადება.
დიდი იყო ნიკო უილიამსის ბარსელონაში გადასვლის შანსებიც. კატალონიელები მის სანაცვლოდ 60 მილიონ ევროს იხდიდნენ და ყველაფერი იქითკენ მიდიოდა, რომ უილიამსიც და ბილბაოც ამაზე თანახმა იყვნენ, მაგრამ ამჟამინდელი მონაცემებით, უილიამსი ბილბაოში კიდევ ერთი სეზონი დარჩება.
სატრანსფერო ფანჯარა თვის ბოლოს იხურება და შეიძლება ყველაფერი შეიცვალოს და გუნდიდან ორივე წავიდეს, თუმცა ამჟამად, მსოფლიოს ერთ-ერთი საუკეთესო მარცხენა გარემარბები - უილიამსი და კვარაცხელია თავიანთ გუნდებში წინასასეზონო მზადებას გადიან.
