ინგლისის ნაკრების შემადგენლობაში არის ხუთი ფეხბურთელი, რომელსაც ტურინის იუვენტუსის ყოფილი ცენტრალური მცველის რეკორდის გამეორება და მოხსნაც შეუძლია. ესენი არიან: ჰარი კეინი, კაილ უოკერი, ლიუკ შოუ, ჯონ სტოუნსი და ჯორდან პიკფორდი. მათ ანგარიშზე ევროს ფინალში 120 გატარებული წუთია.
რა შემთხვევაში მოიხსნება "სკუადრა აძურას" ყოფილი მე-19 ნომრის რეკორდი? იმ შემთხვევაში, თუ "სამი ლომისა" და ესპანეთის ნაკრების შეხვედრაში 90 წუთის შემდეგ დაინიშნება ოვერტაიმი და ზემოაღნიშნული 5-ეულიდან რომელიმე მაინც სრულად ითამაშებს 120 წუთს. ასეთ შემთხვევაში მათ გაუხდებათ 240 წუთი, რაც 37 წლის ვეტერანი უკანახაზელის მიღწევაზე 30 წუთით მეტია.
იმ შემთხვევაში, თუ წლევანდელი ევროპის ჩემპიონატის ფინალი დასრულდება ძირითად დროში და აღნიშნული ხუთეული ითამაშებს შეუცვლელად, ბონუჩი აღარ იქნება ერთადერთი მოთამაშე 210 წუთით ევროს ფინალებში. ცნობისთვის, წინა ფინალში ბრიტანელთა ამჟამინდელი შემადგენლობიდან ასევე თამაშობდნენ კირან ტრიპიერი, დეკლან რაისი და ბუკაიო საკა, მაგრამ ამ სამეულმა მოედანზე ნაკლები დრო გაატარა.
