ევროპის ჩემპიონატზე წარუმატებელი გამოსვლის შემდეგ, ლუჩიანო სპალეტიმ განაცხადა, რომ იტალიის ნაკრებში ახალ სახეებს ვიხილავდით. ერთ-ერთი ასეთი არის ლეგენდარული მალდინების ოჯახის შთამომავალი, დანიელი. მისი დებიუტი ისრაელთან მატჩში შედგა, 74-ე წუთზე ის ჯო რასპადორის ნაცვლად გამოვიდა.
იტალიელი შემტევი ნახევარმცველის დებიუტი ჩეზარე მალდინის უკანასკნელი შეხვედრიდან 61 წლისა და პაოლოს ბოლო თამაშიდან 22 წლის შემდეგ შედგა. როგორც ვიცით, მალდინების ოჯახი მჭიდროდ არის კავშირში არა მხოლოდ "სკუადრა აძურასთან", არამედ მილანთანაც. ჩეზარემ "როსონერიში" ჩაატარა 400-მდე მატჩი, მოიგო 4 სკუდეტო და 2 ჩემპიონთა თასი, ერთი მოთამაშისა და მეორე დამრიგებლის რანგშიც.
პაოლომ კი "შავ-წითელი" მაისურით წარუშლელი კვალი დატოვა, თავისი 900-ზე მეტი შეხვედრით, 26 ტიტულითა და არაერთი რეკორდით. დანიელის ჯერიც დგებოდა, მაგრამ ახალგაზრდა გამთამაშებელმა ვერ მოახერხა "ეშმაკებში" დამკვიდრება და რამდენიმე იჯარის შემდეგ, ის უფასოდ მონცას შეუერთდა.
იტალიელმა შემტევმა ნახევარმცველმა ვერ მოახერხა ოჯახური საქმის გაგრძელება სან სიროზე, თუმცა როგორც ვხედავთ, "ლურჯებში" გამოძახებამდე მან მაინც მიაღწია. მილანიდან წასვლის გარდა, ასევე, უმცროსი მალდინი მამისა და ბაბუისგან იმით განსხვავდება, რომ ის არის შემტევი და არა უკანახაზელი.
მონცას ფლეიმეიქერის შემტევი პოტენციალის შესახებ უსაუბრიათ ფილიპო გალის, მარიო ბერეტასა და რაც ყველაზე მნიშვნელოვანია, იტალიის ნაკრების დამრიგებელს:
"მალდინი არის ის მოთამაშე, რომელიც "სკუადრა აძურას" აკლდა. მან იცის, თუ რას ნიშნავს ბურთის კონტროლი და მეტოქეთა მოტყუება", - განაცხადა 65 წლის დამრიგებელმა.
მონცას შემტევმა ნახევარმცველმა ისინი უარით გაისტუმრა, რადგან მხოლოდ აპენინებში დამკვიდრებაზე ფიქრობდა. საოცნებო დებიუტი შედგა და ახლა, 23 წლის გამთამაშებელი უკვე ახალ მიზანზე ფიქრობს: "როსონერიში" დაბრუნება. აღნიშნული ფაქტი გააჟღერა პაოლომ, რომელმაც იმედი გამოთქვა, რომ შვილს "შავ-წითელ" მაისურში კვლავ იხილავს.
უმცროს მოლდინის "ეშმაკებთან" ერთად უკვე აქვს მოგებული სკუდეტო, თუმცა აღსანიშნავია ის, რომ საჩემპიონო სეზონში სულ რაღაც 13 მატჩი ჩაატარა და გაიტანა 1 ბურთი. მომავალში, იტალიელი გამთამაშებლის ოცნებაა სან სიროზე დაბრუნება და თავის კიდევ ერთხელ აღმართვა, ამჯერად უკვე გუნდის ერთ-ერთი ლიდერის სტატუსით.
