დღეს, 20 საათზე, საქართველოს ნაკრები ქუთაისის რამაზ შენგელიას სახელობის სტადიონზე ამხანაგურ მატჩს კაბო-ვერდეს წინააღმდეგ გამართავს.
მოგეხსენებათ, 2 დღის წინ საქართველომ ამხანაგურად ფარერებთან ითამაშა და მინიმალური ანგარიშით, 1:0 გაიმარჯვა. ამ შეხვედრაში შანსი თითქმის ყველა ფეხბურთელს მიეცა.
ხოლო ის მოთამაშეები, რომლებმაც ფარერებთან სათამაშო წუთები ევრ მიიღებს, დღეს სასტარტო შემადგენლობიდან ითამაშებენ.
აღსანიშნავია, რომ ქუთაისის სტადიონზე ეროვნული ნაკრები 7-წლიანი პაუზის შემდეგ ბრუნდება და მატჩის ყველა ბილეთი გაყიდულია.
ვილი სანიოლი (ეროვნული ნაკრების მთავარი მწვრთნელი): „კაბო-ვერდეს სახით განსხვავებული და ბევრად ძლიერი მეტოქე გვყავს. თამაში გაცილებით რთული იქნება, ვიდრე ხუთშაბათს იყო. ფეხბურთელებმა იციან, რომ კიდევ უფრო მეტი უნდა გააკეთონ. საქართველოში ვთამაშობთ და მიუხედავად იმისა, რომ თამაში ამხანაგურია, მოედანზე მოსაგებად გავალთ.
შემადგენლობაში გარკვეული ცვლილებები იქნება. შესაძლოა გეგმა განსხვავებული იყოს იმისგან, რაც შეკრების დაწყებამდე მქონდა. რამდენიმე ფეხბურთელმა ფარერის კუნძულებთან შეხვედრაში თავი კარგად წარმოაჩინა და მინდა დავრწმუნდე, რომ ეს შემთხვევითობა არ ყოფილა. ასევე, სხვა ფეხბურთელებს ექნებათ შესაძლებლობა, რომ გამოიჩინონ თავი. ყოველთვის, როდესაც ამხანაგური თამაშები გვაქვს, მსურს, რაც შეიძლება მეტი სათამაშო დრო მივცე მოთამაშეებს. ამასთან, არ უნდა დაგვავიწყდეს, რომ უმაღლეს სანაკრებო დონეზე ყველა თამაშის შედეგი მნიშვნელოვანია.
ეროვნული ნაკრები მთელ ქვეყანას ეკუთვნის და რა თქმა უნდა, რაც შეიძლება მეტ ქალაქში უნდა ვითამაშოთ. პირადად მე ეს ძალიან მომწონს. თბილისის გარდა ვიყავით გორში, ბათუმში და ახლა უკვე ქუთაისში ვართ. ვფიქრობ, ეს დადებითი მომენტია ქართული ფეხბურთისთვის“.
სავარაუდო შემადგენლობა: გუგეშაშვილი, გოჩოლეიშვილი, ლოჩოშვილი, გელაშვილი, გიორბელიძე, ალთუნაშვილი, მექვაბიშვილი, კვეკვესკირი, ვოლკოვი, შენგელია, გულიაშვილი
