დე როსის კარიერის ორი უმძიმესი მარცხი ალონსოს გუნდებს უკავშირდება - სამწვრთნელო რევანში?!

რომას მწვრთნელი თავის ესპანელ მოწინააღმდეგეს საფეხბურთო კარიერის განმავლობაში ექვსჯერ შეხვდა და მის ანგარიშზე მხოლოდ ერთი გამარჯვებაა. ოთხი მოგება წაიღო ლევერკუზენის დამრიგებელმა, ერთი მატჩიც ფრედ დასრულდა. დე როსისთვის განსაკუთრებით მტკივნეულად გასახსენებელი ორი თამაში არის.

მივყვეთ ქრონოლიგიურად და გავიხსენოთ ის მტკივნეული შეხვედრებიც. პირველად მათი გზები 2008 წლის 26 მარტს გადაიკვეთა - იტალიისა და ესპანეთის ეროვნული გუნდების ამხანაგურ მატჩში. "ფურია როხამ" 1:0 მოიგო, მომდევნო ამხანაგურ თამაშში კი, რომელიც 3 წლის შემდეგ ჩატარდა, უკვე იმარჯვა "სკუადრა აძურამ", 2:1.

მათი ურთიერთშეხვედრების ცენტრალური ნაწილი - 2012 წლის ევროპის ჩემპიონატი. როგორც გვახსოვს, მათი ნაკრებები ერთმანეთს დაუპირისპირდნენ როგორც ჯგუფურ ეტაპზე, ისე ტურნირის ფინალშიც. პირველი მატჩი დასრულდა ფრედ, 1:1, მეორე თამაში კი ყოფილი იტალიელი ჩამშლელის საფეხბურთო კარიერის ერთ-ერთი ყველაზე კოშმარული მოგონებაა.

"წითლებმა" აპენინელები უშანსოდ გაანადგურეს, ანგარიშით 4:0, ორივე ფეხბურთელმა მოედანზე 90-90 წუთი გაატარა. 2008 წლის ევროპის ჩემპიონატისა და 2010 წლის მუნდიალის შემდეგ, პირენეელებმა ზედიზედ მე-3 საერთაშორისო ტიტული დაისაკუთრეს. რაც შეეხება დანიელეს, 2006 წლის მუნდიალზე ტრიუმფის შემდეგ, მან მთელი თავისი შემდგომი საერთაშორისო კარიერა კრიზისში მყოფ "ლურჯებში" გაატარა.

"ჯალოროსის" საყრდენი ნახევარმცველი სანაკრებო კარიერის მიწურულს, მსოფლიო ჩემპიონატის საგზურის გარეშეც კი დარჩა. რაც შეეხება საკლუბო ფეხბურთს, სადაც "მგლების" ყოფილმა მე-16 ნომერმა ალონსოსგან კიდევ ერთი მძიმე წაგება იგემა. საუბარია ჩემპიონთა ლიგის 2014/15 წლების სეზონის ჯგუფურ ეტაპზე, ამ დროს ესპანელი ჩამშლელი "რეკორდმაისტერში" თამაშობდა.

ბავარიელებისა და "კაპიტოლინის" გარდა, მათ ჯგუფში ასევე განთესილები იყვნენ მანჩესტერ სიტი და მოსკოვის ცსკა. ორივე გუნდს წარმატებული სტარტი ჰქონდა, მაგრამ მე-3 ტურში ალიანც არენას ბინადრებმა ოლიმპიკოზე მეტოქეს ნამდვილი წირვა გამოუყვანეს და ანგარიშით 7:1 გაანადგურეს. ევრო 2012-ის ფინალის მსგავსად, ორივე მოთამაშემ მოედანზე 90 წუთი გაატარა.

იმ დროს ბაიერნს წვრთნიდა ხოსეპ გვარდიოლა, რომელმაც თავისი გუნდი ჩემპიონთა ლიგის პლეიოფში წარმატებით გაიყვანა. რუდი გარსიას შეგირდებს კი გადამწყვეტ მატჩში "ქალაქელებმა" მოუგეს, რის შედეგადაც დე როსიმ ევროპა ლიგაზე გადაინაცვლა. ცნობისთვის, რომამ მიუნხენელებთან მეორე მატჩიც წააგო, მაგრამ ამჯერად მხოლოდ 0:2 დაფიქსირდა.

როგორც აღვნიშნეთ, დღეს ისინი უკვე მოწინააღმდეგე გუნდების მწვრთნელების რანგში ხვდებიან ერთმანეთს. ჩაბიმ ზედიზედ 46 მატჩია არ იცის, თუ რას ნიშნავს წაგება, რაც იტალიელი სპეციალისტისთვის რევანშის ასაღებად დამატებით მოტივაციას წარმოადგენს. ვნახოთ, შეძლებს თუ არა "ჯალოროსი" ბაიერის ტრიუმფალური სვლის შეწყვეტასა და დანიელესთვის ხასიათის გაუმჯობესებას.