საქართველოს 21-წლამდე ნაკრები ევროპის ჩემპიონატზე ასპარეზობას იწყებს და ხვალ პოლონეთის წინააღმდეგ პირველ მატჩს გამართავს.
მატჩის წინ, კომენტარი ჩვენი ნაკრების ფეხბურთელებმა - გაბრიელ სიგუამ და ოთო მამაგეიშვილმა გააკეთეს.
გაბრიელ სიგუა: "კარგი მოსამზადებელი ეტაპი გავიარეთ, ამხანაგურ მატჩში წავაგეთ, თუმცა გუნდში კარგი განწყობაა, მოტივაცია გვაქვს და ვეცდებით, ევროპის ჩემპიონატზე წარმატებით ვითამაშოთ. პოლონეთი საკმაოდ ძლიერი მეტოქეა, მაღალი ფეხბურთელები ჰყავთ და სტანდარტულებზე სახიფათოები არიან, თუმცა ჩვენ ჩვენი თამაში უნდა ვითამაშოთ. ბედნიერები ვიქნებით, თუ ამ მატჩს ბევრი ქართველი დაესწრება, შევეცდებით, მაქსიმუმი ჩავდოთ, პირველივე თამაშში 3 ქულა ძალიან მნიშვნელოვანია"
ოთო მამაგეიშვილი: "შეკრება ნაყოფიერად გავიარეთ, პირველი მატჩისთვის ვემზადებით და ვეცდებით, საქართველო ღირსეულად წარმოვაჩინოთ. ტრავმირებულები გვყავს, მაგრამ ჩვენი ყველაზე დიდი ძალა ერთობაა და თუ ამ ხასიათს შევინარჩუნებთ, ევროპის ჩემპიონატზე თავის კარგად წარმოჩენა შეგვიძლია."
