საქართველოს ნაკრების მარცხენა მცველმა წელს ჩემპიონთა ლიგაზეც ითამაშა. სამწუხაროდ, მისი გუნდი ლიგის ფაზიდან ვერ გავიდა და ასპარეზობს გამოეთიშა.
LaGazzetta.ge-მ აზაროვთან რამდენიმე თემაზე თურქული შეკრების ბოლო დრეს ისაუბრა.
როგორ ჩაიარა შეკრებამ და როგორ ფორმაში ხარ?
"შეკრებამ მშვენივრად ჩაიარა და კარგად ვემზადებით. ჩემპიონატს ფორმაში ვხვდებით. თუ მექნება საშუალება, რომ შახტარში დიდი სათამაშო დრო მომეცეს, სანაკრებო პაუზასაც უკეთეს ფორმაში შევხვდები."
ევროპის ჩემპიონატზე არგამოძახების შემდეგ, ნაკრებში დაბრუნდი. იყო თუ არა შენთვის ორმაგი მოტივაცია, რომ ასეთი დიდი ფორუმის გამოტოვების შემდეგ, ნაკრებს ორმაგი ძალებით დაბრუნებოდი?
"რა თქმა უნდა. როცა საქართველოს ნაკრებში მიძახებენ, ყოველთვის დიდი მოტივაციით ვარ. აქტიურად ვემზადები ხოლმე და ასე იქნება მომავალშიც. კვარა, ზუკა, ჩაკვე - მათთან ერთად ბავშვობიდან მოვდივარ, სულ ერთად გვიწევს თამაში და მათთან მოედანზე ყოფნა ჩემთვის კომფორტულია."
შახტართან ერთად ჩემპიონთა ლიგაზე ითამაშე...
"ჩემპიონთა ლიგაზე თამაში ბევრი ფეხბურთელის ოცნებაა და მოხარული ვარ, რომ ამ ტურნირზე უკვე მეორე წელია ვთამაშობ. ასეთი დონის თამაშებში მონაწილეობა ჩემთვის დიდი გამოცდილება იყო. სამწუხაროდ, სასურველი შედეგები ვერ დავაფიქსირეთ."
ამ ტურნირზე ბევრი გამორჩეული შემტევის წინააღმდეგ მოგიწია თამაში. ვისთან გაგიჭირდა ყველაზე მეტად?
"ლამინ იამალთან. მასთან თამაში სიამოვნებაც იყო, რადგან გამოცდილება მივიღე. ახალგაზრდა, ძალიან ნიჭიერი ფეხბურთელია და იამალთან თამაშით ვისიამოვნე."
თვლი თუ არა, რომ შახტარი არის გუნდი, სადაც კიდევ უფრო განვითარება შეგიძლია?
"შახტარმა ბოლო წლებში ბევრი კარგი ფეხბურთელი აღაზრდა. აქ განვითარება და შახტარიდან უკეთეს გუნდში წასვლა რეალურია და იმედი მაქვს, მომავალში დიდ გუნდში გადავალ."
