პოპულარულმა სპორტულმა ჟურნალისტმა და ვლოგერმა, ნობელ არუსტამიანმა თავის იუთუბ გვერდზე განათავსა ვიდეო, რომელიც ეხება საქართველოს ეროვნული გუნდის წარმატებას ევრო 2024-ზე და ხვიჩა კვარაცხელიას მომავალს. ვიდეოში ის ხვდება კახა კალაძეს, მამუკა ჯუღელს, ბადრი კვარაცხელიასა და გიორგი დემეტრაძეს. გადაღება მიმდინარეობდა "ჯვაროსნებისა" და პორტუგალიის მატჩის წინ და შემდგომ.
გიორგი დემეტრაძის პროგნოზი საქართველო-პორტუგალიის მატჩის წინ
"მჯერა, რომ საქართველოს შეუძლია პორტუგალიის დამარცხება და ჯგუფიდან გასვლა. დიახ, მოწინააღმდეგე არის ძლიერი, შემადგენლობა ვარსკვლავებით არის სავსე, მაგრამ იგებს ის გუნდი, რომელსაც მოგების უფრო დიდი სურვილი აქვს. მოვუგებთ პორტუგალიას და 4 ქულით ჯგუფიდან გავალთ".
ბადრი კვარაცხელია შვილის ბარსელონაში შესაძლო გადასვლის შესახებ
"რომელ გუნდში ვისურვებდი ხვიჩას ნახვას? ეს ჩემზე არ არის დამოკიდებული, მან თავად უნდა მიიღოს გადაწყვეტილება. სურვილზე თუ მიდგა საქმე, მისი ხილვა ბარსელონაში მინდა. მიყვარს ეს გუნდი. ჩემს ოჯახში ყველა ქომაგობს რეალს, მე კი კატალონიელებისკენ ვარ".
კახა კალაძე საქართველოს ნაკრების შესახებ
"ვფიქრობ, ეს არის ყველაზე ძლიერი საქართველოს ნაკრები თავის ისტორიაში. მათ ეს უკვე დაამტკიცეს. ასევე მინდა გამოვარჩიო ჩვენი მწვრთნელიც, სანიოლი, რომელიც ძალიან კარგად მუშაობს. მოედანზე უკვე ყველაფერი გამოჩნდა, თუ რა შეუძლიათ მათ".
მამუკა ჯუღელი ხვიჩა კვარაცხელიას მომავლის შესახებ
"სამწუხაროა, რომ ნაპოლი ჩემპიონთა ლიგაზე არ ითამაშებს, სამაგიეროდ ისინი სკუდეტოს მოგებას ეცდებიან. რაც შეეხება კონტრაქტს, ყველაფერი დე ლაურენტისზეა დამოკიდებული. იმ შემთხვევაში, თუ ის გადაწყვეტს კვარას გაყიდვას, ამას გააკეთებს კიდეც. იმ შემთხვევაში, თუ ის დააპირებს მის დატოვებას, მაშინ ახალ კონტრაქტს გავაფორმებთ.
პარის სენ-ჟერმენის ინტერესი? მათ სპორტულ დირექტორს არ ვიცნობ. ღირს თუ არა ხვიჩა 100 მილიონი? არ ვიცი, ვერ გეტყვით. ჩემთვის მთავარი არის ის, რომ მან ევროპულ ფეხბურთში ადგილი უკვე დაიმკვიდრა. აურელიოსთან კი ძალიან კარგი საქმიანი ურთიერთობა მაქვს".
ბადრი კვარაცხელია ხვიჩასთვის იდეალური ტაქტიკის შესახებ
"ხვიჩასთვის იდეალური ტაქტიკა 4-3-3 არის. ბარსელონას გარდა, ამ ტაქტიკით აღარავინ თამაშობს და სწორედ ამიტომ მინდა მისი ხილვა ამ გუნდში. ამ სქემაში მოთამაშე ხვიჩა ძალიან სასარგებლო იქნება. 3-5-2 მისთვის არ არის. კატალონიელების გარდა, ჩემი აზრით, გვარდიოლას სიტის ტაქტიკასაც კარგად მოერგებოდა ის".
210330210332
