17 წლის ჯამალ კაიშვილი საქართველოს რამდენიმე დღის წინ ეწვია, საქართველოს 17-წლამდე ნაკრებში ითამაშა, ნაკრებთან ერთად შეკრება გაიარა და ჩვენი დედაქალაქის მონახულებაც მოასწრო.
კაიშვილი დედით ქართველია, მიუნხენის ბაიერნის აკადემიაში ირიცხება და დიდ მომავალს უწინასწარმეტყველებენ. სამწუხაროდ, კაიშვილს ჯერ საქართველოს პასპორტი არ აქვს, თუმცა აქტიური მუშაობა მიმდინარეობს, რომ ეს პრობლემა მოგვარდეს.
LaGazzetta.ge კაიშვილს დაუკავშიდა და ვეცდებით, უკეთ გაგაცნოთ ტალანტი, რომლის სურვილიც საქართველოს ნაკრებში თამაშია.
ცოტა ხნის წინ, საქართველოს 17-წლამდე ნაკრებში ითამაშე, როგორია შთაბეჭდილებები?
"ეს ჩემთვის ძალიან განსაკუთრებული იყო. მთელმა პერსონალმა და ფეხბურთელებმა თბილად მიმიღეს. ყველაფერი მშვენიერი იყო. ნაკრებში ჩემს გამოძახებაზე საუბარი დიდი ხანი მიმდინარეობდა, ამიტომ მოუთმენლად ველოდი. ჩემთვის დიდი პატივია საქართველოს ნაკრებში თამაში."
რას ნიშნავს შენთვის საქართველო? როგორც ვიცი, ქალაქის დათვალიერებაც მოასწარი...
"დროის უმეტესი ნაწილი ნაკრებთან ერთად ვიყავი და ქალაქის დასათვალიერებლად მხოლოდ ორი დღე მქონდა. ეს ჩემი პირველი ვიზიტი იყო საქართველოში და ჩემთვის განსაკუთრებული გამოცდილება იყო, რადგან დედაჩემის სამშობლოა და ყოველთვის მაინტერესებდა ქართული კულტურის შესახებ მეტის გაგება. ძალიან მომეწონა თბილისის ატმოსფერო. ქალაქი ძალიან ლამაზია."
ახალგაზრდულ ნაკრებში ყოფნის დროს, ქართველ ფეხბურთელებსაც გაიცნობდი.
"ალბათ არ უნდა ვთქვა, რომ ვინმეს საუკეთესო მეგობარი მხოლოდ ერთი შეხვედრის შემდეგ გავხდი. ძალიან კარგი ბიჭები არიან როგორც ფეხბურთში, ისე მის მიღმა. ყველასთან კარგად ვიყავი, ყველაზე მეტ დროს ჰალიდ დოლტმურზიევთან ვატარებდი."
როგორ მოხვდი მიუნხენის ბაიერნის აკადემიაში?
"ბაიერნი ჩემი სახლია. აქ მრავალი წელია ვარ. გუნდის სკაუტმა 2017 წელს შემამჩნია და ასე მოვხვდი აკადემიაში. ჩემთვის დიდი პატივია, რომ ასეთი ლეგენდარული კლუბის ნაწილი ვარ."
ბაიერნში ყოფნის დროს, გაქვს თუ არა კომუნიკაცია დიდ გუნდთან და მათ ფეხბურთელებთან?
"აქ ხშირად ნახავთ ცნობილ მოთამაშეებს. მაგალითად, ცოტა ხნის წინ პორტუგალიის ნაკრები ჩამოვიდა. ბრუნო ფერნანდეშთან ერთად ფოტო გადავიღე, კრიშტიანუ რონალდუ და სხვები ვნახე. ერთხელ, ბარსელონადან იამალიც კი ვნახე ჩვენი კამპუსის კაფეში. ბაიერნის მოთამაშეებიდან, როცა ის აქ იყო, სადიო მანემ რამდენიმე რჩევა მომცა, ტრავმა მქონდა, ვმკურნალობდი და მირჩია, ეს პერიოდი ჩემს სისუსტეებზე მემუშავა. ასევე, ხშირად ვხვდები და ვესაუბრები მოთამაშეებს, რომლებიც ახლახან იყვნენ აკადემიაში და ახლა პირველ გუნდში თამაშობენ."
როგორია ბაიერნის მწვრთნელების დამოკიდებულება შენს მიმართ?
"მიყვარს მარცხენა ან მარჯვენა ფლანგის შემტევად თამაში. მწვრთნელები ხანდახან ექსპერიმენტებს ატარებენ და ცენტრში მიყენებენ. სხვათაშორის, საქართველოს ნაკრებში ცენტრალურ თავდამსხმელადაც ვითამაშე და ორი შანსიც კი მქონდა. ძალიან მინდოდა პირველ თამაშში გოლის გატანა, მაგრამ დარწმუნებული ვარ, მალე გავიტან."
საქართველოს პასპორტი ჯერ არ მიგიღია. როგორ მიდის პროცესი?
"ჩემი ყველაზე დიდი თავის ტკივილია. სამწუხაროდ, ეს ბიუროკრატიული სირთულე მრავალი წელია თან მახლავს. ამას ჩემი გზის ნაწილად ვიღებ და დარწმუნებული ვარ, რომ ყველა სირთულის შემდეგ შვება მოდის და მალე ოფიციალურ მატჩებში თამაშს შევძლებ."
როგორ მოხდა შენსა და საქართველოს შორის პირველი კავშირი?
"საქართველოს ფეხბურთის ფედერაციის ვიცე-პრეზიდენტი ალექსანდრე იაშვილი დამიკავშირდა. ის მიუნხენში ჩამოვიდა და შეგვხვდა, სადაც პირდაპირ ვუთხარი, რომ საქართველოს ნაკრებში თამაში მინდა. დროებითი პასპორტის, მოწვევის, მოგზაურობის ნებართვის და ა.შ. მიღებას გარკვეული დრო დასჭირდა, მაგრამ საბედნიეროდ, ვიგრძენი ქართული მხარის სრული მხარდაჭერა და მათი გულწრფელი სურვილი, რომ მათაც სურთ, საქართველოს ნაწილი ვიყო. მადლობელი ვარ ყველასი, ვინც ამ პროცესში მიიღო მონაწილეობა."
რა არის შენი სამომავლო გეგმები?
"ჩემი უახლოესი გეგმები, უპირველეს ყოვლისა, ქართული პასპორტის მიღების პროცესის დასრულებაა. ფეხბურთის თვალსაზრისით, ბევრს ვმუშაობ, რომ საუკეთესო მოთამაშე გავხდე. ბაიერნის აკადემიაში ყოფნით ბევრს ვსწავლობ და მომავალი წელს 19-წლამდელთა გუნდში ახალგაზრდულ ჩემპიონთა ლიგაზე ვითამაშებ. მსურს ამისთვის 100%-ით მზად ვიყო."
