დღეს გაიმართება მსოფლიო ჩემპიონატის საკვალიფიკაციო ეტაპის მატჩი საქართველოსა და ბულგარეთის ნაკრებებს შორის. მოგეხსენებათ, ჯგუფური ეტაპის პირველ ტურში ორივე ნაკრებმა თავისი შეხვედრა დათმო. საქართველო თურქეთთან, ხოლო ბულგარეთი ესპანეთთან დამარცხდა.
თუ ჯგუფიდან გასვლის შანსების დატოვება და მომდევნო მატჩებშიც ბრძოლა გვსურს, დღევანდელი მატჩი აუცილებლად მოსაგებია.
როგორც ჩვენი ნაკრების მთავარმა მწვრთნელმა ვილი სანიოლმა თქვა, სასტარტო შემადგენლობაში რამდენიმე ცვლილება იქნება. განსაკუთრებით, ცვლილებებს ნახევარდაცვის ხაზში უნდა ველოდოთ.
ისტორიის განმავლობაში ეს ნაკრებები ერთმანეთს სულ 8-ჯერ დაუპირისპირდნენ, საიდანაც 4 ბულგარეთმა მოიგო, 2 საქართველომ, 2 კი ფრედ დასრულდა.
ბოლოს ეს ნაკრებები ერთმანეთს სწორედ დინამო არენაზე დაუპირისპირდნენ, 2022 წლის მატჩი უგოლო ფრედ დასრულდა. წითელი ბარათის გამო, ვილი სანიოლი დღევანდელ მატჩს ტრიბუნებიდან უყურებს და ჩვენს ნაკრებს ზურაბ ხიზანიშვილი უხელმძღვანელებს.
ვილი სანიოლი (საქართველოს ნაკრების მწვრთნელი): "ის პრობლემები, რაც თურქეთთაბ გვქონდა, ინდივიდუალური შეცდომების ბრალი უფრო იყო, ვიდრე ტაქტიკის. 4 მცველზე გადასვლა სწორი გადაწყვეტილებაა, თაობათა ცვლა მიდის და მარტის შემდეგ ასე ვთამაშობთ. სასტარტო შემადგენლობაში ცვლილებები იქნება, რადგან ბულგარეთი თურქეთისგან განსხვავებული ნაკრებია. 3 დღეში 2 მატჩი გვაქვს და ცვლილებები საჭიროა. გათვლა იმაზე იქნება, რომ თამაში უფრო ორგანიზებულად დავიწყოთ. ბულგარეთის ნაკრების ბოლო რამდენიმე მატჩს ვუყურე, კარგად ორგანიზებული გუნდია და ჩვენთვის ახალი გამოწვევა იქნება"
ილიან ილიევი (ბულგარეთის ნაკრების მწვრთნელი): "საქართველოსთან აუცილებლად მოგება გვჭირდება, ამიტომ აქტიურად ვემზადებით და ვიცით, თუ რა მნიშვნელობა აქვს შეხვედრას, რადგან თავისი მატჩი საქართველომაც დათმო. საქართველო ერთ-ერთი ყველაზე პროგრესირებადი ნაკრებია ევროპაში. ისინი შემტევ ფეხბურთს თამაშობენ, მაღალი დონის ფეხბურთელები ჰყავთ. თურქეთთან მატჩში საქართველოს თამაშს ვუყურეთ და რამდენიმე დასკვნა გამოვიტანეთ - ისინი ბევრს დარბიან, მომენტებს ქმნიან და ხვალინდელ მატჩშიც ამას უნდა ველოდოთ."
საქართველო - ბულგარეთი
მსოფლიო ჩემპიონატის შესარჩევი ეტაპი
7 სექტემბერი, 17:00
დინამო არენა, თბილისი
მთავარი მსაჯი: გლენ ნიბერგი (შვედეთი)
საქართველოს ნაკრების სავარაუდო შემადგენლობა
