ბარსელონა სატრანსფერო ბაზარზე აგრძელებს თავდამსხმელის ძებნას. როგორც ცნობილია, კლუბის მთავარი სამიზნე არის ხულიან ალვარესი, მაგრამ ვარსკვლავური ფორვარდის კატალონიაში გადაბარგების შანსი დღითიდღე იკლებს. მადრიდის ატლეტიკოს მტკიცედ აქვს გადაწყვეტილი არგენტინელი წინახაზელის "ბლაუგრანაში" არ გაშვება.
ესპანურ პრესაში ფიგურირებდა "როხიბლანკოსის" ლიდერის სამი ალტერნატივაც - დუშან ვლაჰოვიჩი, გიორგი მიქაუტაძე და ვანგელის პავლიდისი. დიახ, სიაში ფიგურირებს ქართველი ფორვარდიც, ვინც კამპ ნოუს მკვიდრებს The Athletic-მაც ურჩია. "ლა არანიას" ალტერნატივა, რომელზეც არავინ საუბრობს...ვილიარეალის წინახაზელი სწორედ ასე დაახასიათეს.
ჰანსი ფლიკის გუნდის სატრანსფერო გეგმებს შეეხო Marca-ც, რომელმაც გამორიცხა ბერძენი თავდამსხმელის ვარიანტი, რადგან ის ფენერბაჰჩეში გადასვლასთანაა ახლოს. რჩება 2 კანდიდატი: სერბი ფორვარდი და "სუბმარინას" მე-9 ნომერი. აუცილებლად სათქმელია ისიც, რომ მიმდინარე წლის 30 ივნისის შემდეგ, ტურინის იუვენტუსის ექს-წინახაზელი თავისუფალი აგენტია.
"ბიანკონერის" ყოფილი ცხრიანის გაფორმების შემთხვევაში, ბარსელონას არ მოუწევს მისი გამოსყიდვა სხვა გუნდიდან, თუმცა პრობლემას ფორვარდის მაღალი სახელფასო მოთხოვნები წარმოადგენს. რაც შეეხება მიქაუტაძეს, მას აკავშირებს კონტრაქტი "ყვითლებთან", მაგრამ საუბარია მოთამაშეზე, რომელმაც პრიმერას ალღო სადებიუტო სეზონშივე აუღო.
ერთ მხარეს არის უფასო, თუმცა ოპტიმალური ფორმისგან შორს მყოფი და მაღალი სახელფასო მოთხოვნების მქონე ვლაჰოვიჩი, მეორე მხარეს კი პრიმერა დივიზიონის გასული სეზონის ერთ-ერთი ყველაზე იმედისმომცემი დებიუტანტი, რომლის სანაცვლოდაც სერამიკას მკვიდრები მინიმუმ 50 მილიონ ევროს მოითხოვენ.
